Tepetepet Manlapud Saray Managbasa

Diad 1 Pedro 4:3 unong ed New World Translation, nabasa tayo a walaray Kristiano a datin akibiang ed “sebel iran panagtalintao.” Agta amin a nengneng na panagtalintao et sebel, kokondenaen tan isesebel na Dios?

On, amin a panagtalintao so sebel unong ed panmoria na Dios. Saramay manaanap ed pabor to so agnayarin mangagamil na panagtalintao.​—1 Corinto 5:11; Apocalipsis 21:8.

Balet, mapatnag a tutukoyen nen apostol Pedro so panagtalintao diad sananey a punto-de-bista. Say sakey a rason et say panagtalintao so kaslakan tan anggapoy legal a pananebel manlapud saray autoridad diad limog na dakel a nasyon nensaman. Salanti, say ley na bansa so ag-angisebel ed panagtalintao. Arum ni ingen a panagtalintao so kabiangan na totontonen ed nasyon odino gobierno. Diad ontan a pantalos, arum so akibiang ed ‘saray panagtalintao ya anggapoy legal a pananebel’ sakbay iran nagmaliw a Kristiano. (New World Translation, 1950 edition) Singa bilang, nanonotan tayo ni a si Nabucodonosor ya Ari na Babilonia so angipaalagey na balitok a talintao, balet agdinakmomoan itan na saray lingkor nen Jehova a si Sidrac, Mesac, tan Abdenago.​—Daniel 3:1-12.

Diad sananey nin punto-de-bista, laktipen na dakel a ritual ed panagtalintao so mauges iran kiwas a sumlang ed dinanman a natural a ganggan odino liknaan ed moral a base’d atawir a konsiensia. (Roma 2:14, 15) Insulat nen apostol Pablo so nipaakar ed mabanday iran agamil a ‘sumlang ed inkapalsa’ tan ‘karimdimla,’ tan mabetbet irayan napatnagan ed saray relihyoson ritual. (Roma 1:26, 27) Saray lalaki tan bibii ya akibabali ed sebel a panagtalintao et agda inunor so ganggan na natural a pakatebek da ed maong tan mauges. Talagan matukotukoy parad saramay magmamaliw a Kristiano a taynan da iratan ya abulok ya agagamil.

Niarum ni ed asalambit la, saratan a panagtalintao a kaslakan ed limog na saray aliwan-Judio so kinondena nen Jehova a Dios. Kanian saratan so sumlang ed ganggan.a​—Colosas 3:5-7.

[Paimano ed leksab]