Akapanpakpel Ira

ALIWAN mainomay a naynay so pakapanpakpel pian makapanpulong. Diad tua, inkuan nen apostol Pablo a diad aminsan ya inkagawa et ginawa to itan “tekep na pirmin pibabarangkaan.” (1 Tesalonica 2:2, NW) Kasin makagungguna so ‘pibarangkaan’ diad panagpulong? Anggapo so pakagarantiyaan a walaray makapakelaw a naeksperiensia, balet mabetbet a maliket iray totoo na Dios lapud makapanpapakpel ira. Konsideraen so pigaran alimbawa.

Sakey a waloy-taon ya ugaw a bii a manngaran na Tara so dinmengel a maong legan a totongtongen na maestra to ed loob na klase ra so nipaakar ed agawa nen legan na Guerra Mundial II, a nakaukolan ya ipeket na saramay Judion nipangaw ed kampon panamairapan so sakey a duyaw a Bitewen nen David diad kawes da pian nabidbir ira. Nanumamengan nen Tara no kaukolan to kasi so mansalita. “Nampikasi ak ya akamulagat,” so anonotan to. Insan intagey to so lima to tan imbaga to a saray Tastasi nen Jehova so nipangaw met ed saraman a kampo, tan nakaukolan dan ipeket so lilan trianggulo ed kawes da. Naninteres so maestra tan akisalamat ed si Tara. Lapud komento nen Tara, nilukas so dalan parad kaaruman nin diskusyon a kaibay maestra, ya impabantayan to ni ingen ed intiron klase to so videon Jehovah’s Witnesses Stand Firm Against Nazi Assault.

Diad Guinea, Sagur ya Aprika, labay na sakey a malangwer nin agbautismadon manangipalapag a manngaray Irène so onaligwas ed ministeryo to. Say misionaryon angiyaral ed sikato na Biblia so amaseseg ed sikato a salien toy mangipalima na saray magasin a Watchtower tan Awake! ed saray kaeskuelaan to. Masuyat si Irène lapud ag-ondengel iray kaklase to. Balet, lapud apakiwas ed panamaseseg na misionaryo, pilimeron inasinggeran nen Irène so estudyante ya ompatnag a sankamasumpaan. Diad inkasurprisa nen Irène, dinmengel so bii tan interesadon angawat ed saray magasin. Ontan met so ginawa na arum ya estudyante. Mas dakel so nipalima nen Irène ed saman a bulan nen samay nipalima to ed akadkaunan limaran bulan no pantetekepen.

Diad Trinidad, masuyat a maong so sakey a matatken ya onasingger ed principal na sakey ya eskuelaan pian ipanengneng to’d sikato so edukasyonal a kablian na magasin ya Awake! Anggaman kuan, sikatoy akapanpakpel. Inkuanto: “Nampikasi ak legan ya onloloob ak ed compound. Mankelkelaw ak sanen agaylay abig so impangawat na principal.” Inawat to so magasin ya Awake! a nipaakar ed “What Hope for Today’s Youths?” tan inmabobon ni ingen a mangusar ed satan diad klase to. Manlapula’d saman, sikatoy akaawat la na 40 a magasin a manasaglawi ed nanduruman isyu.

Bilang tobonbalo, nanairapan si Vaughn a manpulong. “Mannerbiyos ak, manlinget iray dakulap ko, tan mapmaples ak a mansalita​—agko naitantan.” Anggaman kuan, sikatoy nagmaliw a sigpot-panaon a ministro. Siansia, aliwan mainomay ed biang to so makpel a pansalita. Aminsan, kayari na sanagew a makapadismayan panaanap toy trabaho, labay ton pulongan so sakey a walad tren ed subway, “ta pian wala met so maabig a nagawa ed saman ya agew a makapadismaya.” Balet sikato so tinmalaw ed saray akadesentin negosyante a wadman ed tren. Diad kaunoran, sikatoy akapanpakpel ya akitongtong ed sakey a masiken ya abay to. Nanresulta itan ed andukey ya impantongtong. “Balibali iratay tepet mo bilang sakey a kalangweran,” so inkuan na negosyante, insan nantepet, “Sakey kan teologo?” Inmebat si Vaughn, “Andi, sakey ak ed saray Tastasi nen Jehova.” “Manaya,” insan inmimis so laki. “Natan, atalosan ko la.”

Amin na sarayan Tastasi​—tan dakerakel ni​—so malikeliket lapud akapanpakpel ira diad panagpulong. Ontan met kasi so gawaen mo?

[Litrato ed pahina 25]

Tara

[Litrato ed pahina 25]

Vaughn