“Say Nengneng Yo so Iilaloan na Dios a Pagmaliwan Tayo”

DIAD pikokoopera ed saray walad sekular a pakauley “nisengeg ed Katawan,” nailaloan na Kristianos a ‘napagalangan [bilang] managgawa na maong.’ (1 Pedro 2:13-15) Agni abayag et naeksperiensia iya na Tastasi nen Jehova ed Abalaten ya Aprika sanen agaway distrito kombension da ed bulwagan na sakey a college campus.

Diad inmunan agew na kombension, akaparaan laray guardia ed kolehyo ed kaslakan lan mapasnok tan agmitutulongan iran delegado, a singa naeksperiensia da la ed arum a nankokombension. Balet, lapud pilpilimero iyan pakapideneng da ed Tastasi nen Jehova, naeksperiensia ray marakep ya impakasurprisa!

Bilang kabiangay regular a panagtsek da ed saray lolooban, sinukisok na saray guardia so kada luluganan ya onloob tan ompaway ed campus. Nikelawan ira sanen sikaray imbano diad makaaro, maanos, tan marespeton paraan, anggaman say panagsukisok so sengegay pakaabala na saray delegado. Ag-agaway datin ireresisti, pisangsangan, tan abusadon panagsalita. “Aliwan singa saray arum a bisita,” kuan na sakey a guardia, “walaan kayo na inkamapaabeba tan inkapalna a napapatnagan min amin ed sikayo.”

Sanen naamtaan na hepe na saray guardia so kooperatibon kondukta na Tastasi nen Jehova, denesisyonan ton agla kaukolan so pansukisok ed saray luluganan “lapud,” inkuanto, “disiplinado kayon maong.” Bilang kasumpalan, saramay luluganan a walaay “JW” ya istiker parad panagparada so papalooben lan agla susukisoken.

Kayari na kombension, inkuan na hepe na saray guardia a diad agmanbayag et napinengnengan to lamet komon iray Tastasi. “Agkami nin balot akanengneng na ontan kadisiplinadon totoo,” inkuanto. “Say nengneng yo so iilaloan na Dios a pagmaliwan tayo.” Say ontan a komendasyon so lalon anagyat ed saray tuan Kristiano a ‘mansimpit komon,’ ta pian say totoo et ‘itandoro ra so Dios lapu ed saray maong a ginawgawa yo a naimatonan da.’​—1 Pedro 2:12.