Talaga Kasin Papablien Ka nen Jehova?

“Say pakaliknan anggapoy kuentak so manunan makakasbel ed pikakaarok ed Dios tan lalabanan ko itan a liknaan.” Ontan so inkuan na sakey a biin mairap ton panisiaan ya sikatoy iyaansakit nen Jehova. Kasin ontan met so naliliknam? No ontan, nayarin nitepet mo, ‘Talaga kasin papablien nen Jehova so kada indibidual a mandadayew ed sikato?’ Say ebat et on! Napruebaan tayo itan diad saray salita nen Jesus.—Basaen so Juan 6:44.

Anto kasi imbaga nen Jesus ya talagan makaamtad personalidad tan labay nen Jehova? (Lucas 10:22) Impaliwawa to: “Anggapoy makadago ed siak no sikatoy ag-iyasingger na Ama ya angibaki ed siak.” Kanian ag-itayo magmaliw a patumbok na Kristo tan managdayew ed Ama tayon walad tawen, si Jehova, no ag-itayo inyapit a mismo nen Jehova. (2 Tesalonica 2:13) No natatalosan tayoy labay ya ibaga nen Jesus, nanengneng tayod saray salita to so mabiskeg ya ebidensya na panangiyansakit na Dios.

Antoy labay ya ibaga na iyaasingger itayo nen Jehova? Say Griegon salita ya impatalos ya “iyasingger” et inusar met pian tukoyen so pangguyor na iket. (Juan 21:6, 11) Kasin pipiliten itayo nen Jehova ya manlingkor ed sikato? Andi. Inikdan to itayo na kanepegan a manpili, kanian agto pipiliten ya lukasay puso tayo. (Deuteronomio 30:19, 20) Oniay imbaga na sakey ya scholar: “Anggapo so lukasan ed paway na puso, kaukolan itan ya lukasan manlapud loob.” Uusisaen nen Jehova so puso na binilyon a totoo diad mundo, tan aanapen to ray indibidual ya akaparaan a mangawat ed sikato. (1 Awaran 28:9) No walay ontan ya naromog to, sikatoy onkiwas ed maaron paraan. Panon?

Maaron iyaasingger nen Jehova so toon “walaan na dugan kipapasen na puso.” (Gawa 13:48) Gagawaen to itan ed duaran paraan—panamegley na maong a balitan mensahe na Biblia, ya makakasabid balang sakey ed sikatayo, tan panamegley na masanton espiritu to. No nanengneng nen Jehova ya apakiwas na saray katuaan a manlalapud Biblia so puso na sakey ya too, uusaren toy espiritu to pian natulongan so indibidual a natalosan tan niyaplika so katuaan ed bilay to. (1 Corinto 2:11, 12) No anggapo so tulong na Dios, agtayo magmaliw a tuan papatumbok nen Jesus tan debotadon managdayew nen Jehova.

Anto sirin so ibabangat ed sikatayo na saray salita nen Jesus ya akasulat ed Juan 6:44 nipaakar ed si Jehova? Iyaapit nen Jehova iray totoo lapud walay anengneng ton maabig ed puso ra tan aasikasoen to ra bilang indibidual. Atalosan iya na samay bii ya abitlad gapo kanian sikatoy nainawaan ed sarayan katuaan. Oniay inkuan to: “Say pagmaliw a lingkor nen Jehova et sankabalgan a pribilehyon niiter ed sakey a too. Tan no pinili ak nen Jehova a manlingkor ed sikato, importante ak sirin ed sikato.” Sika ey? Kasin say impakaantam ya papablien nen Jehova so kada lingkor to et mamakiwas ed sikan mangilukas ed pusom?