Kasin Nanonotan Yo?

Kasin maalwar mo lan kinonsidera iray agano nin paway na Say Panag-Bantayan? No ontan, naromog mon makapainteres so pannonot ed onggendan:

◻ Akin ya agmakatunongan so doktrinan kapalaran?

No amta lan inmuna na Dios tan inggetar to lay pankasalanan nen Adan, si Jehova sirin so nagmaliw a manangigapoy kasalanan sanen ginawa toy too tan sikatoy oneebat ed amin a karelmengan tan paniirap na too. Ag-iya nitunos ed katuaan a si Jehova so Dios na aro a manggugula ed karelmengan. (Salmo 33:5; Uliran 15:9; 1 Juan 4:8)​—4/15, pahina 7, 8.

◻ Bilang kasumpalan na Isaias 2:2-4, anto so gagawaen na totoo a manlalapud dakel a nasyones?

Diad idaragsa ra ed abung a panagdayewan ed si Jehova, agmet lara ‘manaaral na bakal,’ lapud insaral da lay kompiyansa ra ed proteksion na mangatatawen ya armada na Dios, ya akaparaan lan maneral ed amin a kabusol na kareenan​—4/15, pahina 30.

◻ Sioparay mabayani na Dios ya asaglawi ed Joel 3:10, 11?

Say tuan Dios so atawag a “Jehova na saray ehersito,” a manga 280 danay ed Biblia. (2 Arari 3:14) Sarayan ehersito et saray makapanyarin anghelikon sundalo ed tawen, ya akaparaan a manumpal ed pagagawa nen Jehova.​—5/1, pahina 23, 24.

◻ Anton leksion so naaralan tayo sanen kinaukolan nen Jehova ya ipikasi nen Job iramay nankasalanan ed sikato? (Job 42:8)

Sakbay na inyabig nen Job, kinaukolan nen Jehova a sikato so mangipikasi ed saramay akapankasalanan ed sikato. Mangipanengneng iya a kakaukolanen nen Jehova a perdonaen tayo iramay nankasalanan ed sikatayo sakbay a naperdona iray kasalanan tayo. (Mateo 6:12; Efeso 4:32)​—5/1, pahina 31.

◻ Antoy labay ya ibaga nen Santiago sanen inkuanto: “Paulyan yo komon so anos [“panagsungdo,” NW] a wala so ayadyarin gawa to”? (Santiago 1:4)

Walay kimey a susumpalen na panagsungdo, sakey a “gawa.” Apabtangan itan a pagmaliwen to itayon nagnap ed amin a pamaakaran. Kanian, diad pangiyabuloy ya onlabas iray pakasalsali ya agsasalien ya usaren so agmakasulatan a paraan pian panganggaen itan a tampol, nasubok tan napino so pananisia tayo.​—5/15, pahina 16.

◻ Akin a pinabayag ni na Dios so panolbar to ed saray problema na katooan?

Say panmoria nen Jehova ed panaon so midumaan ed panmoria tayo. Parad magnayon a Dios, say peryodo manlapud inkapalsa nen Adan anggad natan et anggapo ni ingey sakey simba. (2 Pedro 3:8) Balet antokaman so panmoria tayo ed panaon, kada agew ya onlabas et mas manasingger itayo ed “agew” na kiyalangon nen Jehova.​—6/1, pahina 5, 6.

◻ Anto so mamapakiwas ed Tastasi nen Jehova?

Say panangibangat nen Jehova so mamapawalay nikaduman totoo, abangatan a mangaro ed balang sakey tan ed kapara ran totoo a singa sikaran dili. (Isaias 54:13) Say aro so mamapakiwas ed Tastasi nen Jehova pian mantultuloy a manpulong anggaman ed agpananginenen odino isusumpa na totoo. (Mateo 22:36-40; 1 Corinto 13:1-8)​—6/15, pahina 20.

◻ Anto so labay ya ibaga na saray salita nen Jesus a: “Panpilitan yo so onloob ed pinto a mainget”? (Lucas 13:24)

Say labay ya ibaga na saray salita nen Jesus et pipupuligesgesan, ya isekar so inkasikatayo. Ipapabitar met na saray salita to ya arum so nayarin manggunaet lambengat ya ‘onloob ed pinto’ no kombinienti ira, diad mainawan paraan a labay da. Kanian itepet na balang sakey ed sikatayo, ‘Kasin onkikiwas ak tekep na inkamapeleng tan inkakuli?’​—6/15, pahina 31.

◻ Panon a saray napaoli et ‘naukom unong ed saray bengatla a wala a nisulat ed saray libro [“lukot,” NW] unong ed saray gawa ra’? (Apocalipsis 20:12)

Sarayan lukot et aliwan rekord na saray apalabas a gawa ra; sanen inatey ira et akalukpos lara ed saray nankasalananan da ed apalabas a bilay da. (Roma 6:7, 23) Balet, saray apaolin totoo so siansian nisilong ed Adamikon kasalanan. Sirin idadatak na sarayan lukot iray madibinon bilin a nepeg a tumboken na amin ta pian sigpot a nagunggunaan ed bagat nen Jesu-Kristo.​—7/1, pahina 22.

◻ Antoran leksion parad sikatayo so nilugan ed parabolo nen Jesus nipaakar ed manangiyansakit a Samaritano? (Lucas 10:30-37)

Ipapanengneng na parabolo nen Jesus a say peteg a maptek a too et aliwa lambengat a manguunor ed saray ganggan na Dios noagta mangaalig met ed saray kualidad to. (Efeso 5:1) Ipapanengneng to met a kaukolan a say inkamanangiyansakit et palumbasan toy amin a babeng lapud nasyon, kultura, tan relihyon. (Galacia 6:10)​—7/1, pahina 31.

◻ Anto so taloran pamaakaran a nayarin nakabisado yoy ananak yo tan makapangitaryay inaateng a panangiwanwan?

(1) Tulongan so ananak yon manpili na matukoy a klase na sekular a trabaho; (2) iparaan iran manalona ed emosyonal a desdes ed eskuelaan tan diad pantratrabahoan; (3) ipanengneng ed sikara no panoy pamenek da’d espiritual iran pankaukolan da.​—7/15, pahina 4.

◻ Anto so gagala na impanpainawa na Dios ed “komapito ya agew”?

(Genesis 2:1-3) Agnampainawa so Dios lapud ta naksawan. Imbes, sikatoy tinmunda manlapud mangaraldalin a panagpalsa ta pian abuloyan toy ginawa to ya ombulaslas tan sigpot a nigloria, ed kirayewan tan kigalangan to.​—7/15, pahina 18.

◻ Anto so taloran paraan a naagamil tayoy inkahustisya?

Unona, nepeg ya onkompormi itayo ed moral iran estandarte na Dios. (Isaias 1:17) Komadua, agamilen tayoy inkahustisya sano tratoen tayo so arum ed paraan a labay tayon pantrato nen Jehova ed sikatayo. (Salmo 130:3, 4) Komatlo, ipatnag tayo so maridios ya inkahustisya sano mapeleng tayon mibiang ed panagpulong. (Uliran 3:27)​—8/1, pahina 14, 15.