“Inuman Yoy Impresyon Ko ed Tastasi nen Jehova”
ONTAN so reaksion na sakey a Polakon opisyal na prisoan ed sakey ya artikulo nipaakar ed kimey na Tastasi nen Jehova, a nireport ed paway tayo na Oktubre 15, 1998. Insalaysay na artikulon “When Hearts of Stone Turn Responsive,” so matalonan pankikimey na Tastasi nen Jehova ed saray priso diad Wołów, Poland.
Sakbay a nipaway ed publiko so abitla ed tagey a magasin a Watchtower, niyuksoy so espisyal a miting nen Setyembre 13, 1998, diad Wołów penitentiary pian nitarya itan parad saray priso. Saramay naimbitaan ya onatendi et kaiba iray Tastasi diman, bautismadon priso tan arum nin interesadon priso, tan pigaran opisyal ed penitentiary. Say onggendan so pigara ed saray obserbasyon na saramay inmatendi.
Inkuan nen Jerzy, sakey ed Tastasi nen Jehova ya abautismoan ed prisoan ed masulok lan limay taon: “Malikeliket ak, ta nabasak natan so nipaakar ed pirmin impansagpot na agagi a manlapud kabangibang iran kongregasyon pian tulongan da kami.” Inyarum to: “Panggugunaetan kon pasimbaloey inkasiak, tan natalosan ko natan no panon ak a momoldien nen Jehova.”
Inkuan na sakey nin priso, a manngaran na Zdzisław, nipaakar ed panagpulong ed prisoan: “Diad peles et apatiran priso so magano lan manpabautismo, tan walaray balo nin interesado a tuloytuloy lan mimiaral ed hall. Sayan artikulo so mabiskeg a mamakiwas ed sikami parad kaaruman nin kimey ed sayan lawak.” Agaylan positibon awawey, no ikonsideran wala ni so 19 taon a pakapriso nen Zdzislaw!
Kayari impakabasa ed artikulo nipaakar ed Wołów penitentiary, inkuan na sakey ya opisyal ed prisoan: “Sikami so nagkalalo lan apagalangan. Agko inisip a sayan penitentiary so makaawat na ontanlan paborablin inkipalapag ed 130 lenguahe ed sankamundoan. Labalabay takayon totoo, tan apresiaen koray sagpot yo diad biang na saray priso.” Inyarum ni na sakey ya opisyal: “Inuman yoy impresyon ko ed Tastasi nen Jehova. Dati et minoria takayon relihyoson panatiko. Atalosan ko la natan a sikayoy totoon walaan na prinsipyo.”
Say direktor na prisoan na Wołów, si Marek Gajos, so akaimis insan to inkuan: “Diad inmuna et abaloan min dagdaiset so nagawaan yo. Abaloan min sakey kayo lambengat a relihyon a pirmin manpilalek labat ed pakapasimbalo a nagawaan na Biblia ed saray priso. Balet, diad impakanengneng ed saray resulta na inmunan kimey yo et denesidi mi pitulongan a maong. Agkayo kinmesaw ed iyaakar yo dia ed loob lay siam taon, tan apresiaen kon maong so agawaan yo la anggad natan.”
Balet, panoy impangawat na lapag iran priso ed artikulo diad Wołów? Lapud pirmin interes na saray priso kanian naupot so suplay a magasin na saray Tastasi ed prisoan. Interesado met iray opisyal na prisoan kanian kinmerew ira na 40 ekstran kopya parad sikara. Pian nasapotan so indakel na pankaukolan, tinmulong iray lokal a kongregasyon tan angiter na 100 ya ekstran kopya parad saray agagi ed prisoan. Ontan met, dinmakel so onaatendi dima’d prisoan.
Inkuan nen Piotr Choduń, sakey ya opisyal na prisoan ya akitulongan a maong ed Tastasi nen Jehova: “Denesidi min iparungtal iyan artikulo ed amin ya istanti ed penitentiary. Ilaloan min amin a priso ya agyo ni iyaaralan na Biblia so manbasa ed magasin.”
Say maabig ya alimbawa na Tastasi tan say determinadon panagpulong da so tuloytuloy a walaan na maabig iran resulta. Nilikud ni ed 15 a priso ya inmaligwas angga la’d pampabautismo, 2 opisyales na prisoan so angidedika lay bilay da ed si Jehova tan sakey nin opisyal na prisoan so papaiyaralan lay Biblia. Siempre, saray agagin manpupulong ed prisoan na Wołów so angipaarap na amin a galang ed si Jehova lapud intalona ra.—Ikompara so 1 Corinto 3:6, 7.
[Litrato ed pahina 28]
Taloran Tastasi tan sakey a priso diad impangipresenta na magasin diad panaglektyuran a hall ed prisoan