Inkamatua—Nibana odino napili?
“ANGGANO agak nisipor a matua, sagpaminsan et ontan ak no nibana.” Ontan so inkuan na matilan Autolycus ed The Winter’s Tale nen William Shakespeare. Iyiilustra na saya so manunaan a kakapuyay too—say kiling tayo’d gawan-mauges, a manlalapud ‘manamalingon puso.’ (Jeremias 17:9; Salmo 51:5; Roma 5:12) Balet kabaliksan ton nia kasin agtayo la itan napili? Kasin say dalisay a walna so nibana labat? Andin balot!
Sakbay na inloob na ananak na Israel ed Insipan a Dalin, akisalita si Moises ed sikara legan a mankakampamento ira’d patar na Moab. Inyarap to’d sikaray duaran panpilian. Unoren daray ganggan na Dios tan diad ontan et nabendisyonan odino iwaklit iratan tan diad ontan et anien so ampait a bungay kasalanan. (Deuteronomio 30:15-20) Walad sikaray panpili.
Lapud walaan na bulos linawa, walaan itayo met na panpili. Anggapoy anggan siopa—pati say Dios—so makapaskar ed sikatayon manggaway maong odino mauges. Balet, susto labat so pantepet na, ‘No nikiling lay kapusoan tayo’d inkauges, panon tayo nin agamilen so maong?’ Bueno, maalwar a nengnengen na dentista iray ngipen pian imanoen iray deral odino bokbok sakbay ya onloor ni. Mipadpara, kaukolan tayon usisaen so piguratibon puso tayo diad pananap ed saray kakapuyan tan moral a bokbok. Akin? Lapud “dia ed puso so pawayan na saray mauges a nonot, panagpatey, saray pikakalugoran, saray panaglawan, saray panagtakew, panagtasi ed aliwan tua, saray mabanday a salita,” so inkuan nen Jesus.—Mateo 15:18-20.
Pian nipresirbay ngipen, nepeg a maalwar ya ekalen na dentista so antokaman a naromog a bokbok. Mipadpara, say determinadon kiwas so kaukolan pian bagoten so “mauges a nonot” tan makapuy iran pilalek ed puso. Diad pambasa tan panmolimoli ed Salita na Dios, say Biblia, agtayo lambengat naamtaan iray dalan na Dios noagta naaralan tayo met so panggaway maptek.—Isaias 48:17.
Si Arin David na Israel so anganamot ed kaaruman nin importantin tulong diad pibarangkaan ed panggaway maptek. Oniay impikasi to: “Palsaen mo dia ed loob ko so sakey a malinis a puso, O Dios, tan mamasimbalo ka na matunong ya espiritu dia ed loob ko.” (Salmo 51:10) On, diad sipipikasin panagmatalek ed si Jehova a Dios, natalonaan tayo met so kiling a manggaway mauges tan nabayuboan so “matunong ya espiritu” diad panggaway maong. Diad onian dalan, agtayo lambengat abuloyay inkamatua ed kibanbana. Satan so bengatlan napili.
[Litrato ed pahina 21]
A singa diad kipapasen nen David, say pikakasi’d si Jehova so ontulong ed sikatayon manggaway maong