Report na Saray Manangiyabawag na Panarian
Panangikayat ed Bukel na Panarian ed Amin ya Okasyon
IPAPASESEG na Salitay Dios, say Biblia, so inkakuli. Oniay inkuan nen Arin Solomon: “Dia ed kabuasan itanem mo so binim, tan dia ed labi agmo ipiko so limam; ta agmo amta no anto so onaligwas, no saya kasi odino saman, no sikara kasi nampadpara naani a maong.”—Eclesiastes 11:6.
Diad kada matukoy ya okasyon, itatanem na Tastasi nen Jehova so ‘bini’ diad pangipupulong ed maong a balita na Panarian na Dios. Diad masulok a 230 a daldalin tan grupo na isla, sikaray nantultuloy ya ‘agtinmunda a nanbabangat tan nanpupulong ed maong a balita nipaakar ed si Kristo et Jesus.’ (Gawa 5:42) Iyiilustra na onggendan iran eksperiensia no panon na Tastasi nen Jehova ya ‘agipipiko so lima ra’ ed panagpulong a kimey.
◻ Diad Republika na Cape Verde, lalabasan na sakey ed Tastasi nen Jehova so sakey a prisoan legan a mibibiang ed lawak a ministeryo. Diad patio na prisoan, pigaran priso so mamapainawa ed tagey na kiew. Uusdongan so Tasi ed leksab, kinmerew iray priso na pigaran magasin. Intaker na Tasi so pigaran Panag-Bantayan tan Awake! a magasin ed sakey a bato tan ibuntok ed bakor na prisoan. Bilang resulta na sayan inmunan interes, nigapo so 12 panangiyaral na Biblia. Talora ed saray priso so angidedika na bilay da ed Dios tan impresenta ray inkasikaran pabautismoan. Sakey ed saray priso so manlilingkor bilang sigpot-panaon ya ebanghelisador, odino payunir, ed masulok lan sakey taon natan. Balet, panon so pakapanpupulong da ed prisoan? Unona et inapag so prisoan ed saray teritorya. Insan imbunog so teritorya ed taloran Tasi tan kinimeyan iray selda. Kokomustaen na sarayan manangiyabawag na Panarian so interes ed miparan paraan a singa gagawaen na Tastasi nen Jehova ed intiron mundo—diad panamegley na panagpawil. Balet, walay pidumaan to diad kabetbet na kikokondukta na panangiyaral na Biblia. Imbes a maminsan odino mamidua lambengat so panangiyaral na Biblia ed loob na sakey simba a gawaen ed sakey oras odino onsulok ni, pigaran priso so manaaral ya agew-agew! Niarum ni, inabuloyan na direktor heneral na prisoan iray Tastasi pian makagawa na amin a miting na kongregasyon ed prisoan.
◻ Tinawir na sakey a bii ed Portugal so dakel a publikasyon na Watch Tower kayari impatey na bai to. Lapud sikatoy aliwan sakey ed Tastasi nen Jehova, anggapoy interes ton iyatol iray libro. Balet, agto met labay a deralen iratan. Aminsan ya agew et sinaglawi to’d Tasin dinmalaw ed sikato diad pankakabkaabungan so nipaakar ed librarya. Intepet na Tasi no kabat toy peteg a kablian na librarya. Inyebat na bii: “Diad katuaan to et agko amtay peteg a kablian da, balet panon kon naamtaan?” Inawat na bii so panagaral ed Biblia, tan agnambayag et apabli to lay librarya nen bai to. Sikato met la natan so bautismadon Tasi nen Jehova. Nagkalalo ni, say anak ton bii tan sakey a maapit a kaaro na pamilya so manaaral met la na Biblia. Agaylan tuan mabmablin tawir iyan koleksyon na libro!