“Panlayag ed Taew no Bagyo”

AGMO ta moriaen so ontan a pipapalaran bilang agpaborabli, inkamakulangkulang, tan pakarisgoan? Anggaman ontan, diad piguratibon paraan et impalaran na arum so inkasikaran dili ed ontan a situasyon. Panon? Oniay inkuan na koma-17 siglon autor a taga-Inglatera a si Thomas Fuller: “Agka onkikiwas sano sisasanok ka ni. Mipara itan ed panlayag ed taew no bagyo.”

Say ikiwas legan a walad kipapasen na agnapokpokan a sanok so walaay mapeligro iran pansumpalan. Pinekderan iya na sakey ya ebenton nikurit ed Biblia. Kinmiwas si Simeon, Levi, ananak na patriarka nensaman a si Jacob, lapud inkapasoot na agi ran bii a si Dina diad insalong dan walaay sanok ya ombales. Nansumpal itan ed palanit a panagpatey tan panaglimas. Agpankelawan no akin a kinondena nen Jacob so marelmeng a ginawa ra, diad impangikuanton: “Ginulo yoak, pinaingongot yoak ed saray totoo ed sayan dalin.”​—Genesis 34:25-30.

Sikakabat ya inrekomenda na Salitay Dios, say Biblia, so miduman kurang. Inkuanto: “Tundaan mo so petang na ulo, tan ikaindan mo so sanok: Agmo gonigonen so inkasika ed antokaman a mananangguyor ed panggawa na mauges.” (Salmo 37:8) Naamper so dakel a kasalanan sano tumboken itan a bilin.​—Eclesiastes 10:4; nengnengen met so Uliran 22:24, 25.