Bilay ya Agkon Balot Nagbabawian

UNONG ED SALAYSAY NEN PAUL OBRIST

Nen 1912, sanen anemirak, inatey si Nanay sanen iyaanak toy komalima. Ngalngali duaran taon ed saginonor, sakey a marikit a katulong, si Berta Weibel so angasikaso ed pamilya mi. Sanen sikatoy inasawa nen Tatay diad tinmumbok a taon, malikeliket kamin ananak ta walaan kami la lamet na ina.

NANAYAM kami ed Brugg, melag a baley a mansasalitay-Aleman a parti na Switzerland. Si Berta so petepeteg a sakey a Kristiano, tan labalabay ko. Ginapoan ton inaral iray palapagan na Saray Estudyante na Biblia (Tastasi nen Jehova) nen 1908, insan to inabang ed arum so naaaralan to.

Nen 1915, kayarin impankasal di Berta tan Tatay, akila ak ed sikato diad impanbantay na say “Photo-Drama of Creation.” Sayan slide tan pelikula na Internasyonal ya Asosasyon na Masimoon Iran Estudyante na Biblia so nipaslep ed nonot tan pusok. Nandinayewan met itan na arum. Say bulwagan ed Brugg so napnapno ya insarado la na pulis iray puerta tan agto la pinaloob iray mansasbi. Kabekta et sinali na dakel so iloob ed akalukas a bintana diad panamegley na takayan, tan walay pigaran akaloob.

Say Maabig ya Alimbawa nen Nanay

Guerra Mundial I ni ed saman diad Europa, tan pansesgaan na totoo so arapen da. Kanian, say idalaw ed kabkaabungan tekep na makaligliwan mensahe na Panarian na Dios, a singa ed ginawa nen Nanay, so sakey a pandinayewan a kimey. No maminsan et abuloyan to ak a mila ed sikato, tan nanggayagaan ko iyan maong. Nen 1918, asabin nisimbolo nen Nanay so didikasyon to ed si Jehova a Dios diad bautismo ed danum.

Ag-akibabalian nen Tatay so panagdayew nen Nanay ya anggad inkabautismoan to, insan to la ginapoan a sumpaen. Sakey ya agew sininggaw toy literatura na Biblia nen nanay tan imbuntok to ed dalikan. Say asingkat labat nen Nanay et say Biblia to manlapud apuy. Balet ta say tinmumbok a ginawa to et makapakelkelaw. Inasinggeran toy Tatay tan nilakap to. Agton balot nansakitay linawa si Tatay.

Nikelkelawan, si Tatay so dinmeen. Balet, tunggal paminsan et ondangat so isusumpa, tan kaukolan min itepel iray isasanok to.

Trabaho tan Iyaaligwas ed Espiritual

Nen 1924, kayari impakasumpal na taloy-taon ya impansanay bilang sakey a managkatli, tinaynan koy abung pian mananap na trabaho ed mansasalitay-Pranses a parti na Switzerland. Lapud saya et apaaligwas koy panagsalita a Pranses. Anggaman say inyalis ko et medyo angamper ed iyaligwas ko ed espiritual, agkon balot abalang so panangarok ed katuaay Biblia. Kanian diad insempet ko kayari anem taon, inatendian koray miting ed Kristianon kongregasyon diad Brugg.

Ag-abayag kayari to et inmalis ak ed Rheinfelden, sakey a melag a baley a ngalngali 40 kilometroy kaarawi to. Nantrabaho ak ed hairdresser shop nen atsik tan nituloy so iyaaligwas ko ed espiritual diad pidaragup ko’d melag a grupo na saray Estudyante na Biblia. Sakey ya agew sanen mansumpasumpal lay pegley simban panagaral na Biblia et si Brother Soder, say matatken a mangaasikaso, so nantepet: “Siopay labay toy mibiang ed lawak a ministeryo no Simba?” Nanboluntaryo ak, ya iilaloan kon walay mangulop ed siak a mangisanay no panon a gawaen iman a kimey.

Sanen Simba la et akasabi kami’d teritorya mi, inkuan nen Brother Soder, “Si Mr. Obrist so mankimey diman.” Anggaman manparok a maong so pusok, ginapoan kon dalawen so totoo ed ayaman da tan intongtong ed sikara so nipaakar ed Panarian na Dios. (Gawa 20:20) Manlapulad saman a manpatuloy, agkon balot intunday panagpulong ya inkuan nen Jesus a nepeg a nasumpal sakbay na anggaan na sayan sistema na bengabengatla. (Mateo 24:14) Nen Marso 4, 1934, sanen mantaon ak na 28, insimbolok so didikasyon ko ed si Jehova a Dios diad bautismo ed danum.

Duay taon ed saginonor akaromog ak na trabaho bilang sakey a managkatli diad Lugano, sakey a syudad a mansasalitay-Italiano a parti na Switzerland. Ginapoan kon tampol ya ipulong so maong a balita diman, anggaman dagdaiset so amtak a salitan Italiano. Siansia, legan na inmunan Simba diad ministeryo, nipalimak so 20 bokletan awit-awit ko. Asabi panaon, atugyop koy pigaran interesado pian napormay sakey a grupo ed panaral na Say Panag-Bantayan. Diad kaunoran et dakel ed saraya so nampabautismo, tan nen Pebrero 1937 pinorma mi so sakey a kongregasyon na Tastasi nen Jehova diad Lugano.

Duay bulan ed saginonor, nen Abril 1937, akarisibi ak na sulat a biglan anguman ed bilay ko. Imbitasyon iman a manlingkor ak ed Bethel, a tawag ed sangan pasilidades na Tastasi nen Jehova ed sakey a bansa. Inawat kon tampol so imbitasyon​—desisyon ya agkon balot nagbabawian. Diad ontan et ginmapo ak la’d 60-taon a karera na sigpot-panaon a ministeryo.

Serbisyo ed Bethel ed Magulon Panaon

Diad saman a panaon say Swiss Bethel so walad syudad na Bern, say kabisira na Switzerland. Diman mi inimprinta iray libro, bokleta, tan magasin diad 14 lenguahe a nipapatulor ed intiron Europa. No maminsan et siak so mangawit na literatura ed istasyon na tren diad panamegley na karitelya, ta diad saraman a panaon et aliwan naynay a walaan kami na luluganan. Say inmunan asainmin ko diad Bethel et diad Composition Department, a tutuopen miray tinggay letra a pangisuboay iyimprinta. Ag-abayag et nantrabaho ak ed reception desk, tan, siempre, nanlingkor ak met bilang barbiro na pamilyan Bethel.

Nen Setyembre 1939, tinmerak so Guerra Mundial II, tan say panaglusob na Nazi so anaktakot ed intiron Europa. Say Switzerland so neutral a bansa ed pegley na manbabakal a nasyones. Diad inmuna et intuloy mi Kristianon aktibidad ya anggapoy isasalet. Insan, nen Hulyo 5, 1940, diad alas-dos na ngarem, legan a wala ak ed asainmin ko, sakey a sibilyan so pinmarisi, ya inulop na sundalon akasakbat na de-bayonetan paltog.

“Kawalaan nen Zürcher?” inyeyag na sibilyan. Si Franz Zürcher ed saman so manangasikaso na sanga ed panagpulong tayo’d Switzerland.

“Siopakayo?” intepet ko. Tampol da ak a dinegkem tan inggayugoy ed takayan, a papaawit ira’d opisina nen Zürcher.

Say intiron pamilyan Bethel​—sikamin amin so 40 ed saman​—so inganggan a mantitipon ed pananganan. Apatiran machine gun so niposisyon ed paway na bilding pian dismayaen so labay toy ontakas. Diad loob, ngalngali 50 sundalo so nansukisok ed bilding. Miduma ed iilaloan da, anggapoy aromog dan ebidensian mibabali iray Tastasi nen Jehova ed panreresisti ed serbisyo militar. Siansia, amayamay a literatura so kinompiska tan inala ran inkarga ed limaran trak na sundalo.

Sanen agmi impasuri so Say Panag-Bantayan ed saray walad pakauley na gobierno, nitunday panangimprinta na satan diad Switzerland. Kabaliksan na saya a dagdaiset a totoo so nakaukolan a mankimey ed Bethel, tan saray medyo ugugaw nin membro na pamilya so pinaseseg ya onalis pian manpayunir, a singa tawag ed Tastasi nen Jehova a sigpot-panaon a manpupulong.

Panagpayunir Legay Bakal

Nen Hulyo 1940, pinmawil ak ed mansasalitay-Italiano a parti na Switzerland ya asingger ed Lugano, a nanayaman ko sakbay na inkaakar ko ed Bethel. Sayan inmawet a Katolikon teritorya, a walad silong ed saman na mabiskeg ya impluensya na Fasismo, so nagmaliw ya asainmin ko bilang payunir.

Anggapo lawari agew ya agak sinita na polis ya itundak la kuno so panpupulong ko. Sakey ya agew legan a mitotongtong ak ed sakey a bii diad wangalan na hardin, sakey a lakin akasibilyan so anegkem ed siak a walad benegan ko, inyakar to ak ed kotsi na polis, tan inlugan ya amaarap ed Lugano. Diman to ak ya inyawat ed polisya. Sanen tinepetan ak, insalaysay kon si Jehova a Dios so angiganggan ed siak a manpulong.

“Dia ed dalin, sikami man-ganggan,” sipapasang ya inyebat na opiser. “Nayarin say Dios so mangiganggan diad tawen!”

Legan na bakal, importantin tuloy so itumbok ed konseho nen Jesus a “mankalkalakal kayo sirin a singa saray uleg tan mauyamo kayo a singa saray malapati.” (Mateo 10:16) Kanian, inyamot koray literaturak ed bulsa na polok. Tan pian naseguron anggapoy napaktak, nansulong ak na saray knickerbockers a mapitpitat ed leksab na pueg ko.

Asabin, akaawat ak na instruksion ya onalis ed lawak na Engadine, a siansia nin pipiamotanan ko ed polisya. Marakdakep iyan lawak diad mamabukig na Swiss Alps, a diad panaoy yelo et natabunay niebe, kanian impaipawit koray esquiar (ski) ko ta pian naliber ko so teritorya.

Makana iray panpapetang a guwantis sano manbibiahin aka-esquiar diad panaoy yelo. Lapud lanang kon uusaren itan, ag-abayag et apilat la. Alay pisalamat ko ta sakey ya agew et akaawat ak na agko inililaloan a sakey a balkot a nikoreo a walaay ginansilyon switer pati ed panpapetang iran guwantis! Sakey a Kristianon agin bii a datin kakongregasyon ko ed Bern so nanggawa ed saratan parad siak. Anggan natan sano nanonotan ko itan et talagan pisalsalamatan ko iman.

Dakel ya Apanggayagaan a Pribilihyo

Nen 1943, linmigen lay kipapasen ed Switzerland, tan atawag ak lamet a manserbi ed Bethel. Lapud pigaran problema ed mansasalitay-Pranses a kongregasyon diad Lausanne, a ngalngali 100 kilometro kaarawi to, niasain ak ya ombisita ed satan a syudad a regular ta pian tulongan iray manangipalapag a nawalaan na suston panmoria ed organisasyon na Dios.

Diad saginonor et nanlingkor ak bilang manangasikaso na sirkito ed amin a mansasalitay Pranses a kongregasyon diad Switzerland. Kasaksakbayan na simba, mankimey ak ni ed Bethel, balet usaren koy Biernes, Sabado, tan Simba ya ibisita ed nanduruman kongregasyon ed kada simba diad gunaet a natulongan ira ed espiritual. Niarum ni, sanen aporma so kongregasyon a mansasalitay-Pranses ed Bern nen 1960, nagmaliw ak a manangasikason manangimaton to. Pribilihyok itan ya anggad 1970, sanen say Bethel so niyalis manlapud Bern ed kaplesan a marakdakep a lugar to diad baley na Thun.

Maliket ak a makaromog na melag a grupo na mansasalitay-Italiano a Tastasi ed Thun, tan akikimey ak ed sikara. Ag-abayag et apormay sakey a kongregasyon, tan nanserbi ak bilang say manangasikason manangimaton to ed loob na dakel a taon ya anggad saray kalangweran ya agagin lalaki so kinmualipikan manakbat ed satan a responsabilidad.

Say ipapasen kon nagkalalo lan apanggayagaan a pribilihyo et say impakaatendi ed internasyonal iran kombension na totoo nen Jehova. Alimbawa, nen 1950 wala so agnalingwanan a Theocracy Increase ya Asamblea ed Yankee Stadium, New York. Say imbisita ed sankamundoan a hedkuarter na Tastasi nen Jehova ed Brooklyn, New York, so angitilak na magnayon ya impresyon ed siak. Agkon balot nalingwanan so paliwawa met nen Brother Milton G. Henschel ed tinmumbok a taon ed Clean Worship ya Asamblea ed London, Inglatera, ya angipabitar ed saray salita nen Jesus: “Kuan ko ed sikayo, a no saraya ag-ira komon onesel, saray bato maningal ira.” (Lucas 19:40) Intepet nen Brother Henschel, “Diad padisir yo et kaukolan ta niray baton onkelyaw?” Sankarengel ko ni ed layag koray eyag ya, “Andi!” a manlalapud sinamplon nilibon bosis.

Sanen pinmawil ak ed Bethel nen 1937, naamtaan nen tatay a melmelag labat so naaawat mi, tan maaburidon nantepet, “Anak, panon mon manbilay ed itatatken mo?” Inebatan ko diad impangaon ed saray salita na salmistan David: “Agko nin balot anengneng a say matunong et apaulyan, nisay saray bini to mipabpayabol na nakan.” (Salmo 37:25) Sarayan salita so talagan nasusumpal ed siak.

Alay liket ko a masulok lan 80 taon ed apalabas et akiasawa si Berta Weibel ed Tatay tan diad panamegley na alimbawa tan panangigiya to et akabatan ko si Jehova tan saray kualidad to! Anggaman arum ed kapamilyaan so nanmodmora ed sikato, sitotoor ton nilingkoran si Jehova anggad impatey to nen 1983. Agton balot angibalikas na pagbabawi ed impanlingkor to’d Dios, a Jehova; nisay nagbabawian ko so impansiansian walad-kasuloan tan itatalagay bilay ko ya intiraminti ed serbisyo ed si Jehova.

[Litrato ed pahina 25]

Mantratrabaho ed Bethel