Agbalot Ontalona so Pananguley nen Satanas
“Aliwan maabig so pansumpalan na mauges.”—ECL. 8:13, NW.
1. Akin et makapaliket a narengelan a magano lan naukom iray mauges?
AGMANBAYAG et naawat la na saray mauges so kanepegan dan panangukom. Bayaran da lay amin a kasalanan a ginawa ra. (Uli. 5:22; Ecl. 8:12, 13) Makapaliket iya, nagkalalo la ed saramay mangaaro ed kaptekan tan asibletan na hustisya, ontan met ed saramay mamaltratoen na saray mauges. Say sankamanunaan ed sarayan mauges a naukom met et say ama na kaugsan, si Satanas a Diablo.—Juan 8:44.
2. Akin et kaukolan so panaon pian nasolbar so isyun apawala ed Eden?
2 Diad Eden, lapud sobran inkamapaatagey nen Satanas, sinugsogan to iray totoo a mangipulisay ed pananguley nen Jehova. Bilang resulta, saray inmunan ateng tayo et akikasakey ed si Satanas diad pangukuestion to ed kanepegan nen Jehova a manuley kanian nagmaliw iran makasalanan ed arap To. (Roma 5:12-14) Siempre, amta nen Jehova no antoy magmaliw a resulta na inkaandian day respeto tan impanrebelde ra. Balet, satan a resulta et nepeg a nipamoria ed amin ya intelihentin pinalsa. Kanian kaukolan so panaon pian nasolbar itan ya isyu tan talagan napaneknekan ya alingo-lingo iramay nanrebelde.
3. Panoy pangipapasen tayo ed saray gobierno na too?
3 Lapud agla nampasakop iray totoo ed si Jehova, kaukolan da lay mangiletneg na sarili dan gobierno. Sarayan gobierno na totoo et tinukoy nen Pablo bilang saray atagey ya autoridad sanen sinulat to iray kapananisiaan ed Roma. Nen panaon nen Pablo, saray atagey ya autoridad et manunan ontutukoy ed gobierno na Roma ya inuleyan nen Emperador Nero manlapud 54-68 C.E. Imbaga nen Pablo a sarayan atagey ya autoridad et impasen na Dios ed saray relatibon posisyon da. (Basaen so Roma 13:1, 2.) Labay kasin ibaga na saya a mas susuportaan nen Pablo so uley na too nen say uley na Dios? Andin balot. Ibabaga to labat ya anggad aabuloyan nen Jehova a manuley iray totoo, nepeg ya igalang na saray Kristiano so uksoyan na Dios tan manpasakop ira ed sarayan manuley.
Kurang a Mamaarap ed Desyang
4. Ipaliwawa no akin ya agbalot ontalona so gobierno na too.
4 Anggaman kuan, say uley na too a walad panangontrol nen Satanas et agbalot ontalona. Akin? Lapud ag-itan nibase ed karunongan na Dios. Si Jehova labat so walaan na ayadyarin karunongan. Kanian, sikato labat so makapangiter na napanmatalkan a giya no panon a magmaliw a matalona so pananguley. (Jer. 8:9; Roma 16:27) Lawas amta nen Jehova no antoy sankaabigan a gawaen, aliwan singa saray totoo, a makakaaral ira labat diad panag-eksperimento. Anggapoy pansumpalan na dinanman a gobierno ya ag-ontutumbok ed panangigiya to. Anggan diad saya labat a rason—likud ni ed mauges a motibon nalalanor—say inletneg nen Satanas a pananguley panamegley na gobiernoy too et segurado lan onsaew diad gapo ni labat.
5, 6. Anto so mapatnag a rason no akin a nanrebelde si Satanas ed si Jehova?
5 Say sakey a marunong a too et agto gapoan so sakey a bengatla ya amta ton anggapoy pansumpalan. No ituloy to ni itan, napilitan ed saginonor ya aksobien so lingo to. Aminpiga lan apaneknekan ed saray agawa’d apalabas a kakulangkulangan so panrebelde ed makapanyarin-amin a Manamalsa. (Basaen so Uliran 21:30.) Balet si Satanas, lapud abulag na inkalastog tan inkamapaatagey et imbeneg toy Jehova. Sirin et pinili nen Satanas so sakey a kurang a seguradon mansumpal ed desyang.
6 Sayan inkamapaatagey ya ugali nen Satanas et apatnagan ed sakey a manuley na Babilonia ya oniay inlastog to: “Onkalab ak ed tawen, ipatagey ko so yurongan ko ed tagey na saray bibitewen na Dios; et onyurong ak ed tapew na palandey na muyong, dia ed saray kasampotan na kabiangan na amianen; onkalab ak ed tagey na saray atagey a lurem: gawaen ko so inkasiak a singa say Sankatagyan.” (Isa. 14:13-15) Say makulangkulang a kurang na sayan manuley et agtinmalona, tan makapabaing so nansumpalan na dinastiya na Babilonia. Agla manbayag, si Satanas tan say mundo to et sigpot met lan naderal.
Akin a Naabuloyan?
7, 8. Antoray pigaran pankaabigan na temporaryon pangiyaabuloy nen Jehova ed kaugsan?
7 Nayarin itepet na arum no akin ya ag-inamper nen Jehova so totoo ya ondapag ed si Satanas tan onsuporta ed sakey a pananguley ya agbalot ontalona. Bilang Dios a Makapanyarin-amin, seguradon sarag ton gawaen itan, balet agto ginawa. (Exo. 6:3) Lapud karunongan to, aabuloyan to nin magano so panrerebelde na totoo ta amta ton maabig lanlamang so pansumpalan na saray bengatla. Diad kaunoran, nitandoro si Jehova bilang say maptek tan maaron Manuley, tan nagunggonaan iray matoor a totoo ed desisyon to.
8 Agla komon naeeksperiensya na katooan so onian kairapan no agda dinengel si Satanas tan agda impulisay so pananguley na Dios! Ingen, walaray pankaabigan na desisyon nen Jehova ya abuloyan ni ray totoo ya uleyan so inkasikara. Impurek na satan ed saray maptek-impanpuson indibidual a makabat so idengel tan panmatalek ed Dios. Diad inlalabas na siglo, sinali na katooan so nambabangil a klase na gobierno, balet anggapo’d saratan so apaneknekan a maabig. Kanian lalon akombinse iray mandadayew ed Dios a talagan sankaabigan so pananguley nen Jehova. Tua a lapud pangiyaabuloy nen Jehova ed mauges a pananguley nen Satanas et maniirap so katooan, kaiba la iramay matoor a mandadayew ed Dios. Balet, sayan temporaryon pangiyaabuloy ed kaugsan et wala met iray pankaabigan to ed sarayan matoor a managdayew.
Impanrebelde ya Angigloria ed si Jehova
9, 10. Ipaliwawa no panon a nigloria si Jehova lapud pananguley nen Satanas.
9 Ag-abawasay kredibilidad na pananguley nen Jehova sanen inabuloyan ton impluensyaan nen Satanas so totoo tan uleyan day inkasikara. Kabaliktaran ni ingen so agawa! Abayag lan apaneknekan a tua iramay impuyan a salita nen Jeremias nipaakar ed agpakasarag na too ya uleyan so inkasikato. (Basaen so Jeremias 10:23.) Niarum ni, say impanrebelde nen Satanas et angiter ed si Jehova na pankanawnawa a nagkalalon nipatnag iray alay abig a kualidad to. Panon?
10 Lapud saray aliwliwan resulta na pananguley nen Satanas, lalon binmitar iray ayadyarin kualidad nen Jehova. Sikatoy nitandoro ed imaton na saray mangaaro ed sikato. Nayarin mairap ya isipen, balet diad tua et lalo laingen a nigloriay Dios lapud pananguley nen Satanas. Mas apaneknekan a talagan sankaabigan so paraan na impangarap nen Jehova ed impanguestion ed soberanya to. Pian nipalinew iyan katuaan, pantongtongan tayo pan magano so pigaran kualidad nen Jehova tan nengnengen tayo no panon a nagkalalon nipatnag nen Jehova irayan kualidad to lapud mauges a pananguley nen Satanas.
11. Panon a nipatnag so aro nen Jehova?
11 Aro. Ibabaga na Kasulatan a “say Dios sikato so aro.” (1 Juan 4:8) Say mismon impamalsa ed katooan et panangipatnag lay aro na Dios. Niarum ni, say makapakelaw tan makapadinayew ya inkadesinyo tayo et paneknek na aroy Dios. Maaro met ya intaryaan nen Jehova so totoo na balibalin ayaman a kompleto ed amin a nakaukolan da pian magmaliw iran maliket. (Gen. 1:29-31; 2:8, 9; Sal. 139:14-16) Balet, sanen linmoob so kaugsan ed pamilya na katooan, impatnag lamet nen Jehova so aro to ed sananey ni ran paraan. Panon? Oniay insulat nen apostol Juan ya imbaga nen Jesus: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.” (Juan 3:16, NW) Wala ta ni mas maabig a paraan a nipanengneng na Dios so aro to ed katooan nen say pangibaki to ed bogbogtong ya Anak to diad dalin pian dondonen ira ed kasalanan? (Juan 15:13) Sayan impangipatnag to na abalbaleg ya aro et sakey ya uliran parad katooan, kanian naikdan iray pankanawnawan aligen so masakripisyon aro na Dios diad inagew-agew a bilay da, a singa ed ginawa nen Jesus.—Juan 17:25, 26.
12. Diad anton paraan a nipatnag so pakapanyari nen Jehova?
12 Pakapanyari. Say “Dios, a Makapanyarin-amin” labat so walaan na pakapanyari a mamalsa na bilay. (Apo. 11:17; Sal. 36:9) Diad kianak, say bilay na sakey a too et niyaliling ed blankon papel. Diad ipapatey, singa to la sinulatan itan a papel na saray desisyon, gawa, tan saray naeksperiensya to ya akaimpluensyan maong ed nagmaliw a personalidad to. Diad aturon panaon, sarag a bilayen lamet nen Jehova iyan too, ya ipawil to so amin a pakabidbiran ed sikato bilang indibidual. (Juan 5:28, 29) Kanian, anggaman say ipapatey et agkabiangan ed orihinal a gagala na Dios parad katooan, angiter itan ed si Jehova na pankanawnawan ipanengneng a walay pakapanyari ton mamilay ed inaatey. On, si Jehova et talagan “Dios, a Makapanyarin-amin.”
13. Panon a nibagan say bagat nen Jesus et paneknek na ayadyarin hustisya nen Jehova?
13 Hustisya. Si Jehova et agmantitila; tan matunong so amin a gawa to. (Deu. 32:4; Tito 1:2) Lawas ton tutumboken so sankatageyan ya estandarte to ed katuaan tan hustisya, anggano ompatnag a disbentaha itan ed sikato. (Roma 8:32) Seguradon ansakisakit ed si Jehova a nanengneng so inad-aro ton Anak ya ompatey ed panamairapan a kiew a singano sakey a toon anggapon balot so respeto to ed Dios! Balet, lapud aro To ed imperpekton katooan, akaparaan si Jehova ya abuloyan so kagawa na sayan ansakisakit ya eksperiensya pian naunor so mismon estandarte to ed hustisya. (Basaen so Roma 5:18-21.) Lapud napnoy ag-inkahustisya iyan mundo, naikdan si Jehova na pankanawnawan napaneknekan ya agbalot naparaan so hustisya to.
14, 15. Panon a nipabitar so agnaparaan a karunongan tan panag-anos nen Jehova?
14 Karunongan. Kayarin tuloy na impankasalanan nen Adan tan Eva, impaamta nen Jehova no panon ton ekalen so amin a mauges ya epekto na impanrebelde ra. (Gen. 3:15) Lapud inkiwas ton tampol, tan ed kalkalnan impangipaamta to’d saray lingkor to na saray detalye nipaakar ed satan a gagala to, lalon binmitar so karunongan nen Jehova. (Roma 11:33) Anggapoy makaamper ed matalonan pangaasikaso na Dios ed bengabengatla. Diad sayan mundon kasmak so imoralidad, guerra, ag-inkamakatunongan, agkatutulok, kaandiay panangasi, panangidumaduma, tan pansimpisimpitan, baleg so pankanawnawa nen Jehova a nipanengneng ed saray pinalsa to no anton talaga so kabaliksan na karunongan. Inkuan nen disipulon Santiago: “Balet say karunongan a manlalapud tagey, unona ed amin et malinis, insan mareen, makatunongan, akaparaan ya ontulok, napno na panangasi tan maong a bungabunga, agmanangidumaduma, agmansimpisimpitan.”—Sant. 3:17, NW.
15 Andukey a Panag-anos tan Panagtepel. Seguradon say andukey a panag-anos tan panagtepel nen Jehova et agnipatnag ed ontan lan kabitar no agsinmabi so pankanawnawan kaukolan ton pidenengan iray ag-inkaperpekto, kasalanan, tan lingo na too. Say inkamabulos nen Jehova a manggawa ed satan diad loob na nilibon taon et pakapatnagan labat a sarayan makapadinayew a kualidad to et talagan ayadyari, tan nepeg tayo itan a pisalamatan. Duga si apostol Pedro sanen inkuan to ya “ipasen [tayon] kilalaban so panaanos na Katawan tayo.”—2 Ped. 3:9, 15, NW.
16. Akin et panlapuan na baleg a gayaga so inkamabulos nen Jehova a mamerdona?
16 Inkamabulos a Mamerdona. Makasalanan itayon amin, tan naynay a nalilingo. (Sant. 3:2; 1 Juan 1:8, 9) Nepeg a misalamat itayo ta akaparaan si Jehova a ‘mamerdona na daakan’! (Isa. 55:7) Imanoen pa met iya: Nianak itayon makasalanan tan imperpekto, kanian wala itayo ed kipapasen a naliknay baleg a gayaga a resulta na kaperdona na saray kasalanan. (Sal. 51:5, 9, 17) Lapud naeeksperiensya tayon mismo iyan makapatabay-puso a kualidad nen Jehova, lalon ombibiskeg so aro tayo ed sikato tan napapaseseg itayon aligen so alimbawa to diad pidedeneng tayo ed arum.—Basaen so Colosas 3:13.
“Mansasakit” so Mundo—Akin?
17, 18. Diad antoran paraan a sinmaew so pananguley nen Satanas?
17 Say interon sistema na mundo nen Satanas, a pinawala na pananguley to, et aminpigapiga tan naynay ya onsasaew manlapu la nensaman. Nen 1991, oniay inkuan na dyaryon The European: “Mansasakit ta so mundo? On, balet . . . say sengegan na pansasakit na mundo et aliwan say Dios, noagta saray totoo.” Talagan tua itan! Lapud inimpluensyaan nen Satanas iray inmunan ateng tayo, pinili ra so uley na too imbes a say uley nen Jehova. Diad satan et angigapo ira na sakey a pananguley ya agbalot ontalona. Say ot-ot tan kairapan a nasasagmak na totoo ed sankamundoan et sintomas ya adapoan na graben sakit so uley na too.
18 Say paraan na pananguley nen Satanas et niletneg ed kasibletan. Balet, agbalot nadaeg na kasibletan so aro, a saya so basiyan na pananguley nen Jehova. Ag-akapangiter na ligen, liket, odino seguridad so pananguley nen Satanas. Ingen, say pananguley nen Jehova et lawas a sankaabigan! Kasin napaneknekan itan diad panaon tayo? On, a singa nanengneng tayo ed ontumbok ya artikulo.
Antoy Naaralan Tayo Nipaakar ed Pananguley Diad Impanbasa ed . . .
• Roma 13:1, 2?
• Uliran 21:30?
• Colosas 3:13?
[Saray litrato ed pahina 25]
Agbalot agunggonaan so katooan ed uley nen Satanas
[Credit Lines]
U.S. Army photo
WHO photo by P. Almasy
[Litrato ed pahina 26]
Walay pakapanyari nen Jehova a mamilay ed inaatey
[Litrato ed pahina 27]
Nipabitar so aro tan hustisya nen Jehova diad impangibagat to ed Anak to