Say Bakal ya Aneral ed Koma-19 a Siglo

1914

MOMOLIMOLIEN so balon milenyo, insulat nen Charley Reese, kolumnista na peryodikon The Orlando Sentinel: “Agni angangga so 1914-18 a bakal ya aneral ed koma-19 siglo.” Antoy labay ton ibaga? Impaliwawa to: “Say awaran so ag-uuleyan na saray petsa. Say koma-19 siglo​—a naukeran bilang tugyop na saray sisiaen, palpalbeng, awawey tan moral​—so ag-angangga nen Enero 1, 1901. Nansampot itan nen 1914. Ontan met so inggapo na koma-20 siglo, a naukeran ed parehon paraan. . . .

“Amin lawarin panlalaban a panpapagaan tayo ed intiron bilay tayo so nanlapud saman a bakal. Nanlapu ed satan a bakal so ngalngali amin ya ebenton kipaakaray kaisipan tan kultura a pambibilayan tayo. . . .

“Padesir ko et satan so sengegay ontanlan inkaderal lapud binuyak toray sisiaen na totoo a nakontrol na totoo so kapalaran da. . . . Say bakal so nansengegay impangikaindan na totoo ed satan a sisiaen. Anggapo ed balang dapag so nanisip ya ontan so pansumpalan. Dineral toray imperyo na Britanya tan Pransya. Tinigway toy dakdakel a bilang na intiron kailalakan na saray Britano, Pranses, tan Aleman. . . . Diad antikey a panat na panaon, tinigway toy 11 milyon a totoo.”

Diad loob na masulok 120 taon, ituturo na Tastasi nen Jehova a say 1914 et anggaan na say tinawag nen Jesus ya “aturo iran panaon na saray nasyon.” (Lucas 21:24, NW) Diad satan met a taon, say apaoli tan niglorian Jesu-Kristo so nitrono bilang Ari na mangatatawen a Panarian. Diad panamegley na satan a Panarian, permanentin ekalen nen Jehova a Dios so amin a paniirap a nagagawa’d sayan siglo.​—Salmo 37:10, 11; Eclesiastes 8:9; Apocalipsis 21:3, 4.

[Picture Credit Line ed pahina 32]

U.S. National Archives photo