“Siopa so Angilalak ed Saray Terter na Linaew?”

SAKEY a koma-19 siglon journalist so aneskribe ed saray linaew bilang “say likidon alahas na dalin, a pinorma na dagem.” Tinepetan na Manamalsa tayo so kadaanan a patriarkan si Job: “Siopa so angilalak ed saray terter na linaew?” (Job 38:28) Papanonotan na Dios si Job ed madibinon lapuan na mablin linaew.

Likud ed pankirlap, singa-alahas a dakep to, say linaew so nisisiglaot ed Biblia bilang bendision, inkabuna, inkadaakan, tan panangipreserbay bilay. (Genesis 27:28; Deuteronomio 33:13, 28; Zacarias 8:12) Legay ampetang, anggapoy uran a panaon ed Israel, “say linaew ed Hermon” so angipreserba ed tantanaman na dalin, tan diad ontan pati iray totoo to. Say matakel tan maniebi iran toktok na palandey Hermon so siansian mamapawala na alingasew ed labi ya ombabasa a mamoporma na pinasyan linaew. Inkompara nen salmistan David so pakarepreskoan a tarok na sayan linaew ed makapaliket ya eksperiensian panayam a pankakasakey kaiba iray kaparan managdayew nen Jehova.​—Salmo 133:3.

Saray bilin nen propetan Moises ed Israel et matamoy tan makarepresko, singa pelag na saray linaew. Inkuanto: “Say panangipaliwawak napelag naani a singa linaew; singa melag ya uran ed tapew na malangwer a dika.” (Deuteronomio 32:2) Natan, saray Tastasi nen Jehova so mangidedeklara ed manangiter-bilay a maong a balita nipaakar ed Panarian na Dios anggad saray sampot na dalin. (Mateo 24:14) Inanatnat na Dios so imbitasyon a: “‘Gala!’ Tan say napgaan, ondago: et say malabay, mangala ed danum na bilay ya andi-bayar.” (Apocalipsis 22:17) Minilyon a totoo na nasyones so mangaawat ed sayan opresin espiritual a pakarepreskoan a manlalapud Dios, a magnayon a makasustini ed bilay.