Dakel so Mangibabagan Walaan Iray Pananisia
“PANDINAYEWAN si Jesus! Talagan pankelkelawan!” so inkelyaw na sakey a relihyosan taga-Brazil. On, agniburi so pakayari na ngaran nen Jesus. Diad intiron awaran, sibubulos iray totoo ya anagmak na irap tan inatey nisesengeg ed sikato.
Nampulong ira di Pedro tan Juan ed “ngaran nen Jesus” diad Jerusalem. Makasengeg ed satan et sikaray inaresto tan sinisiplatan. Ingen sikaray “pinmaway ed arap na singbatan, a malikeliket ira lapud kinmana ra a nantepel na baing ed ngaran nen Jesus.”—Gawa 5:28, 41.
Si Antipas so sakey nin inmunan-siglon Kristiano ya amabli ed ngaran nen Jesus. Diad unor a libroy Biblia, say Apocalipsis, sikatoy tinukoy nen Jesus bilang “tasik, a matoor ko, ya inatey ed nanleleetan yo, dia ed panaayaman nen Satanas.” (Apocalipsis 2:13) Kaibay arum nin Kristiano ed Pergamo, ag-imburi nen Antipas so pananisia to’d si Kristo. Binmemben a malet si Antipas ed ngaran nen Jesus anggan diad kabalang ni ingen na mismon bilay to!
Ngalngalin kapalduan siglo ed saginonor, nen 155 K.P., sakey a mankuan a Kristianon manngaran na Policarpio so nipaarap ed mipadparan subok sanen ingganggan ya ayewen toy Kristo. Onia so inyebat to: “Walomplo tan anem a taon a manlilingkor ak ed Sikato, tan anggapoy ginawa Ton makapuy ed siak. Panon a nagawaan kon ayewen so Arik ya angisalba ed siak?” Lapud agto impangiburi ed si Kristo, pinoolan day Policarpio diad kiew.
Saray apostol, si Antipas, tan arum ni so mabulos ya amekder ed panagtasi ra nipaakar ed Kristo diad ipapatey! Komusta met iray totoo natan?
Say Ngaran nen Jesus Natan
Say ngaran nen Jesus so mantutultuloy a manasagyat na mabiskeg iran emosyon. Diad Latin America, agawa ed agano niran dekada so maples a tuloy ya idarakel na saray relihyon a mankuan a manisia ed si Jesus. Anggan diad saray sankamelagan a baryo et walay kapilyay Pentecostal. Ontan met, ombibiskeg so impluensiay politika ed saratan a relihyon. Alimbawa, diad Kongreso tan Senado na Brazil, 31 a puesto so inokupaan na saray membro na sarayan relihyon.
Si Jesus met so pangisesentroan na balon relihyoson pakurang ed Estados Unidos. Say tawag na saray membro ed inkasikara et Mananoor na Sipan. Inreport na Time magasin nen 1997 a say onaatendi ed saray miting da so inmatagey manlapud 4,200 nen 1991 anggad 1.1 milyon nen 1996. Onia so lugan na sakey ed saray himno to: “O pambiktorya ed si Jesus, say Manangilaban ko ed ando lan ando.”
Balet, aliwan amin a sentimenton ginawa unong ed ngaran nen Jesus et marakep. Mabetbet a walay pambabakal diad ngaran nen Jesus. Minamasaker iray Judio, napapapatey iray pagano, binabaldado, pinapairap, tan pinopoolan diad kiew iray sinmusunggay—amin iratan diad ngaran nen Jesus. Tan mas agano ni, balitado lay panginenegosyoy ebanghelyo. Amin na saya so mabanday, makapagula tan agmanepeg a panangusar ed ngaran nen Jesus tan ed tudtuan isisimbolo to!
Nagkalalo ni, papalesaen toy pigaran mitukoyan a tepet: Antoy nalalanor ed panisia ed ngaran nen Jesus? Tan antoy panmoria na Tastasi nen Jehova ed sayan pamaakaran? Ebatan na ontumbok ya artikulo irayan tepet.