Sankamundoan a Kareenan Panlapuan To?
ASIN say sankagloboan ya edukasyon tan relihyon so makapangitarok na sankamundoan a kareenan? Panpirpirawatan itan nen Dr. Robert Muller, datin katangbayan a sekretaryo-heneral na Nasyones Unidas tan say akaawat na 1989 UNESCO Prize for Peace Education. Unong ed inreport na peryodikon The Vancouver Sun, si Dr. Muller so “kombinsido ya amin ya estudyante ed intiron globo so nepeg a nibangat ed inkalapagan a tugyop na katuaan tan kaimportantian na planeta, sankatooan tan kaandi na karawalan.” Iisipen to so panaon sano diad intiron mundo et amin ya institusyon a panaralan so mangibangat ed ugugaw nipaakar ed NU bilang say sankaabigan ya ilalo parad kareenan. Panisiaan to met ya “amin a relihyon ed mundo so kaukolan a mimembro ed sakey a balon singa-NU ya organisasyon a tinawag ya United Religions,” so inreport na Sun. Diad ontan et “amin a bangat na relihyon so mangiyalibansa ed kaandi na karawalan.”
Nagawa ni kasi so sankamundoan a kareenan? Segsegurado! Balet aliwan diad panamegley na antokaman ya ahensia na too. Masulok a 2,700 taon lay apalabas, impaamta na sakey ya apuyanan a managsulat so atagtagey a lapuan na edukasyon parad kareenan sanen impasakbay ton say maptek-impanpuson totoo so “nibangat nen Jehova,” tan say kareenan da so magmaliw a “daakan.”—Isaias 54:13, NW.
Inkuan na Biblia a say Dios so ‘mangiiter na kareenan.’ (Roma 16:20) Anggan natan et nagagawa la so alay abig a sankagloboan a programa na edukasyon diad pangibabangat nen Jehova ed totoo to ya “anapen [da] so kareenan tan tumboken [da],” pian “pitpiten da naani so saray kampilan da,” tan agla ra “manaral na bakal.”—1 Pedro 3:11; Isaias 2:2-4.
Say panagdayew a niletneg ed katuaan, andiay pansimpisimpitan tan panamalikdo, so abobonan tan bendisionan na Dios. (Mateo 15:7-9; Juan 4:23, 24) Say tuan panagdayew labat, a sigpot a mitunosan ed Salitay Dios, so makapawalay totoo a manbilay ed kareenan tan pankakasakey tan walaan na puron aro ed balang sakey.—Juan 13:35.
Pian lalon naaralan so ibabaga na Salitay Dios nipaakar ed sankamundoan a kareenan, imbitaan mi kan mitalosan ed saray manangipalapag na sayan dyurnal.