Tepet

◼ Antoray nepeg tayon alwaran sano pupulongan tayoray priso?

Diad sankamundoan et kulangkulang a waloran milyon iray priso, tan arum ed sikara so interesado ed maong a balita. (1 Tim. 2:4) Makakaawat so sakey a sangan opisina na manga 1,400 a sulat ed kada bulan manlapud saray priso tan kapamilyaan da ya onkekerew na literatura odino pabibisita ira. Anggaman masimoon so interes na dakel a priso, unong ed eksperiensya et walaray mankuankuanan ya interesado, a sinisiblet a mangaanamot ed totoo na Dios. Nisesengeg ed saya, amin so nepeg ya ontumbok ed saray onggendan ya alwaran sano pupulongan iray priso.

Diad dakel a kaso et saray priso so napupulongan panamegley na saray sulat. Mapeget ya irerekomenda a saray agagin bibii et agda susulatan iray lalakin priso, anggano say kalat da et pian tulongan ira ed espiritual. Satan so responsabilidad lambengat na saray kualipikadon agagi a lalaki. Nayarin pabtangan iray kualipikadon agagin bibii a misulatan ed saray bibiin priso ya angibalikas na masimoon ya interes ed katuaan na Biblia. Nepeg ya agmangipapawit na kuarta odino saray personal a regalo ed saray priso, anggaman nayarin nakerew iratan.

Sano mangipanengneng na interes so sakey a priso, say ngaran tan address to so kaukolan ya iter ed kongregasyon ya akanteritorya ed prisoan. Kaslakan lan amta na saray kualipikadon agagin lalaki no panon dan asikasoen iray nayarin onlesan nanduruman situasyon. No ag-amta so kongregasyon, say impormasyon so kaukolan ya ipawit ed sangan opisina.

Aliwan makapuy no saray apabtangan ya agagin lalaki et manggawa na pantitipon ta pian manbabansag a makapanaral iray pigaran priso. Balet, nepeg ya agnagawa ed loob na saray prisoan iray espisyal ya ebento a saray manangipalapag et bulos lan mituyaw ed saray priso. Niarum ni, agmakabat parad saray manangipalapag a basta-basta labat lan ombisita ed prisoan tan maapit a milimog ed saray priso.

Sikatayo so ‘mankalakal sirin a singa saray uleg, tan mauyamo a singa saray malapati’ legan ya inanabang tayo so maong a balita ed saray priso.​—Mat. 10:16.