Sakey a Kimey a “Seguradon Mamaliing na Respeto”

SINIMBAWA nen apostol Pedro iray kapara ton Kristiano: “Masimpit komon so tongtongan yo ed utel na saray bugkalot, pian dia ed panalabutob da ed sikayo a singa managgawa na mauges nitandoro ra so Dios ed agew na idalaw to, lapu ed saray maong a ginawgawa yo a naimatonan da.” (1 Pedro 2:12) Diad loob na dakel lan taon et mapublikon nipapatnag na Tastasi nen Jehova diad Italya so ontan a maabig a kondukta. Diad prinsipyo na bilin nen Jesus ya ‘onbelyaw ed toktok na kaabungan,’ maparungtal dan gagawaen so amin a Kristianon kimey da, diad sigpot a pakanengneng na totoo. (Mateo 10:27; Juan 18:20) Bilang resulta, sanen impalapag na Italyanon abogado tan sakey a pari iray akusasyon a saray Tastasi nen Jehova et “sakey a mankuankuanan a relihyoson sekta” tan impibilang da ira’d “sekreto iran ulopan a mamapatit ed totoo,” deniside na Tastasi so mangidemanda makasengeg ed saratan a panagpauges.

Diad pilimeron bista, inkuan na korte ya anggapoy ley ya asumlang na abogado tan say pari. Balet, nen Hulyo 17, 1997, binalintukar na Venice Court of Appeals so inmunan desisyon na korte, ta aromogan a nankasalanan so duaran nidemanda. Oniay insalaysay na Court of Appeals: “Lugan na namparan impalapag iran artikulo a nakuekuestion iray balbalikas tan salita a talagan makaderal ed reputasyon na papatumbok na say relihyon na ‘Tastasi nen Jehova.’ Ompatnag a say getma na saray artikulo et pian pabandayen iray papatumbok to ed publiko.” Inkuan na korte a saray artikulo et “agmanitibukel na lehitimon panangagamil ed kanepegan na panagreport tan panagkritiko.” Pinanmulta na korte so duaran managpauges tan pinambayar da met ira ed amin a gastos na korte, a pati amin a ginastos na Tastasi a nisisiglaot ed impangidemanda ed namparan kaso.

Diad insulat a desisyon to, insalaysay na Venice Court of Appeals: “Dia lambengat ed namparan panangimpuersa tan panagprotekta ed amin a kanepegan ya inggarantiyay Konstitusyon [na Italya] a posibli so pakaamper ed saray nengneng na ag-inkamaabuloy tan relihyoson inkapanatiko.” Bibidbiren na desisyon a say kimey na Tastasi nen Jehova so aliwan insekreto nisay mankuankuanan a relihyoso. “Say pangibilang ed saray Tastasi ed saray sekreton ulopan,” impaimano na korte, “so agpanagrespeto ni ingen ed estandarte na maawaran a katuaan, lapud say nibabagan relihyon et wala la’d dakel a syudad tan say inkalapagan a panagkomberti a gagawaen na saray membro to, nagkalautla ed saray Simba tan arum nin piesta opisyal, so kabkabat tan seguradon mamaliing na respeto lapud saray sagpot a gagawaen, antokaman so isipen na sakey nipaakar ed doktrinan nipupulong.” Kanian, say rekord na maseseg a panagpulong tan napanuliranan a kondukta na Tastasi nen Jehova ed Italya so akatulong a mangekal ed panangidumaduma’d sikara.​—Mateo 5:14-16; 1 Pedro 2:15.