Pananulong ed Totoo ya Onapit ed si Jehova
“Anggapo so ondateng ed Ama, noag dia ed panamegley ko.”—JUAN 14:6.
1. Anton ganggan so inter na apaolin Jesus ed saray babangatan to, tan antoy resulta legan a tutuloken na Tastasi nen Jehova itan?
INGGANGGAN nen Jesu-Kristo iray patumbok to a ‘manggawa na saray babangatan ed amin a nasyones, a binyagan ira ed ngaray Ama, tan say Anak, tan say espiritu santo.’ (Mateo 28:19) Diad apalabas a samploran taon, atulongan na Tastasi nen Jehova so masulok a taloran milyon a totoo pian ondago ed Dios, a sinmabi panaon et binautismoan ira bilang simbolo na didikasyon da ed sikato pian gawaen so linawa to. Alay liket tayon ontulong ed sikaran onapit ed Dios!—Santiago 4:8.
2. Anggaman dakel a balo ni so nababautismoan, antoy nagagawa?
2 Anggaman ontan, diad pigaran daldalin a no iner et dakel so balon babangatan a nababautismoan, ag-ontatagey balet so bilang na saray manangipalapag na Panarian. Siempre, nepeg ya ikonsidera iramay inaatey, say bilang na tinaon ya ompapatey et ngalngali 1 porsiento. Ingen, diad apalabas a pigaran taon et dakel a tuloy so onsisian lapud pigaran rason. Akin? Usisaen na sayan artikulo tan say ontumbok no panon a niyaasingger iray totoo ed si Jehova tan saray posiblin rason no akin a say arum et onsisian.
Say Gagala na Panagpulong Tayo
3. (a) Panon a mitunosan so misyon ya inmatalek nen Jesus ed saray babangatan to ed samay anghel ya asalambit ed Apocalipsis 14:6? (b) Antoy apaneknekan ya epektibon paraan pian nasagyat so interes na totoo ed mensahe na Panarian, balet antoy walan problema?
3 Diad sayan “panaon na anggaan,” inganggan iray babangatan nen Jesus ya iwakawak so “tuan pikakabat” nipaakar ed “saya ya ebanghelyo na panarian.” (Daniel 12:4, NW; Mateo 24:14) Say misyon da so mitunosan ed samay anghel a “wala ed sikato so andi angga a maabig a balita pian sikato so ipulong to ed saray manaayam dia ed dalin, tan diad balang nasyon tan poli tan salita tan baley.” (Apocalipsis 14:6) Diad sayan mundo ya okupadon tuloy ed minumundo iran pamaakaran, inkalapagan a say sankaepektiboan a paraan pian nasagyat so interes na totoo nipaakar ed Panarian na Dios tan natulongan iran onapit ed si Jehova et say pangibaga ed sikara ed ilalon andi-anggaan a bilay diad paraison dalin. Anggaman tua iya, saramay mililimog ed totoo na Dios lapu labat ed pakaloob ed Paraiso so paligpalig ed panag-akar da’d espiritual diad mainget a dalan a mamaarap ed bilay.—Mateo 7:13, 14.
4. Unong ed si Jesus tan ed anghel a mantektekkiab ed pegley na tawen, antoy gagala na panagpulong tayo?
4 Inkuan nen Jesus: “Saya sikato so andi-anggaan a bilay, a naamtaan da ka a saksakey a tuan Dios, tan saman so imbakim, salanti Jesu-Kristo.” (Juan 17:3) Iyaabawag na anghel a mantektekkiab ed pegley na tawen so “andi-angga a maabig a balita” tan ibabaga to’d saray manaayam ed dalin: “Takotan yo so Dios, tan iter yo ed sikato so gloria: ta say oras na pangukom to sinmabi la; tan igalang yo so nanggawa ed tawen tan dalin tan say dayat tan saray subol na saray danum.” (Apocalipsis 14:7) Sirin, say manunan gagala na panangipulong tayo ed maong a balita et pian tulongan so totoo ya onapit ed si Jehova panamegley nen Kristo Jesus.
Say Betang Tayo ed Kimey nen Jehova
5. Antoran balikas di Pablo tan Jesus so mangipanengneng a gagawaen tayoy kimey na Dios, ya agtayo kimey?
5 Nen susulaten toray kaparan alanaan a Kristiano, sinaglawi nen apostol Pablo so “ministeryo na pipupulangan” tan inkuanton pipupulanganen na Dios so totoo ed inkasikato diad basiyan na dondon bagat nen Jesu-Kristo. Inkuan nen Pablo a “singano mikakasi so Dios panamegley mi” kanian “bilang kasandi para ed Kristo, ikekerew mi: ‘Mipulangan kayo ed Dios.’” Agaylan makapaligsay-puson kanonotan! Balanglan alanaan itayo ya “embahadores ya onsasandi para ed Kristo” odino saray ibabaki a walaan na mangaraldalin ya ilalo, kaukolan ya agtayon balot lilingwanan a kimey iya nen Jehova, agtayo kimey. (2 Corinto 5:18-20, NW) Peteg a say Dios so mangiyaasingger ed totoo tan mangibabangat ed saraman so ondago ed si Kristo. Inkuan nen Jesus: “Anggapo so too a makadago ed siak, likud no say Ama ya angibaki ed siak sikato so yasinger to; et sikato so paolien ko ed bilay ed kaunoran ya agew. Nisulat ed saray propetas, et nabangatan ira ya amin ed Dios. Balang sakey ya akadngel ed Ama, tan akaaral, ondago ed siak.”—Juan 6:44, 45.
6. Panon a mamayegmegen nen Jehova so nasyones ed pagpaunan paraan, tan ontan met, sioparay makakaromog na kaligenan ed “abung” to nipaakar ed panagdayew?
6 Diad sarayan kaunoran ya agew, panon ya iyaasingger nen Jehova iray totoo tan lulukasan to’d sikara so “puerta na pananisia”? (Gawa 14:27, NW, paimano’d-leksab; 2 Timoteo 3:1) Say manunan dalan et lapud ipapaiyabawag to ed Tastasi to iray mensahe na kilalaban tan panangukom to sumpad sayan marelmeng a sistema na bengabengatla. (Isaias 43:12; 61:1, 2) Sayan sankamundoan a panangiyabawag so manmamayegmeg ed saray nasyon—a mangipapaniring ed makaderal a panangukom a magano lan onsabi. Ontan met, saray totoon “mabli” ed imaton na Dios so nipapaway manlapud sayan sistema tan makakaromog na kaligenan ed “abung” to nipaakar ed tuan panagdayew. Kanian susumpalen nen Jehova so mapropetiko iran salita to ya inkurit nen Aggeo: “Mayegmegen ko so amin a nasyon, tan saray makaparoyroyon bengatla na amin a nasyon so nepeg ya onsabi; tan panoen ko iyan abung na gloria.”—Aggeo 2:6, 7, NW, paimano’d-leksab; Apocalipsis 7:9, 15.
7. Panon a lulukasan nen Jehova so kapusoan na totoo tan iyaasingger iray indibidual ed inkasikato tan ed Anak to?
7 Lulukasan nen Jehova so kapusoan na sarayan ontatakot ed Dios—“saray pinilin maong a bengatla ed amin a nasyon”—ta pian sikaray “manimano ed saray bengatlan sasalitaen” na Tastasi to. (Aggeo 2:7, Jewish Publication Society; Gawa 16:14) Singa nen inmunan siglo, no maminsan et uusaren nen Jehova iray anghel to pian iwanwan iray Tastasi to ed masimoon a totoo a mankelyaw ed sikato parad tulong. (Gawa 8:26-31) Legan a naaamtaan na saray indibidual so nipaakar ed makapakelkelaw iran probisyon ya intarya na Dios ed sikara panamegley na Anak to, si Jesu-Kristo, sikaray niyaasingger ed si Jehova lapud aro to. (1 Juan 4:9, 10) On, iyaasingger na Dios so totoo ed inkasikato tan ed Anak to diad panamegley na “maaron-panangasi,” odino “matoor ya aro” To.—Jeremias 31:3, NW, paimanod-leksab.
Sioparay Iyaasingger nen Jehova?
8. Anton klase na totoo so iyaasingger nen Jehova?
8 Iyaasingger nen Jehova ed inkasikato tan ed Anak to iramay manaanap ed Sikato. (Gawa 17:27) Laktipen na saya so totoo a “mansibek tan manakis lapu ed amin a kadimlaan a nagagawa” ed Kakristianoan tan, diad tua, ed sankamundoan. (Ezequiel 9:4) Sikaray “sinononot ed espiritual a pankaukolan da.” (Mateo 5:3, NW) On, sikaray “mauyamo [“mapaabeba,” NW, paimanod-leksab] na dalin,” a manayam ya ando lan ando ed paraison dalin.—Sofonias 2:3, NW.
9. Panon a natebek nen Jehova no kasin saray totoo et “suston nikiling parad andi-anggaan a bilay,” tan panon ton iyaasingger iraya?
9 Nabasa nen Jehova so puso na too. Inkuan nen Arin David ed anak ton si Solomon: “Si Jehova usisaen to so saray amin a puso, tan natalosan to so saray amin a panisip na saray nonot. No sikato so anapen mo, sikato so naromog mo.” (1 Awaran 28:9) Base ed kipapasen na puso tan espiritu, odino manunan ugali, na indibidual, natalosan nen Jehova no kasin sikatoy maseguron onkiwas ed madibino iran probisyon parad kaperdona na kasalanan tan ed ilalon andi-anggaan a bilay ed matunong a balon sistema na Dios. (2 Pedro 3:13) Diad panamegley na Salita to, a pulongan tan bangatan na Tastasi to, ya iyaasingger nen Jehova ed inkasikato tan ed Anak to so ‘amin na saramay suston nikiling parad andi-anggaan a bilay,’ tan saraya so ‘magmaliw a mananisia.’—Gawa 13:48, NW.
10. Antoy mangipapanengneng ya anggapoy panangigeter diad agpangiyaasingger nen Jehova ed amin?
10 Kasin nibagan walay panangigeter la nen Jehova diad agto pangiyaasingger ed amin? Andin balot! Say pangiyaasingger na Dios ed totoo so mandependi ed dili ran mabiskeg a pilalek. Rerespetoen toy kawayangan dan mandesisyon. Iyaarap met nen Jehova ed saray manaayam ed dalin natan so parehon panpilian a singa nipaarap ed saray Israelita masulok lan 3,000 taon so apalabas, sanen inkuan nen Moises: “Inyan ko ed arap mo ed sayan agew so bilay tan kaabigan, tan patey tan say kaugsan. . . . Tawagen ko so tawen tan say dalin a manasi sumpa ed sika ed saya ya agew, ya inyan ko ed arap mo so bilay tan say patey, say bendision tan say ayew, sikato so makasengeg a pilien mo so bilay ta pian manbilay ka, sika tan say kapolian mo; say panangaro ed Jehova a Dios mo, say pananumpal [“italineng,” NW] ed bosis to tan say ipepeket ed sikato; ta sikato so bilay mo tan kinarukey na saray agew mo, ta pian makapanayam ka ed dalin ya insamba nen Jehova ed saray amam, a di Abraham, Isaac tan Jacob, ya iter ed sikara.”—Deuteronomio 30:15-20.
11. Panoy pamili na Israelitas ed bilay?
11 Imanoen a saray Israelita so mamili ed bilay ‘diad panangaro ed si Jehova, diad italineng ed bosis to, tan diad ipeket ed sikato.’ Sanen imbaga iratan, agni akayarian na baley na Israel so Insipan a Dalin. Wala nira labat ed saray Patar na Moab, ya ipaparaan day inkasikara ya ombeltang ed Ilog Jordan tan onloob ed Canaan. Anggaman natural labat so pangiteen day kanonotan da’d “maong tan maawang” a dalin “a panagusan na gatas tan dilo” a magano da lan nagamoran, say kagawa na saray ugagep da so mandependi ed panangaro ra’d si Jehova, italineng ed bosis to, tan ipeket ed sikato. (Exodo 3:8) Impalinew iya nen Moises, a kuanto: “No talinengen yo iray ganggan nen Jehova a Dios yo, ya igaganggan ko ed sikayo natan, ta pian aroen yoy Jehova a Dios yo, pian manakar ed saray dalan to tan unoren iray ganggan to tan saray pananontonan to tan saray hudisyal a desisyon to, diad ontan mansiansia kayon manbilay tan ondakel, tan si Jehova a Dios yo so mamendision ed sikayo ed dalin a kayarianen yo.”—Deuteronomio 30:16, NW.
12. Antoy ibangat ed sikatayo na alimbawa na saray Israelita nipaakar ed panagpulong tan panagbangat tayo?
12 Agta say asalambit so mangibangat ed sikatayo na bengatla a nipaakar ed panagpulong tan panagbangat a kimey ed sayan panaon na anggaan? Iisipen tayoy nipaakar ed onsabin Paraison dalin tan itotongtong itan ed ministeryo tayo. Balet agtayo nanengneng nisay saray babangatan tayo so kasumpalan na sipan no say gagala tayo odino sikara ed panlilingkor ed Dios et lapu labat ed sinisiblet iran rason. Singa saray Israelita, nepeg a sikatayo tan saramay babangatan tayo ya aralen ya ‘aroen si Jehova, talinengen so bosis to, tan ompeket ed sikato.’ No sankanonot tayo iya sano gagawaen tayoy ministeryo tayo, diad aktual et mitutulongan itayo ed Dios diad pangiyaasingger ed totoo ed sikato.
Saray Kakimeyan na Dios
13, 14. (a) Unong ed 1 Corinto 3:5-9, panoy pagmaliw tayon kakimeyan na Dios? (b) Siopa so nepeg a kipaarapan na galang nisesengeg ed dinanman ya indaak, tan akin?
13 Inyilustra nen Pablo so pitutulongan ed Dios diad impanukoy ed panagbayubo ed uma. Insulat to: “Siopa sirin si Apolos? Tan siopa sirin si Pablo? Saray ministros a lapu ed sikara so anisiaan yo; singa say inter na Katawan ed balang sinansakey. Siak so angitanem, si Apolos so analog; bangbalet say Dios so amabaleg. No ontan sirin say mantanem tan manalog andi gapo’ra, noag say Dios a sikato so mamabaleg. Natan say mantanem tan manalog saksakey ira: et balang sakey awaten to so upa ton dili ya unong na sagpo’to. Ta sikami kakimeyan na Dios: sikayo so dalin ya ataneman na Dios.”—1 Corinto 3:5-9.
14 Bilang kakimeyan na Dios, nepeg a sitotoor tayon itanem so “salita na panarian” ed kapusoan na totoo, insan salogen so dinanman ya apatnagan ya interes diad panamegley na pinaraanan a maong a panagpawil tan panangiyaral na Biblia. No say dalin, salanti say puso et maong, gawaen nen Jehova so betang ton pamabaleg ed bukel na katuaan na Biblia a pagmaliwen a mabungan tanaman. (Mateo 13:19, 23) Iyasingger toy totoo ed inkasikato tan ed Anak to. Sirin, diad unor a panganalisa, antokaman ya idaraak ed bilang na saray manangiyabawag na Panarian et lapud kimey nen Jehova ed kapusoan na totoo, a mamapabaleg ed bukel na katuaan tan mangiyaasingger ed saratan ed inkasikato tan ed Anak to.
Panagpaalagey a Kimey a Mansiansia
15. Anton ilustrasyon so inusar nen Pablo a mangipanengneng ed no panon tayon tulongan so arum a mamayubo na pananisia?
15 Anggaman panggagayagaan so idaraak, masimoon a kaliktan tayon nanengneng so totoo a mantultuloy a mangaro ed si Jehova, ontalineng ed bosis to, tan ompeket ed sikato. Naermenan itayo no nanenengneng tayoray totoon ombebetel tan onsisian. Wala tay antokaman a nagawaan tayo pian naamper iya? Diad sananey nin ilustrasyon, impanengneng nen Pablo no panon tayon natulongan so arum a mamayubo ed pananisia. Insulat to: “Anggapo so too a makapangiyan na arum ya angiletnegan nen say inyan la, a salanti si Jesu-Kristo. Et no siopaman a too mangipaalagey ed tapew na sayan angiletnegan, na balitok, pilak, batobato a mabli, kiew, dika ya amagaan, sengeg na dayami; balang kimey na too nipatnag: ta say agew ipaliwawa to, ta saya nipuyan ed apuy; tan say apuy a dili salien to no anto a nengneng na kimey na balang sakey.”—1 Corinto 3:11-13.
16. (a) Panon a say duaran ilustrasyon ya inusar nen Pablo et mandumaan ed gagala? (b) Panon a say panagpaalagey a kimey tayo et nayarin mansumpal ya agmagenap tan agmakaresisti ed apuy?
16 Diad ilustrasyon nen Pablo nipaakar ed uma, mandependi so itutubo ed maalalwar a panagtanem, maparanay a panagsalog, tan panamindision na Dios. Ipapabitar na sananey ya ilustrasyon na apostol so responsabilidad na Kristianon ministro parad pansumpalan na panagpaalagey to. Kasin sikatoy mangipapaalagey ed seguradon pundasyon a walaan na marakep iran klase na materyales? Impasakbay nen Pablo: “Imanoen komon na balang sakey no panon so pamaalagey to.” (1 Corinto 3:10) Diad impakasagyat ed interes na too panamegley na impangipaamta’d sikato nipaakar ed ilalon andi-anggaan a bilay ed Paraiso, kasin iyaapasakey tayo labat so panagbangat tayo ed saray manunan Makasulatan a pikakabat insan say kapaidanet et no antoy nepeg a gawaen na too pian nagamoran toy magnayon a bilay? Kasin say panagbangat tayo et nasegek labat ed onia: ‘No kaliktan moy manbilay ya ando lan ando ed Paraiso, nepeg a manaral ka, onatendi ed saray miting, tan manpulong’? No ontan, agtayo ipapaalagey so pananisia na sakey ed putel a pundasyon, tan say ipapaalagey tayo et agmakaresisti ed apuy na subsubok odino agmansiansia. Say panalin pangiyasingger ed totoo ed si Jehova panamegley labat na ilalon bilay ed Paraison dalin bilang kasalat na daiset a taon ya impanlingkor ed sikato et singa pangipapaalagey panamegley na saray ‘kiew, amagan dika, sengeg na dayami.’
Panangipaalagey ed Panangaro’d Dios tan si Kristo
17, 18. (a) Antoy nakaukolan ta pian mansiansia so pananisia na sakey? (b) Panon tayon natulongan so sakey pian niwalad puso to si Kristo?
17 Pian mansiansia so pananisia, nepeg a nibase itan ed personal a relasyon ed si Jehova a Dios panamegley nen Jesu-Kristo. Bilang ag-ayadyarin totoo, nadampot tayo itan a mareen a relasyon ed Dios panamegley labat na Anak to. (Roma 5:10) Tandaan ya inkuan nen Jesus: “Anggapo so ondateng ed Ama, noag dia ed panamegley ko.” Pian natulongan so arum a nipaalagey ed pananisia, “anggapo so too a makapangiyan na arum ya angiletnegan nen say inyan la, a salanti si Jesu-Kristo.” Antoy lalanoren na saya?—Juan 14:6; 1 Corinto 3:11.
18 Say kipaalagey ed si Kristo bilang pundasyon et kabaliksan toy pambangat ed paraan a nabayuboan na iyaaralan na Biblia so aralem a panangaro ed si Jesus diad panamegley na sigpot a pikakabat ed betang To bilang Mananondon, Ulo na kongregasyon, maaron Atagey a Saserdote, tan manuuley lan Ari. (Daniel 7:13, 14; Mateo 20:28; Colosas 1:18-20; Hebreos 4:14-16) Kabaliksan ton pagmaliwen a peteg si Jesus ed sikara a talagan sikatoy walad kapusoan da. Say pangipikasi tayo’d sikara so kaukolan a mipara ed kerew nen Pablo ed biang na saray Kristiano ed Efeso. Insulat to: “Lapu ed saya italimukor ko ’ray pueg ko ed arap na Ama, . . . a yabuloy to ed sikayo . . . pian manayam komon si Kristo ed saray kapusoan yo ed panamegley na pananisia; pian sano sikayo dia ed kaunoran, onlamot kayo tan ompasen kayo.”—Efeso 3:14-17.
19. Antoy nepeg a resulta na pangipaalagey na aro ed si Kristo ed kapusoan na saray iyaaralan tayoy Biblia, balet antoy nepeg ya ibangat?
19 No ontan a paraan so pangipaalagey tayo pian nabayuboan itan ya aro ed Kristo diad kapusoan na saray iyaaralan tayo, saya so makatunongan a manresulta ed kipaalagey na panangaro ed si Jehova a Dios. Say aro, liknaan, tan panangabagey nen Jesus so matoor a pakapatnagan na saray kualidad nen Jehova. (Mateo 11:28-30; Marcos 6:30-34; Juan 15:13, 14; Colosas 1:15; Hebreos 1:3) Kanian legan a nakakabatan tan aaroen na totoo si Jesus, nakabatan tan aroen da met si Jehova.a (1 Juan 4:14, 16, 19) Kaukolan tayon ibangat ed saray iyaaralan na Biblia a si Jehova so walad benegan na amin ya agawaan nen Kristo ed katooan kanian kanepegan tayoy misalamat, mangigalang, tan mandayew ed Sikato bilang “Dios a sikatoy kilabanan tayo.”—Salmo 68:19, 20; Isaias 12:2-5; Juan 3:16; 5:19.
20. (a) Panon tayon natulongan so totoo ya onapit ed Dios tan ed Anak to? (b) Antoy konsideraen ed ontumbok ya artikulo?
20 Bilang kakimeyan na Dios, tulongan tayo sirin so totoo ya onapit ed sikato tan ed Anak to, a tulongan iran mamayubo ed panangaro tan pananisia ed kapusoan da. Diad ontan et magmaliw a peteg si Jehova ed sikara. (Juan 7:28) Diad panamegley nen Kristo, makapangiletneg ira na maapit a relasyon ed Dios, tan sikatoy aroen da tan ompeket ed sikato. Agda geteran so maaron panaglingkor da ed sikato, a mangagamil na pananisia a nasumpal iray makapakelkelaw a sipan nen Jehova ed dugan panaon to. (Tagleey 3:24-26; Hebreos 11:6) Balet, legan tayon tutulongan so arum a mamayubo na pananisia, ilalo, tan panangaro, nepeg tayon ipaalagey so dilin pananisia tayo ta pian singa itan mabiskeg a barko a makayarin manuba ed alay kasil iran bagyo. Saya so konsideraen ed ontumbok ya artikulo.
[Paimano ed leksab]
a Sakey ya alay abig a tulong ed pangamtan nagkalalo ed si Jesus tan diad panamegley to, si Jehova ya Ama to, et say libron The Greatest Man Who Ever Lived, impalapag na Watchtower Bible and Tract Society of New York, Inc.
Bilang Repaso
◻ Panon so mabetbet a panasagyat tayo’d interes na totoo ed mensahe na Panarian, balet antoy walan kapeligroan?
◻ Anton klase na totoo so iyaasingger nen Jehova ed inkasikato tan ed Anak to?
◻ Diad anto so akadependian na pakaloob na Israel ed Insipan a Dalin, tan antoy naaralan tayo manlapud saya?
◻ Anton betang so gagawaen tayo ed pananulong ed totoo ya onapit ed si Jehova tan ed Anak to?
[Litrato ed pahina 10]
Anggaman inanatnat tayo ed totoo so ilalon andi-anggaan a bilay ed Paraiso, say manunan gagala tayo et say pangiyasingger ed sikara ed si Jehova
[Saray litrato ed pahina 13]
Magmaliw ya epektibon tuloy so panagpawil tayo no manparaan itayon maong