No Panon so Pakaromog na Ilalo Anggaman Andi-Ilalo

ISIPEN pan oniay naeeksperiensiam: Aderal ya amin so materyal a kayarian mo, a tinaynan to kan pakaskasi. Saray anak mo​—a gayagay bilay mo​—so naandi la ra. Say asawam so agmakapaseseg. Sika lay makapkapuy. Kada agew et sakey a mairirap a sagmaken.

No ontay situasyoy bilay mo, wala ta ni rason pian manbilay ka? Odino onsuko ka la’d inkaandi ilalo?

Say kapkapandiskribin makapagonigon a kipapasen so asagmak a mismo nen Job, toon nambilay ed panaoy Biblia. (Job, kapitulo 1, 2) Diad punton say liknaan to et abebbeba la, nantagleeyan nen Job: “Say kamarerwak sikato so mapaga ed bilay ko.” Pian nainawaan et labay to lay ompatey. (Job 10:1; 14:13) Balet, anggaman alay paniirap to, pinansiansia nen Job so integridad to ed Dios. Kanian “binindisionan [nen Jehova] so kaunoran a kasampotan nen Job a lalo nen say gapo to.” Diad ontan et sikato so inatey ed kareenan, “masiken tan nagnap ed saray agew.”​—Job 42:12, 17.

Nipanengneng nen Job so alimbawan panagsungdo a bibidbiren angga ni’d natan. Apaaligwas na saray pakasalsali so personalidad to tan anagdag ed arum a manggaway maong. (Santiago 5:10, 11) Manuna’d amin et say anggapoy depekton integridad nen Job so amagayaga’d puso nen Jehova. (Uliran 27:11) Kanian say situasyon a pirmin pakakadetdetan so diad kaunoran et ontanlan pananalo ed inkamaridios, pananisia, tan integridad ya amendisyon ed Job tan amin na saramay napapakiwas ed alimbawa to.

Ilalo Anggaman ed Nanduruman Pakasalian

Nayarin nasasagmak moray pakasalsalin asagmak met nen Job. Say inkaandi na inad-aro so nayarin anaynan ed sikan ansakisakit so linawam. Say graben sakit so nanggawa’d bilay mon makapaot-ot. Say intiron kabibilay mo so singano akusbo lapud makapaer-ermen a diborsio. Lapud kairapay bilay et onkulang ka’d saray pankaukolan. Nayarin sikay puntirya na agmakatunongan a panamasegsegang na saray onggugula’d tuan panagdayew. Lapud pipupuligesgesan ed saray pakasalsali liknaen mon andiay ilalo so arapen mo.​—1 Pedro 1:6.

Imbes ya onsuko la’d inkaandi ilalo, tepetan mo pay inkasika, ‘Akin a maniirap ak?’ Sika so maniirap lapud manaayam ka’d mundon “mandokdokol ed [pakayari na] kaugsan,” si Satanas a Diablo. (1 Juan 5:19) Kanian, amin so maniirap. Anggan panon et amin tayo so naaapektoan na isasagyat na Diablon panamusol ed mensahe na Panarian, agmaaron panagsalita ed arum, odino ed makapataktakot iran gawa na agmaridios a kondukta ya ontanlan kasmak ed sarayan “panaon a maatap.”​—2 Timoteo 3:1-5.

No wala so trahidyan agawa’d bilay mo, nayarin sika so biktima na “panaon tan kapalaran [agnailaloan a nagawa, NW].” (Eclesiastes 9:11) Diad biek a dapag, no maminsan et onaliwa iray bengatla’d bilay lapud mismon atawir tayon inkamakasalanan. (Roma 5:12) Anggano sika so seryoson alingo balet ta sika so nagbabawi tan impatulongan ka’d espiritual a paraan, agmo iisipen a sikay inkaindan la na Dios. (Salmo 103:10-14; Santiago 5:13-15) Mas ni nen siopaman, iyaansakit to itayo. (1 Pedro 5:6, 7) Makapankompiyansa ka a “si Jehova asingger ed saray wala ed kipapasen na sakey a nabtagan na puso; tan ilaban to so totoo a wala ed sakey a kamarerwa a masakit ed panagbabawi.” (Salmo 34:18) Anggan panon lan makapaermen odino grabe so impakasalim, naikdan ka nen Jehova na kakabatan pian napidenengan itan. (Santiago 1:5-8) Lawas mon tandaan a natambal nen Jehova so amin a pakasakitan. Sano walaan ka na abobon to, anggapo so makaamper ed pakagamor mo’d premyon bilay.​—Roma 8:38, 39.

Wala ta so Nagunggunaan ed Pakasalsali?

Wala so abayag lan diparan, “Kada problema et walaan na bengatlan makapailalo a nanengneng na sakey, singa sinag ed gilig na ambilunget a lurem.” Satan so simplin panangibagan anggan panon lay iyuges na bengabengatla et lawas wala so rason pian say sakey et manilalo. Say gagala na amin a nisulat diad Salita na Dios et pian “wala so ilalo tayo.” (Roma 15:4) Anggan panon la kagrabe so kipapasen mo, saray sipan tan prinsipyo diad Biblia so makapangiter ed sika na apasimbalon gayaga tan ilalo.

Ipapanengneng na Kasulatan a ‘say ermen et anlemew tan magangano’ sano ikompara’d maando iran bendisyon a walad arapan na saramay mangaaro ed Dios. (2 Corinto 4:16-18) Ipapanengneng met na Biblia a saray maridios a kualidad a nababayuboan anggaman walaray pakasalsalian so mas babaleg so kablian nen say inkabantog odino materyal a kayamanan. (1 Juan 2:15-17) Kanian, anggan say panirap so makagungguna met. (Hebreos 5:8) Diad tua et say pangiyaplika ed naaaralan legan na pakasalsali et makapangitarok na agnailaloan iran bendisyon.

Say pirmin pakasalsali et pagmaliwen to kan mas maabig tan agtanton alablabas ed walnam. Aksobien mo seguro a diad apalabas et walay ugalim a pakakasyodotan na arum tan angamper ni ingen ed iyaligwas mo’d espiritual. Anganko et say sobran-matalek. Kayari impanirap lapud sinagem ya agawa’d bilay mo, amoriam a sika manaya so maletletey tan kaukolan mo so tulong na arum. No walay leksion a nalam lapud impakasalim tan ginawam so nakakaukolan a pananguman, angungguna itan ed sika.

Anto kasi no diad apalabas et naiirapan kan pidenengan na arum lapud mairap mon kontroley awawey mo? Nayarin nansengegan ni ingen iya na gonigon ya angapekta’d bunigas mo. (Uliran 14:29, 30) Balet, natan et mas marakep lay situasyon ta onsasaral ka’d tulong na espirituy Dios pian makapandangka ka.​—Galacia 5:22, 23.

Singa met say arum, anganko ta walay pankanawnawan sika met so andian na panangasi ed saramay alingo. Balet no sikan mismo so naplag ed situasyon a kaukolan mon tuloy so panangasi, maseguron natan et mas onkiling kan mangasi ed arum. Say impapuson simpatiya, paga, tan panangasin nipanengneng ed sika so mangipamorian nepeg mon ipatnag so mipadparan kualidades ed saramay magbabawin managgaway mauges. No say impanermen mo et ametek ed sarayan kakapuyan ed personalidad mo, sakey iyan gunggunan naalam ed eksperiensiam. Naamtaan mo a “say panangasi maliket ya onsumpa ed panangukom.”​—Santiago 2:13; Mateo 5:7.

Anto no say impakadisiplinam ed Kristianon kongregasyon so nansumpal ed impakabalang mo na pabpablien iran pribilihyo tan respeto na arum? Agpatatalo’d inkaandi ilalo. Say impakadisiplina so mamapasiansian malinis ed kongregasyon, balet ta nitekep ed gagala so kipawil ed espiritualidad na managgaway mauges. Siempre, “anggapo so pananusa natan a singa sengeg na liket, noag ingen kaermenan; balet kayari to mangiter na bunga a mareen na katunongan ed saray nailuam lapu ed sikato.” (Hebreos 12:11) Anggaman say disiplina so makapakusbo, agto papaulyanan a naandiay ilalo so toon mapaabeban magbabawi. Say inmunan Ari na Israel a si David so pirmin adisiplina lapud gawan mauges, balet ta sikato so nagbabawi tan ag-abayag et akaawat met na nikaduman komendasyon bilang too na matalonggaring a pananisia.​—2 Samuel 12:7-12; Salmo 32:5; Hebreos 11:32-34.

Say pakasalsali so walaan na baleg ya epekto’d panmoriam. Diad apalabas, say imanom so nayarin nisentro’d materyalistiko iran kalat tan agawaan a sengegay pakabidbiran ed sika tan talindeg ed sosyedad ed sayan mundo. Anganko ta say pakasalsalin nisiglaot ed impanguman na kipapasey pinansyal odino say impakalugi so angiyapasakey ed kanonotan mo ed saray lalon importantin bengatla. (Ikompara so Filipos 1:10.) Natan et amoriam a saray kablian tan kalat ed espiritual diad sagradon serbisyo so mogmon bengabengatlan makapangiter na tuan gayaga tan magnayon a kapenek.

Manmatalek ed si Jehova

Say pangisaklang na sagradon serbisyo ed si Jehova so nayarin mansumpal diad kapasegsegang tan kapairap diad lima na saramay onsusumpa ed saray sisiaen mo bilang Kristiano. Nayarin liknaen mon sika so nalalames lapud sayan pakasalsali, balet walay nagungguna ed satan. Sayan subok so mamabiskeg ed pananisiam. Niarum ni, arum a maniirap lapud kapapasegsegang so napaseseg tan napabiskeg diad pakakaimaton ed anos mo. Saray makakatasi ed maabig a konduktam so napakiwas a mangigloria ed Dios. Ompan saray sumusumpam so nabaingan ni ingen a bidbiren day maong iran gawam!​—1 Pedro 2:12; 3:16.

Pian napaliisay inkaandi-ilalo sano napapasegsegang, kaukolan moy manmatalek ed si Jehova. Ipapanengneng na Salita To a seguradoy pakainawa manlapud pakasalsali, balet ta ag-itan onsabi ed panaon a labay mo. Ambegya, “agkayo komon nakesawan a manggawa na maabig.” (2 Tesalonica 3:13) Ituloy mon anapen iray paraan pian natalonaan iray pakasalsali tan pian mansungdo. Anggaman nengneng ton andiay-ilalo, “paawit mo ed Jehova so awit mo, et sikato benbenan to ka; agton balot paulyan so matunong a natentenyeg.” (Salmo 55:22) Imbes ya abageyen mon maong so inkasika, isipen mo pa labat no panon a sika so abendito ed impakaamtam ed si Jehova, ed impakapilimog ed totoo to, tan ed pakawalaan na ilalon magnayon a bilay.​—Juan 3:16, 36.

Isentrom so kanonotan mo ed saray importantin bengatla. Asinggeray Jehova ed kada agew diad pikakasi, a kerewen ed sikatoy biskeg pian makapansungdo. (Filipos 4:6, 7, 13) Ipulisay so antokaman a kanonotan ya ombawi ed saramay sengegay pakakairapan mo. Ipalima la itan ed si Jehova. (Roma 12:19) Lawas anapen iray paraan a napinom so personalidad mo, a babayuboay Kristianon kualidades. (2 Pedro 1:5-8) Apresyaen so amin a bengatlan gagawaen na arum parad sika, pati saray mamatatken a maaron aasikasoen daray pankaukolan mo’d espiritual. (Hebreos 13:7, 17) Manmatoor ed Dios, tan iyapasakey moy matam ed premyon bilay, a matalek ya agnasamsam itan na anggan say patey.​—Juan 5:28, 29; 17:3.

No manasagmak ka natan na pirmin kaermenan odino pirmi iran pakasalsali, “manmatale’ka ed Jehova ed simoon a pusom,” et agmabayag nasalatan so sinagem tan ir-irap na daakan a gayaga. (Uliran 3:5, 6; Juan 16:20) Onsublay so liket ed sinagem sano bendisyonan ka la na Dios a singa ginawa to’d Job. Say peles a paniirap so anggapo no ikompara ed tumang mo. (Ikompara so Roma 8:18.) Say matoor a panagsungdom so mamaseseg ed arum tan ontulong a mismo ed sika a bayuboan iray marakep a Kristianon kualidad tekep na “too a balo [balon personalidad, NW].” (Efeso 4:23, 24; Colosas 3:10, 12-14) Kanian, manpapakpel sirin ed makabat a simbawa nen apostol Pedro: “Kanian, saray napasegsegang unong ed linawa na Dios imatalek da ed sikato so kamarerwa ra unong ed matoor a Manamalsa, dia ed panggawa ra na kaabigan.”​—1 Pedro 4:19.

[Litrato ed pahina 23]

Magmaliw a singa si Job. Agbalot naandian na ilalo

[Litrato ed pahina 24]

Manmatalek ed si Jehova ed amin a pusom