Manleppua so Pusok ed Pisasalamat

UNONG ED SALAYSAY NEN JOHN WYNN

Agaylan mabetbet ya agko labay ya atendian iray miting na Tastasi nen Jehova! Mankuankuanan ak ya ansakit so eges ko odino ulok​—antokaman lad’tan pian agmiaral. Balet ta say inkamapekder na inak so lawas amasaew ed saratan a baraan, tan kamamangta et kaiba to ak met lanlamang a manaakar na taloran kilometro a paarap ed Kingdom Hall, ya ontatalineng legan ton isisingbat so Salitay Dios ed medyo akulaw lan kaiba.

ANGIBANGAT iya’d siak na importantin leksion: Kaukolan ya agbalot ontunda so atateng ed pagmaliw a mapekder, diad maaron dalan, nipaakar ed no antoy duga ed imaton na Dios. (Uliran 29:15, 17) Kaukolan ya agdan balot lilingwanan so madibinon panamilin ya ‘agpaulyan so saray panmumuyong tayo.’ (Hebreos 10:25) No nodnonoten koy bilay ko, misalsalamat ak a maong ta ginawa nen inak so sankaabigan parad siak!

Misalsalamat Parad Saray Maabig ya Alimbawa

Anggaman agmananisia so amak, maabuloy ed saray sisiaen nen Nanay sanen sikatoy nagmaliw a sakey ya Estudyante na Biblia, a singa tawag ed saman ed Tastasi nen Jehova. Nen 1913 et sikatoy linman dinmengel ed paliwawan “Beyond the Grave,” ya impaliwawa nen Charles T. Russel, say inmunan presidenti na Watch Tower Society. Balet, sikatoy atrasadon sinmabi, tan naukopaan lan amin so yurongan. Kanian sikatoy naimbitaan a miyurong ed arum niran atrasado diad abay na plataporma, ya asingsingger ed si Pastor Russel. Nandinayewan ton tuloy iman a paliwawa. Nipalapag itan ed tinmumbok ya agew diad lokal a peryodiko, tan sikatoy angala na sakey a kopya tan binasa ton aminpigapiga.

Kayari na miting et initer nen Nanay so kapirason papel ya akasulatay ngaran to, tan ag-abayag et sikatoy dinalaw na sakey ya Estudyante na Biblia. Kabekta, ginapoan toy mangibunog na saray tract ed Biblia ed kada puerta diad nianakan min baley na Gloucester, Inglatera. Nanlapulad ugugaw kami ni na duaran atsik, mimila kami la’d Nanay ed panagpulong a kimey.

Sanen si Harry Francis, maseseg ya Estudyante na Biblia, so inmalis ed Gloucester, sikatoy inabrasan maong nen Nanay. Agnambayag, sikatoy personal a nainteresan ed siak, tan say panamaseseg to so manunan sengegay impagmaliw kon payunir ed saginonor, a singa tawag ed saray sigpot-panaon a ministro. Say alimbawa nen Brother Francis so angibangat ed siak na importantin leksion: Kaukolan a lawas anapen na matatakken so dalan pian napaseseg iray malangwer.

Sanen nagmaliw ya Estudyante na Biblia so nanay ko, sikatoy inalig na arum diad Gloucester. Balet, arum ed mamatatken ed kongregasyon so angimanon maong ed inkasikaran dili, tan saray membro na klase​—a singa tawag ed saman ed kongregasyon​—so tinmumbok ed saray indibidual. Diad sakey a miting, pitapik na arum si Nanay, a pangitatageyen na lima to bilang suporta ed pigaran mamatatken. Balet amta nen Nanay ya agda nipapanengneng so dugan alimbawa, tan sikatoy agda natalagnaw. Diad satan a panaon, diad kaunoran iran dekada na 1920, dakel so sinmuawi ed kongregasyon tan kinmasipa la’d dalan na katuaan. (2 Pedro 2:22) Ingen, agbalot sinmuawi si Nanay manlapud sitotoor a pananuporta to’d organisasyon, sakey a maabig ya alimbawa’d siak.

Say Talindeg Ko ed Katuaan

Diad kaunoran, nen Hunyo 1939, sanen mantaon ak na 18, siak so binautismoan ed River Severn. Aturo ak met ed satan a taon bilang sound servant. Diad saraman ya agew et uusaren mi so baleg a transcription machine pian ipaknol ed panpublikon paspasen so mensahen “Say Relihyon so Sakey a Patit tan Panagswitik.” Say nidadanet ed saman a panaon et say panangiwalwal ed pansimpisimpitan tan palso iran bangat na Kakristianoan.

Aminsan et wala ak ed unaan na sakey a parada ya awit-awit so sakey a banderan diad arap to et mangiproproklama’d “Say Relihyon so Sakey a Patit tan Panagswitik” tan diad pagpag to et “Lingkoran so Dios tan say Kriston Ari.” Tumbo-tumbok so melag a kabayon walaay angkabaleg a karatula a nantupag a nisabit ed beneg to a mangiyaabawag ed publikon paliwawa. Agayla so nengneng na satan a parada diad mismon relihyoson syudad na Gloucester!

Anggaman ed kairapay pinansial diad abung, pinaseseg ak nen Nanay a manpayunir. Kanian, nen Setyembre 1939, diad inggapo na Guerra Mundial II, sinmabi ak ed inmunan asainmin ko bilang payunir diad Leamington, sakey a melag a baley ed Warwickshire. Baley iya na pigaran retiradon klerigo.

Inusar mi so anlemew a ponograpo diad panagkabkaabungan mi, ya ipapatugtog iray paliwawa nen Joseph F. Rutherford, presidenti nensaman na Watch Tower Bible and Tract Society. Diad biek a dapag, say transcription machine mi (a nauusar ed mas dakel a dumerengel) so mas ambebelat ni, tan ilulugan mi itan ed sakey a pram, odino karkariton a parad ugaw. No maminsan et sikami ablogen na saray klerigo ed sular da, lapud paningongotan day mensahen mangiwawalwal ed palson relihyon. Balet ta agkami adismaya. Benindisionan nen Jehova so kimey mi, tan natan et naromog ed Leamington so sakey a kongregasyon na masulok a sanlasus a Tastasi.

Nen 1941, diad kapetapetangan na Guerra Mundial II, inmalis ak ed Wales, a nampayunirak ed balbaley na Haverfordwest, Carmarthen, tan Wrexham. Bilang sigpot panaon a ministro, alibre ak la ed serbisyo militar, balet ta agnatalosan na totoo so neutral a talindeg mi. Kanian, sikamin sankaiba so inakusaan bilang espiya odino kakomplot na kalaban. Sakey a labi, pinaliberan na polis so trailer mi. Say kaibak, a kapkapanlapu ton nansuklar na oring, so tinmangulaw pian nengnengen no sioparay wadman. Napnoy oring so lupa to, tan parad saray polis et nengneng toy akaparaan lan onlusob. Kanian kaukolan mi itan ya ipaliwawa!

Mayamyaman kamin abendisionan ed saray asainmin mi. Aminsan, legan a wala kami’d Carmarthen, makapaseseg so imbisita’d sikami nen John Barr a nanlapud sangan opisina diad London (natan et membro lay Mananguley ya Ulop). Diad saman a panaon, duatduara so manangipalapag diad Carmarthen; diad kaplesan et wala lay masulok a sanlasus. Peles a walay taloran kongregasyon diad Wrexham, tan diad agano ni et apribilihyoan ak a mangidedika’d sakey a Kingdom Hall diad Haverfordwest.​—1 Corinto 3:6.

Misalsalamat Ak ed Ministeryok

Legan a wala kami’d Swansea, South Wales, say kaibak, si Don Rendell, so ag-alibre’d serbisyo militar. Sikatoy nipriso anggaman impaliwawa ton agnaawat na konsiensia to so pibakal sumpad kapara ton Kristianos ed arum a daldalin. (Isaias 2:2-4; Juan 13:34, 35) Pian sikatoy napaseseg, ontan met pian makapanpulong ed kakaabay, inkargak so transcription machine ya ag-arawi’d prisoan tan pinatugtog iray paliwawa’d Biblia.

Balet, aglabay iya na bibiin taga diman kanian angolekta iray kuarta diad impamaliber ed sombrero pian ibayar ed saray sundalon mangabil ed sikamin sankaiba. Inmalis kami, ya alay kuyat​—ya itutulak ko met so pram ya akakargaay transcription machine​—pian pasalimbengan ed Kingdom Hall. Balet sanen sinmabi kami diman, saya so akatalak! Maong ta dugarugan akibabali iray polis, a sikami akaliktar ed pirmin panagkabil.

Mabitar a nibalita iyan agawa. Kalabas na pigaran panaon, sanen manpupulong ak ed luyag ya asingger ed Swansea, maabobon ya imbaga’d siak na sakey a laki: “Say Inkakristiano so idedepensa yo, a singa ginawa na samay balolaki diad Swansea a sipapakpel ton improklama so sisiaen to tan kaukolan ya ombatik pian nasalimbengan.” Alay impakasurprisa to sanen naamtaan ton siak iman a balolaki!

Aliwan mainomay so panagpayunir ed saraman a taotaon na bakal. Anggapoy dakel a kaykayarian mi, balet ta aapresiaen tan panggagayagaan mi no antoy walad sikami. Lawas min naaawat so maparanay a suplay na espiritual a tagano, tan agmin balot sinaew so anggan sakey a miting, likud labat no mansakit kami. Analiw ak na daan lan bisiklita, tan pineketan mi na saray angkabaleg a baskit pian napanginan mi na ponograpo ontan met ed literatura na Biblia. No maminsan et bisiklitaen ko so 80 kilometro ed loob na sanagew! Nampayunir ak ed onliligada’d pitoy taon tan panlikliketan kon nodnonoten iraman ya agew.

Nen 1946, kayari impanampot na Guerra Mundial II, atawag ak a mankimey ed Bethel, bilang pananawag ed manunan pasilidades na Tastasi nen Jehova diad nankasikasikmat iran bansa a kawalaan da. Naromog nensaman so Bethel mi diad 34 Craven Terrace, ya asingger ed London Tabernacle. Nanggayagaan koy impilimog ed saray matatken lan wadman, a singa si Alice Hart a say ama to et si Tom Hart, a sinisian inmuna-unan tasi ed Inglatera.

Impakawalaan na Matoor a Kaiba

Nen 1956, pinmaway ak ed Bethel pian asawaen si Etty, sakey a payunir ya akabat ko sanen sikatoy sinmabin nanlapud Netherlands pian bisitaen so atsi to a manaayam ed London. Anggad kasampotay bakal, nambangat si Etty na panagmakinilya tan steno ed sakey a kolehyon pankomersiyo diad Tilburg, mamaabalaten na Netherlands. Sakey ya agew et inyopresi na sananey a maestro a manbansag iran mamisiklitan pasempet pian naseguroy pakasabi ton maligen. Sikatoy sakey a Romanon Katoliko. Sanen sinmabi ra, sikatoy akapitongtong ed saray Protestantin ateng nen Etty. Akapankakaaro ra, tan say maestro so mabetbet a nagmaliw a bisita ed abung da.

Kayarin tuloy na impanganggay bakal, linma iyan maestro ed abung di Etty, a mangikekelyaw, “Aromog ko lay katuaan!”

“Abaloan ko imbagam a wala lad sikay katuaan sanen Romanon Katoliko ka!” so inyebat na ama nen Etty.

“Andi!” so maligsan inyebat to. “Walad Tastasi nen Jehova so katuaan!”

Nausar iman a labi tan ed tinmumtumbok ni ed pirmin diskusyon ed Biblia. Agnambayag et nagmaliw a payunir si Etty. Diad ministeryo to et asagmak to met so ampait a panamasegsegang, a diad Netherlands et manlalapud Iglesia Katolika Romana. Guguloen na ugugaw, a sinugsogan na papari, so pitotongtong to sano onlan mankabkaabungan, tan aminsan et ginaygay day bisiklita to. Tinengteng toy bisiklita to ed manag-apiger ya angawat nensaman na sakey a bokleta manlapud sikato. Manlualua ton inkuan: “Nengneng moy ginawa na ugugaw!”

“O, agka onsusuko,” so mapangasin inyebat na laki. “Maabig so gagawaen mo. Sige, apigeren koy bisiklitam ya anggapoy bayar.” Tan ontan so ginawa to.

Aromog nen Etty a samet so panangiyansakit na papari ed saray pulok da anggad nigapo toy pangiyaral na Biblia ed sikara. Insan onliber iray papari tan mamadre pian pakapuyen so pananisia na totoo ed namparan Biblia tan ed si Jehova. Anggaman onia, nanggayagaan toy dakel a mabungan iyaaralan na Biblia.

Misalsalamat ed Pambibilay min Saniba

Kayari na kasal mi, niasain kami nen Etty ed panagbiahen kimey diad England, tan diad ngalngalin limay taon, binisita miray kongregasyon pian pabiskegen ira’d espiritual. Insan akaawat ak na imbitasyon ya onatendi’d koma-36 a klase na Gilead, a ginawa’d sankamundoan iran hedkuarter diad Brooklyn, New York. Say samploy-bulan a kurso, ya asumpal nen Nobyembre 1961, so nagkalautlan denisinyo pian ipasal iray lalaki a mangasikaso na kimey ed saray sangan opisina na Tastasi nen Jehova. Legan a wadman ak, nansiansia si Etty diad England ed London Bethel. Diad impangraduar ko, saniba kamin niasain diman.

Diad tinmumbok a 16 taon, nantrabaho ak ed service desk, ya aasikasoen iray pamaakaran a nipaakar ed saray aktibidad na kongregasyon. Insan, nen 1978, sanen inatey so manangasikasoy Bethel Home, si Pryce Hughes, siak so aturon onsalat ed sikato. Say impagmaliw a responsabli’d pankaabiganan na saray membro na ombabaleg a pamilya mi ed Bethel​—masulok kami lan 260 ed pamilya natan​—so makapatumang ya asainmin ed linmabas laran dakel a taon.

Nen 1971 et inatey so pinabpablik ya ina ed edad a 85. Pinmawil kami nen Etty diad Gloucester a miponpon, a ditan so maabig ya impangidalatdatan na sakey ya agi ed mangatatawen ya ilalo a gamoran nen Nanay. (Filipos 3:14) Misalsalamat ak ed maaron panangasikaso na saray atsik, di Doris tan Grace, ed si Nanay diad panaoy inkaakulaw to la, ya amasarag ed sikami nen Etty pian makapantultuloy ed sigpot-panaon a ministeryo.

Naynay min nononoten nen Etty iray atateng mi tan no panon da kamin pinabaleg ed ontan a maaro, mapekder a dalan. Alay kabaleg na otang a linawa mi’d sikara! Nagkalalo la ed inak ya angipanengneng na alay abig ya alimbawa ed siak tan ed saray agagik, a mamabayubo’d apresasyon mi parad si Jehova tan say organisasyon to.

On, manleppua so kapusoan mi ed pisasalamat legan min momolimolien so kada balon agew na serbisyo ed mangatatawen ya Ama tayo, si Jehova. Agaylan sikatoy makapakelaw, maaron Dios! Imbesngaw na salmista’d Biblia iray nalilikna tayo diad impangisulat toy: “Itandoro taka, Dios ko, O Arik; tan igalang ko so ngaran mo lawas lan lawas. Agew-agew ya igalang taka; tan idayew ko so ngaran mo lawas lan lawas.”​—Salmo 145:1, 2.

[Litrato ed pahina 26]

Kaibak so asawak, si Etty