Pakaaral ed Matalonggaring a Paraan na Aro

Kosovo, Lebanon, tan Ireland. Saraya so bansan mabetbet a nibalita ed agano niran taon. Impaslep na saratan ed saray nonot na totoo iray eksena na panagpaagus na dala, panagbomba, tan panagpatey. Siempre, agla iderlaw iray marawal a balingaan lapud relihyon, rasa, etniko, odino arum niran siblangan. Diad tua, saray awaran so atatek na saratan, tan angitarok iratan na agnadeskriben paniirap na katooan.

DIAD pakakaimanon walaray bakal ed intiron awaran, dakel so mangibabagan saray bakal et talagan agnapaliisan tan natural labat parad totoo so panggugulaan. Balet, saratan a panmoria so sigpot a misumlangan ed saray bangat na Salitay Dios, say Biblia. Malinlinew ya iyaabawag na Biblia: “Say agmangaro agto kabat so Dios; ta say Dios sikato so aro.” (1 Juan 4:8) Malinew a kaliktan na Manamalsa a manaaroan iray totoo.

Ipaparungtal met na Biblia ya apalsa so too unong ed indengan na Dios. (Genesis 1:26, 27) Kabaliksan na saya a naikdan so katooan na kapasidad a mangisindag ed saray kualidad na Dios, a say sankamanunaan et say aro. Anta onia so kipapasen, akin a saray totoo et sinmaew a tuloy ed panangipanengneng na panaaroan ed intiron awaran? Lamet, itatarya na Biblia so aralem a pakatalos. Satan so lapud, say inmunan paris na too, si Adan tan Eva, so nanrebeldi ed Dios tan nankasalanan. Bilang resulta, amin ya ilalak da so akatawir na kasalanan tan ag-inkayadyari. Isasalaysay na Roma 3:23: “Amin nankasalanan, tan makulang ira ed gloria na Dios.” Say inter na Dios ya abilidad tayon mangaro so aderal diad impakatawir tayo ed kasalanan tan ag-inkayadyari. Kasin kabaliksan na saya a saray totoo et aglan balot makapanaaroan? Anto so walan ilalo a napanggayagaan tayo ni so mareen, maaron siglaotan ed kapara tayon totoo?

Nepeg Tayon Aralen ya Aroen so Dios

Amta nen Jehova a Dios ya anggaman ag-ayadyari so totoo, siansian makapangipanengneng na aro so katooan. Satan no akin a kakaukolanen to ed amin a malabay a mamaliket ed sikato a mangipatnag na aro ed anggaay nayarian da. Sayan kakaukolanen so impalinew na Anak na Dios, si Jesu-Kristo, sanen intepet ed sikato no antoy sankabalgan a kakaukolanen ed Ganggan ya inter ed Israel. Inkuanto: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo. Sikato ya so baleg tan unonan ganggan.” Insan inyarum to: “Say komadua a mipadpara ed sikato saya, Aroen mo so kaparam a too unong ed sikan dili. Dia ed sarayan duaran ganggan so pansaksabitan na amin a katunongan.”​—Mateo 22:37-40.

Balet, ipasen na dakel a totoo a magmairap ya aroen so sakey ya agda nanengneng, tan sikatayon totoo so agmakanengneng ed si Jehova a Dios lapud sikatoy sakey ya Espiritu. (Juan 4:24) Siansia, sikatayoy apektado ed inagew-agew diad panamegley na gagawaen na Dios, ta akadependi itayon amin ed dakel a maabig iran bengatla a pinalsa to parad kagunggunaan tayo. Impabitar nen apostol Pablo iyan katuaan sanen inkuanto: “[Say Dios] agto kinaindan ya anggapo so makatasi ed sikato, a nanggawa na maong, tan initdan to kayo na saray uran a nanlapu ed tawen tan mabunga a panaon, a pinano to so saray kapusoan yo na tagano tan gayaga.”​—Gawa 14:17.

Anggaman nagugunggunaan so amin manlapud saray probisyon na Manamalsa ed nanduruman paraan, pigpigara labat so misalsalamat ed sikato odino napapakiwas a misalamat ed sikato. Kanian, kaukolan tayon repasoen so amin a maabig iran bengatla a ginawa la na Dios ed sikatayo tan dalepdepen iray makapakelkelaw a kualidad a napatnagan ed amin a gagawaen to. Diad panggawa ed satan, sarag tayon tebeken so makapakelkelaw a kakabatan tan pakapanyari na Engranden Manamalsa tayo. (Isaias 45:18) Nagkalalo ed amin, ontulong itan ed sikatayo pian natalosan a sikatoy maar-aron Dios, ya agto tayo lambengat inikdan na bilay noagta pinagmaliw to met a posibli parad sikatayo a panggayagaan so dakel a makapaliket ed bilay.

Alimbawa, isipen pay dakerakel a nanduruman mararakep a rosas a pinalsa na Dios ed dalin. Agaylan makapakelaw parad sikatayo ya inikdan to itayo met na abilidad a makatebek tan makagamor na baleg a liket manlapud sarayan mararakep a bengatla! Mipadpara, intarya na Dios so amin a nengneng na masustansian tagano a kanen tayo. Agaylan sikatoy manonot a pinalsa to itayo met a walaan na pakataway ta pian napanggayagaan tayoy mangan! Agta saraya so malinew a paneknek a talagan aaroen itayo na Dios tan sankanonot toray pankaabigan tayo?​—Salmo 145:16, 17; Isaias 42:5, 8.

Likud ed impangipaamta to’d inkasikato diad panamegley na “libro na palsa,” ipapanengneng met na Manamalsa no anton klase so inka-Dios to diad panamegley na Salita to, say Biblia. Saya so lapud nikurit ed Biblia so dakel a maaro iran bengatla a ginawa nen Jehova a Dios nensaman tan say dakerakel a bendision ya insipan ton iter ed katooan diad magano lan arapen. (Genesis 22:17, 18; Exodo 3:17; Salmo 72:6-16; Apocalipsis 21:4, 5) Nagkalalo ed amin, ipaparungtal na Biblia ed sikatayo so sankabalgan a pakapatnagan na panangaroy Dios ed katooan​—say impangiter toy bogbogtong ya Anak to a magmaliw a Mananondon tayo pian nibulos itayo manlapud panangaripen na kasalanan tan patey. (Roma 5:8) On, no lalon naaralan tayoy nipaakar ed maaron Manamalsa tayo, lalon napakiwas itayo a mangaro ed sikato manlapud puso tayo.

Aralen so Pangaro ed Kapara Tayon Totoo

Singa impabitar nen Jesus, niarum ed panangaro ed Dios tekep na intiron puso, kamarerwa, tan nonot tayo, nepeg tayo ya aroen so kapara tayon totoo a singa sikatayon dili. Diad tua, say aro na Dios so mangobliga ed sikatayo ya aroen so kapara tayon totoo. Insalaysay nen apostol Juan: “Inararok ira, no say Dios ontan so impangaro to ed sikatayo, nepeg met a manaaroan so sakey tan sakey ed sikatayo.” Insan oniay indanet to ni: “No wala so mankuan, Aroen ko so Dios, tan busolen to so agi to, sikato so matila: ta say agmangaro ed agi to, anta anengneng to, agto nayarian ya aroen so Dios ya agto anengneng. Tan saya a ganggan so wala ed sikami a nanlapu ed sikato ta say mangaro ed Dios aroen to met so agi to.”​—1 Juan 4:11, 20, 21.

Natan et manbibilay itayo la ed mundo a maslak ed totoo so mangipapanengneng na siak-ni ya ugali, bilang ‘maaro ed saray lamalaman da,’ a singa impasakbay na Biblia. (2 Timoteo 3:2) Sirin, no labay tayon naaralan so matalonggaring a paraan na aro, kaukolan tayoy mangisekar na masimoon a sagpot a pasimbaloen so kanonotan tayo tan aligen so maaron Manamalsa tayo, imbes a tumboken so sinisiblet iran dalan na totoo ed inkalapagan. (Roma 12:2; Efeso 5:1) Say Dios so “mapangako [ni ingen] ed saray malamang tan mauges,” tan “pabutayen to so banwa to ed saray mauges tan maong, tan papelagen toy uran ed saray matunong tan aliwan matunong.” Lapud say maaron mangatatawen ya Ama tayo et mangipapanengneng na ontan ya alay abig ya alimbawa parad sikatayo, nepeg tayon pambanikelan so pagmaliw a mapangasi tan matulong ed amin. Diad panggawa ed satan, napaneknekan tayoy inkasikatayon ‘ananak na maaron mangatatawen ya Ama tayo.’​—Lucas 6:35; Mateo 5:45.

No maminsan saratan a maaron gawa so manresulta ed pakatulong ed totoo a magmaliw a managdayew ed tuan Dios. Pigaran taon lay apalabas sakey ya asawan bii a sakey ed Tastasi nen Jehova so nanggunaet a manginabang ed mensahe na Biblia ed kaabay to, balet ta sikatoy impungitpungit da. Balet, sikatoy ag-adismaya ed inkiwas. Imbes, intultuloy ton impanengneng so kamaongan tan nanggunaetan toy magmaliw a matulong ed kaabay. Aminsan et tinulongan toy kaabay ton onalis ed sananey ya abung. Diad sananey lamet a panaon et impaibaan toy kaabay to ed airport pian abeten iray kakanayon to. Saginonor, inawat na kaabay so panagaral na Biblia tan diad kaunoran et nagmaliw a maseseg a Kristiano anggaman ed pirmin panamasegsegang na masiken to. On, saraman a panangipatnag na aro so angiletneg na pundasyon parad andi-anggaan iran bendision.

No matua itayo nipaakar ed satan, aksobien tayo a say aro na Dios ed sikatayo et aliwan lapud walaan itayo na daakan a makapadinayew iran kualidad. Diad kasunian, aaroen to itayo anggaman dakel iray kakabusan tan kakulangan tayo. Lapud ontan, nepeg tayo met ya aralen ya aroen so kapara tayon totoo anggaman ed dakel iran kakulangan da. No ipasal tayoy inkasikatayo a manebek tan mamabli ed maabig iran kualidad na arum imbes ya onnengneng ed saray kakabusan da, naimano tayon mas mainomay so pangaro ed sikara. Say nalikna tayo ed sikara et palumbasan to ni ingen so aro ya inuleyan na prinsipyo tan mangilaktip ed maligsan panangaro tan lugor a niwawala ed maapit a sankaaro.

Abuloyan ya Ombulaslas so Aro Yo

Say aro tan pikakaaro so kaukolan a bayuboan, tan arum ed importanti iran kabiangan na saya et say inkamasimoon tan inkamatua. Arum so mangiyaamot ed saray kakulangan da ta pian napansiansia ra so paborablin impresyon ed totoon labay dan nakaaro. Balet, satan a kurang so mabetbet ya ompuktal, legan a naiimano na arum ed kaunoran iray katuaan tan nadismaya lapud satan ya ag-inkamatua. Sirin, nepeg ya ag-itayo ontakot a naamtaan na arum no anton talaga itayo​—anggaman walaan itayo na saray kakulangan a pambabanikelan tayon talonaan. Saya so ontulong ed kiletneg na pikakaaro ed sikara.

Singa bilang, sakey ya akulaw lan Tasi ed sakey a kongregasyon diad Arawin Bukig so abebay aral to. Ingen, agton balot inyamot itan ed arum. Alimbawa, prangkan inaksobi to ya agto nayarian ya idemostra ed arum no panoy pangamta manlapud saray propesiya tan awaran na Biblia a say Panaon na Gentil so anampot la nen 1914.a Balet, sikatoy angipanengneng na maabig ya alimbawa ed seseg ed ministeryo, ontan met ed panangaro tan inkamabunlok ed agagi, a sikatoy simamaaron natutukoy bilang pinabpabli ed kongregasyon.

Diad arum a kultura, say mapalaway a pangipanengneng na aro so pakapatnagay agpanlabay; nababangatan iray totoo a mangipatnag na pormal a panamagalang diad pidedeneng da ed arum. Anggaman lawas a maabig so pagmaliw a magalang tan makonsidera, nepeg ya agtayo abuloyan so inkamapagalang tayo a mangamper odino manebel ed sikatayo ed pangipanengneng tayoy liknaan tayo ed arum. Ag-imbaing nen Jehova ya ibaga so panangaro to ed pinili ton totoo, say kadaanan ya Israel, a kuanto ed sikara: “Aroen ta ka ed maando a panangaro.” (Jeremias 31:3) Mipadpara, inkuan nen apostol Pablo ed saray kapananisiaan to ed Tesalonica: “Maibibeg kamin mangaro ed sikayo, apaliket kamin tuloy a mangipanabang ed sikayo, na aliwan say ebanghelyo na Dios labat, noag met saray dilin kakamarerwa mi, ta nagmaliw kayo a sankablian ed sikami.” (1 Tesalonica 2:8) Kanian leleg tayon panggugunaetan a bayuboan so puron panangaro ed kaparan totoo, nagkalalon mitunosan itan ed bangat na Biblia ya abuloyan iratan a liknaan a nibalikas ed natural a paraan imbes a pukoken.

Kakaukolanen so Mantultuloy a Sagpot

Tuloytuloy so pakaaral a milikna tan mangipanengneng na panangaro ed arum. Say panggawa ed satan et mankakaukolan na pirmin sagpot ed biang tayo lapud kaukolan tayon impasyan pankimeyan a talonaan so mismon agtayo inkayadyari ontan met panresisti ed mabiskeg ya impluensia na andiay aron mundo. Anggaman ontan, say mayaman a tumang ya itarok na saya et pagmaliwen ton talagan makabaliksan.​—Mateo 24:12.

Anggaman ed sayan ag-ayadyarin mundo, napanggayagaan tayoy apaaligwas a siglaotan ed kapara tayon totoo, a manresulta ed baleg a gayaga, kareenan, tan kapenek tayo tan ontan met ed arum. Diad panggawa ed satan a sagpot, napaneknekan tayoy inkasikatayo a makana ed makapakelkelaw ya ilalon pambilay ya ando lan ando ed balon mundo na Dios. Nagkalalo ed amin, diad pakaaral ed matalonggaring a paraan na aro, nagamoran tayoy abobon tan saray bendision na maaron Manamalsa tayo, natan tan ed ando lan ando!

[Paimano ed leksab]

[Saray litrato ed pahina 10]

Nipanengneng so Kristianon aro diad saray gawa na kamaongan

[Picture Credit Line ed pahina 8]

UN PHOTO 186226/M. Grafman