“Anggapoy Lalabien” nen Jehova

Kasin abiktima ka lay diskriminasyon? Kasin asalim lay agpinagustoan, agpinanserbian, odino imbaliwala lapud kolor, nanlapuan a bansa, odino kipapasen mod bilay? No on, aliwan sika labat so akasali na ontan. Balet nia so marakep a balita: Anggaman say ontan ya panagtrato et mabetbet lan nagagawa, anggapo itan ed tawen. Oniay matalek ya imbaga na Kristianon apostol a si Pedro: “Anggapoy lalabien na Dios.”—Basaen so Gawa 10:34, 35, Maung a Balita.

Imbaga itan nen Pedro ed ag-iilaloan a kipapasen—sanen sikatoy walad abung na sakey ya Gentil a si Cornelio. Si Pedro, a sakey ya Judio et nambilay ed panaon ya ipapasen na saray Judio iray Gentil ya marutak tan agnepeg ya piulopan. Balet, akin et wadmay Pedro? Lapud nanggaway paraan si Jehova pian makapannengneng ira! Oniay imbaga na Dios ed si Pedro diad sakey ya pasingawey: “Agmo la tatawagen a marutak iray nilinisan la na Dios.” Ag-amta nen Pedro ya nen imbeneg ya agew et wala met so pasingawey ed si Cornelio, a diad saman et sikatoy ingganggan na anghel ya ipatawag toy Pedro. (Gawa 10:1-15) Nen naamtaan nen Pedro a si Jehova so nanggaway paraan pian makapannengneng ira, agto napaliisay mansalita.

Inkuan nen Pedro: “Natan ko la atebek ya anggapoy lalabien na Dios.” (Gawa 10:34, Maung a Balita) Say literal ya kabaliksan na Griegon salitan nipatalos ya “lalabien” et “manag-alay lupa.” (The Kingdom Interlinear Translation of the Greek Scriptures) Oniay inkuan na sakey ya scholar nipaakar ed satan ya termino: “Tutukoyen na satan so sakey ya ukom ya onnenengneng ed lupa na sakey insan mandesisyon, tan ibase toy desisyon to aliwan diad saray ebidensya, noagta no kasin labay to odino andi imay too.” Balet agpapaboran na Dios so sakey lapu labat ed poli, bansa, estado ed bilay, odino arum ni.

Imbes, say nenengnengen nen Jehova et say walad puso tayo. (1 Samuel 16:7; Uliran 21:2) Onia ni imbaga nen Pedro: “Diad balang nasyon et makapaliket ed sikato so toon ontatakot ed sikato tan manggagawa na inkatunong.” (Gawa 10:35) Say labay ya ibaga na itakot ed Dios et panrespeto, pangigalang, panmatalek ed sikato, tan ipaliis ed saray bengatlan agmamaliket ed sikato. Say panggawa na inkatunong et impapuson panggaway duga ed pakanengneng na Dios. Naliliketan si Jehova ed toon say puso to et walaay takot ed Dios a mamakiwas ed sikaton manggaway duga.—Deuteronomio 10:12, 13.

No abiktima ka lay diskriminasyon odino panaglabi, napabiskeg kad saray imbaga nen Pedro nipaakar ed Dios. Iyaasingger nen Jehova ed dugan panagdayew iray totoo ed amin a bansa. (Juan 6:44; Gawa 17:26, 27) Dedengelen tan eebatan toy pikakasi na saray mandadayew ed sikato antokaman so poli, bansa, odino kipapasen dad bilay. (1 Arari 8:41-43) Makaseguro tayo ya no onnenengneng ed dalin si Jehova, parad sikato et parepareho tayo. Kasin apakiwas kan mas kabaten iyan Dios ya anggapoy lalabien to?