Ibabaki na Gilead Iray Misionaryo “Angga ed Sankaarawian a Parti na Dalin”
MASULOK lan kapalduan siglo natan a mangibabaki so Watchtower Bible School of Gilead na saray misionaryo. Nen Setyembre 11, 1999, nangraduar so koma-107 a klase na Gilead. Tugyopen itan na 48 estudyante a nanlalapud 11 a bansa, tan saraya so niasain a manserbi ed 24 a nanduruman daldalin. Sikaray napibilang ed nilibon arum nin misionaryo, a walaan na makabkabaliksan a betang diad panusumpal ed unor iran balikas nen Jesus sakbay a tinmokotok ed tawen. Impasakbay to a saray babangatan to so “magmaliw a tastasi [to] . . . angga ed sankaarawian a parti na dalin.”—Gawa 1:8, NW.
Say programa ed pangraduar, a sankaunaan ya agawa diad Watchtower Educational Center ed Patterson, New York, so apaneknekan ya engranden okasyon diad marakdakep a kaliberliber. Malikeliket iray mangraduar ya estudyante ed inyatendi na saray kakanayon, maapit a kakaaro, tan saray bisita. Walay dagup na inmatendi ya 4,992, kalaktip la iramay dinmengel tan akabantay diad panamegley na audio tan video ya inkokonekta diad saray complex na Brooklyn tan Wallkill.
Sitotoor a Panlingkoran si Jehova tan Kaparan Totoo
“Siopa so Walad Dapag nen Jehova?” Satan so tema na manangilukas iran komento nen Carey Barber, membro na Mananguley ya Ulop tan tsirman ed programa ed pangraduar. Impaliwawa to a saya so problema a nidungetan na saray Israelita ed panaon nen Moises. Apanonotan iray mangraduar ya estudyante tan saramay inmatendi a dakel ed saray Israelita so inatey ed kalawakan lapud ag-ira nansiansian matoor ed dapag nen Jehova. Kayarin akalotan ed panag-idolatriya, sikaray ‘inmirong ya angan tan inminum, insan ira inmalagey a nanggagalaw.’ (Exodo 32:1-29) Ontan met a kapeligroan so impasakbay nen Jesus ed saray Kristiano: “Manlikas kayo ed inkasikayo ompan saray puso yo napano ed inkasiba, tan panagbuek, tan saray kapagaan ed sayan bilay, et onsabi ed sikayo ed kasanlilikna so saman ya agew a singa sakey a patit.”—Lucas 21:34-36.
Say tinmumbok a nansalita, si Gene Smalley, na Writing Department, so tinmepet ed saray mangraduar ya estudyante: “Kasin Paneknekan yo a Magmaliw Kayon Paregoric?” Impaliwawa to a say Griegon salitan pa·re·go·riʹa so inusar ed Ingles bilang pananawag ed tinimplan tambal a panagpakepa. Balet, inusar nen apostol Pablo iyan makabaliksan a Griegon salita diad Colosas 4:11 pian deskribien iray kakimeyan to. Diad New World Translation, sayan salita so nipatalos a “manamabiskeg a tulong.”
Diad saray asainmin da, saray mangraduar a misionaryo so nayarin magmaliw a modernon-agew iran paregoric ed realistikon paraan diad sipapaabeban pagmaliw a manamabiskeg a tulong ed saray lokal ya agagi tan diad pangipatnag na kooperatibo tan maaron walna diad pililimog ed saray kapara ran misionaryo.
Si Daniel Sydlik, membro na Mananguley ya Ulop, so tinmumbok a nansalita ed teman “Say Binmalitok a Ganggan a Tumboken.” Impaliwawa to a say nitandoron prinsipyo ya indatak nen Jesus diad Mateo 7:12, “amin a bengatla . . . a labay yo a gawaen na totoo ed sikayo, ontan so gawaen yo met ed sikara,” et sasaglawien toy panggawa na maabig iran bengatla parad arum, aliwan say agpanggawa lambengat ed makapasakit.
Pian matalonan nagawaan iya, walay taloran kakaukolanen: pakatebek, panangabagey, tan inkamatulong. Diad impanegek et inkuanto: “No nalikna tayoy pilalek ya ontulong, kaukolan ya ontulong itayon tampol. Kaukolan tayoy mansagpot pian gawaen ed arum so labay tayon gawaen da ed sikatayo.” Nagkalalo lan tua iya ed saray misionaryo ya onla ed arum a daldalin pian ontulong ed totoo a mangagamil na tuan Inkakristiano.
Angiter Iray Instruktor na Maligsa Iran Panonot
Pinaseseg nen Karl Adams, instruktor ed Gilead, iray mangraduar a misionaryo a “Mantultuloy ya Ombulaslas.” Diad antoran pamaakaran? Unona, diad pikakabat tan ed dunong a pangusar a maong ed satan. Diad Gilead, naaralan na saray estudyante no panon so pansukimat pian naala so apalabas ya awaran tan eksena na saray salaysay ed Biblia. Apaseseg iran mangonsidera no panon so nepeg a pangapekta na balang salaysay ed kabibilay da. Sikaray pinaseseg a mantultuloy a manggawa ed saya.
“Komadua, mantultuloy ya ombulaslas ed aro. Ombulaslas so aro no nababayuboan. No nibaliwala, ompatey itan,” so inkuan nen Brother Adams. (Filipos 1:9) Natan, bilang misionaryo, kaukolan day ombulaslas ed aro anggaman ed nanduruman sirkumstansia. Tan komatlo: “Ombuna kayo komon ed grasya tan pikakabat ed Katawan tan Manangilaban tayo a Jesu-Kristo.” (2 Pedro 3:18) “Saya so makapakelkelaw a panangasi ya impanengneng nen Jehova panamegley na Anak to,” so inkuan na espiker. “Legan ya ombubulaslas so apresasyon tayo ed satan ya agkanepegan a panangasi, ombubulaslas met so liket tayo ed panggagawa na linawa nen Jehova tan ed panusumpal ed nipabtang a gawaen tayo.”
Sakey nin instruktor na Gilead, si Mark Noumair, so nansalita ed teman “Arapen Itan Tekep na Aro, tan Nasungdoan Mo Itan.” Onia so insimbawa to: “Aralen ya arapen so makapaangat iran situasyon diad bilay bilang misionaryo tekep na aro, tan nasungdoan mo itan. Didisiplanaen labat nen Jehova iraman so aaroen to. Anggano liknaen yon say konseho et agmarakep so inkisimbawa to, makapaingongot, odino aliwan asimbang, say aro ed si Jehova tan say relasyon yo ed sikato so ontulong ed sikayon nasungdoan itan.”
Impabitar nen Brother Noumair a laktipen na misionaryon serbisyo so dakel iran obligasyon. “Balet say obligasyon ya ag-atekepay aro et pagmaliwen to kan agkontento. No ag-atekepay aro iray obligasyon yo ed ayaman, singa say panagluto, pititindaan, panag-oras ed prutas, panlamaw, et magmaliw lan makapasawa. Nepeg mon tepetan so inkasika, ‘Akin a gagawaen ko iraya?’ Bueno, no ikuan yo ed inkasikayo, ‘Saray sagpot ko so ontutulong ed bunigas tan liket na kaparak a misionaryo,’ diad ontan et aliwan mairap a gawaen.” Bilang sumaryo, insimbawa to: “Balanglan manlapu itan ed panangawat ed disiplina, pananumpal ed saray obligasyon bilang misionaryo, odino panagresolbi ed saray agpantatalosan, say pangarap ed satan tekep na aro so ontulong ed sikayon mankapansungdo ed asainmin yo. ‘Agbalot onsaew so aro.’”—1 Corinto 13:8, NW.
Si Wallace Liverance ya instruktor na Gilead so sinmublay ya angidaulo ed impangiyakto lamet na pigaran makapaliket iran eksperiensia a nanggayagaan na saray estudyante legan ya akikimey ira ed lokal iran kongregasyon. Likud ed impankabkaabungan, inusar day inkipasal da ed panagmisionaryo diad pananap ed totoo diad saray paradaay trak, panagpesakan, istasyon na saray tren, tan arum nin lugar.
Saray Eksperiensiadon Misionaryo so Angiter na Panamaseguro
Sano onla iray misionaryo ed sananey a bansa, nakaukolan kasi so pirmin pampaga? Kasin napidenengan da iray angat ed biek taew ya asainmin? Anto so gagawaen na saray sangan opisina pian tulongan irayan balo nin sinmabi a magmaliw a matalona? Pian naebatan irayan tepet tan arum ni, si Steven Lett, na Service Department, tan si David Splane, na Writing Department, so anginterbio ed agagin lalaki a manklaklase ed saman ed branch school diad Watchtower Educational Center. Saray agagin ininterbio so kabiangan na saray branch committee diad España, Hong Kong, Liberia, Benin, Madagascar, Brazil, tan Hapon.
Sarayan eksperiensiadon lingkor nen Jehova, a dakel ed sikara so nanlingkor la bilang misionaryo ed loob na saray dekada, so amaseguro ed saray mangraduar ya estudyante ontan met ed saray atateng tan kakanayon ya inmatendi. Unong ed mismon eksperiensia ra tan ed kapara ran misionaryo, impaimano ran natalonaan iray problema tan kapagaan. Say problema ya arapen da et nayarin baleg, “balet naresolbi itan, tan tutulongan itayo na Sosyedad,” so inkomento nen Raimo Kuokkanen, misionaryo diad Madagascar. “Agmi pinili so asainmin, inawat mi itan,” so inkuan nen Östen Gustavsson, a manlilingkor natan ed Brazil. “Kanian nandesidi kamin gawaen so sankaabigan mi pian makapansiansia ed asainmin mi.” Si James Linton, a manlilingkor ed Hapon, so angikuan a say akatulong ed sikato et “say kiwawala na agagin abayag lan manlilingkor ed misionaryon asainmin da.” Say panagmisionaryon serbisyo so maliket tan makapnek a paraan na panaglingkor ed si Jehova tan panangasikaso ed saray karnero to.
Paliisan so Salot a Mamatey ed Espiritualidad
Si Theodore Jaracz, membro na Mananguley ya Ulop, a nangraduar a mismo ed komapiton klase na Gilead nen 1946, so angiter na manangisaran paliwawa, ed teman, “Say Angat ed Pansiansian Mabilay ed Espiritual.” Diad impamidbir ya inmuna ed saray graben kairapan a nagagawa ed nanduruman parti na mundo, impabitar to a talagan nagagawa ed katooan iray graben kalamidad.
Diad impanukoy ed Salmo 91 unong ed New World Translation, impabidbir nen Brother Jaracz so “salot” tan “kadederal” ya analot tan amatey ed minilyon ed kaliberliber tayo diad espiritual a paraan. Say Diablo tan say marelmeng a sistema to so manguusar ed singa salot a propaganda, base ed intelektualismo tan materyalismo, pian mamakapuy tan mamatey ed espiritualidad, balet papaseguroan itayo nen Jehova a sayan salot so agmakaasingger ed “say manayam ed maamot a pasen na Sankatageyan.”—Salmo 91:1-7.
Inkuan nen Brother Jaracz a, “say angat et say pansiansian mabiskeg ed pananisia, pansiansia ed pasen a maligen. Aliwa itayon singa saray managludlurey ‘ya andian na espiritualidad.’ Saya so problema natan. Aarapen tayon amin itan ed loob na organisasyon. Satan so nayarin arapen yo met ed misionaryon asainmin yo.” (Judas 18, 19) Balet saray mangraduar a misionaryo so abilin a makapansiansia iran matalona ed espiritualidad diad saray asainmin da. Alimbawa, sikaray pinaseseg a mangikonsidera no panon a saray agagi tayo so makapansusungdo diad Russia, diad Asia, tan diad saray bansa na Aprika—anggaman ed saray pananebel, pirmin isusumpa, panagludlurey, ateistikon propaganda, tan palso iran panamakasalanan. Tan, diad dakel a kaso, saray problema ed pisikal so sakey ni, a resulta na panggugulaan na tribu tan kakisiran na saray nakakaukolan.
No walay ikakapuy ed espiritualidad, “kaukolan ya arapen so panlalapuan na problema insan pankimeyan itan, ya usaren so simbawa na Salitay Dios.” Niiter iray ehemplo ed Biblia. Apaseseg si Josue a manbasan makalna ed kopya to ed Ganggan kada agew. (Josue 1:8) Sanen say libro na Ganggan so aromog ed agew nen Josias, benendisionan nen Jehova so matoor ya impangiyaplika ed saray instruksion na satan. (2 Arari 23:2, 3) Kabat nen Timoteo iray masanton sulsulat manlapud inkaugaw to. (2 Timoteo 3:14, 15) Saray taga-Berea so aliwan maong a dumerengel labat; sikaray nipasen a “mapagalang” lapud inusisa ra so Kasulatan ya inagew-agew. (Gawa 17:10, 11) Tan si Jesu-Kristo so sankamanunaan ya ehemplo a makaamta tan angusar ed Salitay Dios.—Mateo 4:1-11.
Bilang pansara, ampetapetang a sinimbawa nen Brother Jaracz iray balon misionaryo: “Natan et akaparaan kayo lan manumpal ed misionaryon asainmin yo. Tan onla kayo ed arawi iran pasen, diad literal a pantalos, ed dakel a parti na dalin. No naabet tayo so angat ed pansiansian aktibo ed espiritual, diad ontan et agtayo abuloyan so antokaman a manebel ed sikatayo diad panumpal ed denesidi tayon gawaen. Onla kayon manpulong tekep na seseg, mamaligsa ed arum a mangalig ed pananisia yo, tan kaiba yo kamin mangipikasi a saraman so babangatan yo, et pabilayen nen Jehova ed espiritual a singa gagawaen to ed sikatayo. Tan diad ontan et dakel ni so makataynan ed espiritual a kalamidad a manasibengbeng natan ed sankamundoan. Napibilang ira ed sikatayo ed ondarakel a bilang pian gawaen so linawa nen Jehova. Tan komon ta bendisionan kayo nen Jehova ed satan a gagala.”
Kayarin binasa na tsirman iray pabanon nanlapud nanduruman bansa ed sankamundoan, asabi so oras na pangiyawat ed saray diploma na saray mangraduar ya estudyante. Insan tinumbokan na impamasa ed sulat na apresasyon a ginawa na saray estudyante. Agaylan misalsalamat ira ed si Jehova tan ed organisasyon to lapud espisyal a panangipasal a naawat da tan ed saray dilin asainmin da bilang misionaryon onla “angga ed sankaarawian a parti na dalin”!—Gawa 1:8, NW.
[Kahon ed pahina 29]
Saray Estadistika na Klase
Bilang na saray nirepresentan bansa: 11
Bilang na saray bansan angi-asainan: 24
Bilang na saray estudyante: 48
Bilang na sanasawa: 24
Promedyon edad: 34
Promedyon taon ed katuaan: 17
Promedyon taon ed sigpot-panaon a ministeryo: 12
[Litrato ed pahina 26]
Koma-107 a Nangraduar a Klase na Watchtower Bible School of Gilead
Diad listaan ed leksab, saray dasig so anumeroan a manlapud arap a pabeneg, tan saray ngaran so akalista manlapud kawigi a manpakawanan ed kada dasig.
1. Peralta, C.; Hollenbeck, B.; Shaw, R.; Hassan, N.; Martin, D.; Hutchinson, A. 2. Edwards, L.; Vezer, T.; Ceruti, Q.; Entzminger, G.; D’Aloise, L.; Baglieri, L. 3. Knight, P.; Krause, A.; Kasuske, D.; Rose, M.; Friedl, K.; Nieto, R. 4. Rose, E.; Backus, T.; Talley, S.; Humbert, D.; Bernhardt, A.; Peralta, M. 5. D’Aloise, A.; Humbert, D.; Dunn, H.; Gatling, G.; Shaw, J.; Ceruti, M. 6. Baglieri, S.; Krause, J.; Hollenbeck, T.; Martin, M.; Bernhardt, J.; Hutchinson, M. 7. Backus, A.; Dunn, O.; Gatling, T.; Vezer, R.; Knight, P.; Hassan, O. 8. Nieto, C.; Talley, M.; Friedl, D.; Kasuske, A.; Edwards, J.; Entzminger, M.