Kasin Nanonotan Yo?

Kasin maalwar mo lan kinonsidera iray agano nin paway na Say Panag-Bantayan? No ontan, naromog mon makapainteres so pannonot ed onggendan:

◻ Antoray pigaran tepet a nitepet na duaran Kristiano ed inkasikara sakbay dan nonotey pisipanan?

‘Segsegurado ak ta la ed espiritualidad tan debosyon to ed Dios? Kasin naisip kon sikamin duay manulop ed legay bilay a panserbi ed Dios? Kasin kabisado mi lay personalidad na balang sakey? Matalek ak ta’n magmaliw a magnayon so panbagayan mi? Magenap ta lay kabat mi no nipaakar ed apalabas iran agawa tan kaplesan iran sirkumstansia na balang sakey?’​—8/15, pahina 31.

◻ Antoy labay ya ibaga nen Jesus sanen inkuanto ed saray patumbok to: “Sikayo so asin na dalin”? (Mateo 5:13)

Impabitar nen Jesus a say panagpulong na saray patumbok to ed arum nipaakar ed Panarian na Dios et posiblin kipreserbaan, odino kisalbaay bilay na saray ondengel ed sikara. On, saramay mangiyaaplika ed saray salita nen Jesus so naprotektaan manlapud moral tan espiritual ya inkabulok diad mundo.​—8/15, pahina 32.

◻ Panon a napaliisan na saninaro so seksual ya imoralidad?

No sikay midi-date, makabat ka no paliisay pagmaliw a bukbukor a kaibay prospektibon kapareham ed agmatukoy iran sirkumstansia. Sankaabigan a panggayagaay panlilimog a kaibay arum odino ed publiko iran pasen. Limitaan so pangipanengneng na panangaro, a balang sakey so manrespetoan ed liknaan tan konsiensia na sakey.​—9/1, pahina 17, 18.

◻ Anto so pakatalos?

Say abilidad a mantalos ed sakey a pamaakaran tan manebek ed inkatibukel na satan diad pakarandan ed pansisiglaotan na saray kabiangan tan say intiraminti, a diad ontan et natalosan so kabaliksan na satan. (Uliran 4:1)​—9/15, pahina 13.

◻ Antoy kakaukolanen nen Jehova ed sikatayo natan?

Manuna ed amin, say kakaukolanen nen Jehova ed sikatayo et say italineng ed Anak To tan tumboken so alimbawa tan saray bangat to. (Mateo 16:24; 1 Pedro 2:21)​—9/15, pahina 22.

◻ Siopara lambengat so makaeksperiensia na kareenan?

Lapud si Jehova so “Dios na kareenan,” say kareenan so naeksperiensia lambengat na totoon mangaaro ed Dios tan walaay aralem a respeto ed matunong iran prinsipyo to. (Roma 15:33)​—10/1, pahina 11.

◻ Panon ya agamoran nen Jose so biskeg ed moral pian ag-onabuloy ed asawa nen Potifar ed inagew-agew?

Pinabli nen Jose so relasyon to ed si Jehova nen say dinanman a temporaryon liket. Niarum ni, anggaman sikatoy anggapo ed silong na madibinon kodigo na ganggan, walaan la si Jose na malinew a pakatebek ed moral iran prinsipyo. (Genesis 39:9)​—10/1, pahina 29.

◻ Panon kaimportanti so inkamabulos tayon perdonaen iray agagi tayo?

Saray iilaloan tayo pian tuloytuloy itayon perdonaen na Dios et akadependin tuloy ed inkamabulos tayon perdonaen so arum. (Mateo 6:12, 14; Lucas 11:4)​—10/15, pahina 17.

◻ Anton klase na saray kasalanan so tutukoyen na Mateo 15-17, tan antoy ipapabitar na satan?

Saray kasalanan a tutukoyen nen Jesus et seryoson tuloy a mangitonton ed managgaway mauges a nayarin nipasen a “singa Gentil tan publikano.” Agmililimog iray Judio ed saray Gentil, tan pinaliisan da iray managsingil na buis. Kanian say tutukoyen na Mateo 18:15-17 et nipaakar ed seryoso iran kasalanan, ya aliwan personal ya inkaopendian odino inkasakitan a nayarin perdonaen tan lingwanan mo lambengat. (Mateo 18:21, 22)​—10/15, pahina 19.

◻ Anto so lalanoren na peteg a panangaro ed Salitay Dios? Say panangaro ed Salitay Dios so mangitonton ed sakey a manbilay unong ed saray kakaukolanen na satan. (Salmo 119:97, 101, 105) Kakaukolanen na saya so tuloytuloy a pananguman ed panag-isip tan dalan na kabibilay na sakey.​—11/1, pahina 14.

◻ Lapud amayamay a naawat tayo ed si Jehova, antoy niiter tayo met ed say sankatalonggaringan ya Ari tan Manangiter? Ipaparungtal na Biblia a say sankaabigan a niregalo tayo ed si Jehova et say “bagat a panangidayew.” (Hebreos 13:15) Akin? Lapud sayan bagat so direktan misiglaotan ed panangiliktar na bilay, say manunan kapagaan nen Jehova ed sayan panaon na anggaan. (Ezequiel 18:23)​—11/1, pahina 21.

◻ Antoy labay ya ibaga nen Solomon sanen insulat toy: “Saray salita na makakabat et singa saray panagtengteng ed baka”? (Eclesiastes 12:11, NW)

Saray salita na saramay walaan na maridios a kakabatan so managdag ed saray managbasa odino dumerengel a manpaaligwas a mitunosan ed saray abasa odino nadngelan iran makabat a salita.​—11/15, pahina 21.

◻ Anto so maridios a pakatebek?

Satan so abilidad a mangibiig ed maong manlapud mauges insan pamili ed maptek a kurang. Say panaral tan pangiyaplika ed Salitay Dios so mangipagamor na pakatebek.​—11/15, pahina 25.

◻ Antoy nepeg ya itekep ed mabulos a pangawat ed saray responsabilidad? (1 Timoteo 3:1)

Nepeg iyan tekepan na maabig a panagdesisyon. Anggapo komon so mangaawat na dakel iran asainmin a kabalangan to lay gayaga to ed panaglingkor ed si Jehova. Say mabulos ya awawey so nakomendaan, balet ta say inkamabulos so nepeg met a mangisindag na kapaabebaan tan “inkalimpio ed kanonotan.” (Tito 2:12, NW; Apocalipsis 3:15, 16)​—12/1, pahina 28.

◻ Panoy pangarap ed angat na inkaateng?

Sisimbawaen na Dios iray ateng a magmaliw ya ehemplo, kaulop, mitatalosan, tan managbangat. (Deuteronomio 6:6, 7)​—12/1, pahina 32.