Kasin Nanonotan Yo?

Naapresia yo ta’n binasa so agano niran paway na Say Panag-Bantayan? Sirin, imanoen no naebatan yo so onggendan a tepetepet:

◻ Akin a say balikas nen Pablo ya ‘ibabaki a kasandi nen Kristo’ so matukoy parad alanaan iran Kristiano? (2 Corinto 5:20)

Diad inmuunan panaon, manunan nibabaki iray embahador diad panaon na saray gulo pian amtaen no kasin napugeray pambabakal. (Lucas 14:31, 32) Lapud say makasalanan a mundo na katooan so niarawi ed Dios, imbaki toray alanaan ya embahador to pian ipakabat ed totoo iray kondisyon to nipaakar ed pipupulangan, a papasesegen iran mikareenan ed Dios.​—12/15, pahina 18.

◻ Antoray apatiran bengatla ya amabiskeg ed pananisia nen Abraham?

Unona, indemostra toy pananisia to ed si Jehova diad intalineng to nen nansalita si Jehova (Hebreos 11:8); komadua, say pananisia to so maapit a misiglaotan ed ilalo to (Roma 4:18); komatlo, mabetbet ya akitongtong si Abraham ed si Jehova; tan komapat, inter nen Jehova ed si Abraham so suporta sanen tinumbok toy panangigiya na Dios. Saratan met a bengatla so mamabiskeg ed pananisia tayo natan.​—1/1, pahina 17, 18.

◻ Anto so kabaliksan na balikas ya “Agmo kami yakar ed katukso”? (Mateo 6:13)

Ikekerew tayo ed Dios ya agto abuloyan ya onsaew itayo sano natutukso itayon ontunganga ed sikato. Si Jehova so makapangigiya ed sikatayo ta pian ag-itayo naayat tan natalonggaringan nen Satanas, ‘say mauges a sakey’ (1 Corinto 10:13)​—1/15, pahina 14.

◻ Antoy nepeg a gawaen na sakey pian makaawat na panamerdonay Dios lapud gawan-mauges?

Say panangipatua ed Dios so nepeg a tekepay panagsibkel tan “bungabunga a manepeg ed pagbabawi.” (Lucas 3:8) Say magbabawin awawey tan say pilalek ya ipetek so lingo so mamakiwas met ed sakey ya onkerew na espiritual a tulong ed Kristianon mamatatken. (Santiago 5:13-15)​—1/15, pahina 19.

◻ Akin a panggunaetan so pagmaliw a mapaabeba?

Say mapaabeban too so maanos tan walaay andukey a panagtepel, tan agto ipasen so inkasikaton atagtagey. Say inkamapaabeba so mangayat na tuan kakaaro a mangaro ed sika. Mas importanti, mangitarok na bendision nen Jehova. (Uliran 22:4)​—2/1, pahina 7.

◻ Antoy pandumaan a tuloy na impatey nen Jesus tan say impatey nen Adan?

Manepeg labat so impatey nen Adan, lapud ginagala toy tinmunganga ed Manamalsa to. (Genesis 2:16, 17) Midumaan, say impatey nen Jesus so sigpot ya agmakanepegan, lapud “anggapoy ginawa ton kasalanan.” (1 Pedro 2:22) Kanian sanen inatey si Jesus, sikato so walaay bengatlan mas mabalor ya anggapo ed managkasalanan ya Adan diad impatey to​—say kanepegan ed ayadyarin bilay na too. Kanian say impatey nen Jesus et walaay masakripisyon balor ed karondon na katooan.​—2/15, pahina 15, 16.

◻ Diad mapropetikon pasingawey nen Ezequiel, antoy ililitrato na syudad?

Lapud say syudad so walad utel na naagamil ed karaklan (aliwan sagrado) a dalin, satan so mangaraldalin. Sirin, ompatnag a mangililitrato itan ed mangaraldalin ya administrasyon a mangungguna ed amin a manugyop na matunong a mangaraldalin a sosyedad.​—3/1, pahina 18.

◻ Akin ya inurasan nen Jesus so kasalian na saray babangatan to sanen seselebraay Paskua nen 33 K.P.?

Ag-angiletneg si Jesus na sakey a ritual a panag-uras na sali. Imbes, tutulongan toray apostol to a nawalaan na balon awawey​—bengatlan nipaakar ed inkamapaabeba tan inkamabulos a manggawa na sankaabebaan a kimey nisesengeg ed agagi ra.​—3/1, pahina 30.

◻ Diad panbabangat tayo ed arum, anto so nagkalalon importanti nen saray natural ya abilidad?

Saray kualidad a walad sikatayo tan saray niyugali tayo ed espiritual a nayarin aligen na iyaaralan. (Lucas 6:40; 2 Pedro 3:11)​—3/15, pahina 11, 12.

◻ Panon a napaaligwas na saray espiker ed publiko so panagbasa ra ed Kasulatan?

Diad panangipasal. On, diad paulit-ulit a panbasan maksil anggad marmarlas la ra. No wala ed lenguahe yo iray audiocassette na Biblia, makabat so italineng ed panangidanet na managbasa tan ed panangidumadumay bosis tan imanoen no panon a nibalikas iray ngaran tan nikaduman salita.​—3/15, pahina 20.

◻ Panon a ‘say espiritu so ompawil ed Dios’ sano ompatey so too? (Eclesiastes 12:7)

Lapud say espiritu et say puersa na bilay, satan so ‘ompawil ed tuan Dios’ diad pantalos ya antokaman ya ilalo na satan a too ed arapen a bilay so intiramintin mandedependi la natan ed Dios. Say Dios lambengat so makapangipawil ed espiritu, odino puersa na bilay, a mamabilay lamet ed too. (Salmo 104:30)​—4/1, pahina 17.