Makapansiansia Ta’d Apuy so Kimey Mo?
“Imanoen komon na balang sakey no panon so pamaalagey to ed tapew [na say pundasyon].”—1 CORINTO 3:10.
1. Anto so iilaloan na saray matoor a Kristiano nipaakar ed saray prospektibon babangatan?
SANKANENGNENG na sanasawan Kristiano so kapkapangiyanak ya ilalak da. Naiimano na sakey a manangipalapag na Panarian so magunaet, interesadon itsuray lupa na sakey ya iyaaralay Biblia. Apasikmatan na Kristianon matatken a manbabangat ed plataporma so balobalon interesado ed limog na dumerengel a magunaet a mamubukay ed Biblia to na kasulatan. Napnoy ilalo so kapusoan na sarayan matoor a lingkor nen Jehova. Natural labat a panumamengan da, ‘Kasin sayan too et aroen tan panlingkoran toy Jehova—tan mansiansian matoor?’ Siempre, aliwan automatiko so ontan a pansumpalan. Kaukolan a pankimeyan.
2. Panon a pinanonotan nen apostol Pablo iray Hebreon Kristiano nipaakar ed kaimportantian na panagbangat a kimey, tan anton dilin-panangusisa so nayarin makapanpakiwas ed sikatayo?
2 Bilang onsianon managbangat, indanet nen apostol Pablo so kaimportantian na panagbangat tan panaggaway babangatan a kimey sanen insulat to: “Nepeg yo la komon so managbangat, lapu ed inkabayag la na panaon.” (Hebreos 5:12) Saray Kristianon angipuntiryaan to et agtanton binmulaslas, no konsideraen so kabayag da lan mananisia. Aliwa labat ya ag-ira akaparaan a manbangat ed arum, kaukolan niran panonotan ed manuna iran aspekto na katuaan. Natan, magmaong no amin tayo et panapanaon a mangusisa ed saray abilidad tayo bilang managbangat tan nengnengen no panon tayon onaligwas. Walad kapeligroan iray bilay. Anto so nayarin gawaen tayo?
3. (a) Anto so angikomparaan nen apostol Pablo ed proseso na panaggaway Kristianon babangatan? (b) Bilang Kristianon managpaalagey, anton baleg a pribilihyo so walad sikatayo?
3 Diad pinalaknab ya ilustrasyon, inyaliling nen Pablo so panaggaway babangatan ed proseso na panangipaalagey na sakey a bilding. Ginapoan to diad impangikuan: “Sikami kakimeyan na Dios. Sikayo so dalin ya ataneman na Dios, sikayo so abung na Dios a paalageyen to.” (1 Corinto 3:9) Kanian mibibiang itayo ed panagpaalagey a kimey a manasaglawi’d totoo; ontutulong itayon mangipaalagey ed sikara diad pagmaliw dan babangatan nen Kristo. Gagawaen tayo itan bilang kakimeyan na samay Sakey ya “amaalagey ed saray amin a bengatla.” (Hebreos 3:4) Agaylan pribilihyo! Nengnengen tayo no panon itayon natulongan na apuyanan a simbawa nen Pablo ed saray taga-Corinto pian magmaliw itayon mas marunong ed kimey tayo. Nagkalautlan isentro tayo ed “arte na panagbangat” tayo.—2 Timoteo 4:2, NW.
Panangiletneg na Dugan Pundasyon
4. (a) Anto so betang nen Pablo ed Kristianon panagpaalagey a kimey? (b) Akin a nayarin nibaga a kabisado nen Jesus tan say dumerengel to so kaimportantian na maong iran pundasyon?
4 Ta pian magmaliw ya akapirmi tan malet so sakey a bilding, mankaukolan itan na maong a pundasyon. Kanian, oniay insulat nen Pablo: “Unong na grasya na Dios a niiter ed siak singa sakey a marunong a manangipaalagey, inyan ko so angiletnegan [“pundasyon,” NW].” (1 Corinto 3:10) Uusaren so mipadparan ilustrasyon, sinaglawi nen Jesu-Kristo so nipaakar ed abung ya akapansiansia ed indalan na bagyo lapud pinili na angipaalagey so putel a pundasyon. (Lucas 6:47-49) Kabkabisado nen Jesus so kaimportantian na saray pundasyon. Sikatoy presenti la sanen inletneg nen Jehova so mismon dalin.a (Uliran 8:29-31) Amta met na dumerengel nen Jesus so kaimportantian na maong iran pundasyon. Saray kaabungan lambengat ya akaletneg a maong so makapansiansia’d saray maples a delap tan yegyegyeg a sagpaminsan a nagawa diad Palestina. Balet, anto so pundasyon a walad kanonotan nen Pablo?
5. Siopa so pundasyon na Kristianon kongregasyon, tan panon iyan nipasakbay?
5 Insulat nen Pablo: “Anggapo so too a makapangiyan na arum ya angiletnegan nen say inyan la, a salanti si Jesu-Kristo.” (1 Corinto 3:11) Aliwan saya so pilpilimeron inkiyaliling nen Jesus ed sakey a pundasyon. Diad tua et onia lay impasakbay na Isaias 28:16: “Onia so kuan na Katawan a Jehova, ‘Nia, ipasen ko dia ed Sion so sakey a bato a nipaakar ed Sion a pangiletnegan, sakey ya asali a bato, sakey a bato a mabli a panukong na matalek a pangiletnegan.’” Abayaglan gagala nen Jehova a say Anak to so magmaliw a pundasyon na Kristianon kongregasyon.—Salmo 118:22; Efeso 2:19-22; 1 Pedro 2:4-6.
6. Panon so impangiletneg nen Pablo ed dugan pundasyon diad saray Kristianon taga-Corinto?
6 Anto so pundasyon parad sinansakey a Kristianos? Singa inkuan nen Pablo, anggapo lay arum a pundasyon parad tuan Kristiano noagta samay nidatak ed Salitay Dios—si Jesu-Kristo. Maseguron satan so pundasyon ya inletneg nen Pablo. Diad Corinto, a gagalangen a maong so pilosopiya et agto sinagyat so totoo diad minumundon kakabatan. Imbes, impulong nen Pablo “si Kristo ya impasak,” ya impulisay na nasyones bilang ontanlan “kakulangkulangan.” (1 Corinto 1:23) Imbangat nen Pablo a si Jesus so manunan persona ed saray gagala nen Jehova.—2 Corinto 1:20; Colosas 2:2, 3.
7. Antoy naaralan tayo ed impanukoy nen Pablo ed inkasikato bilang “sakey a marunong a manangipaalagey”?
7 Impaimano nen Pablo a ginawa to itan a panagbangat “[bilang] sakey a marunong a manangipaalagey.” Aliwan kapangtaan iyan balikas. Panamidbir lambengat itan ed makapakelaw a langkap ya inter nen Jehova ed sikato—salanti say panangorganisa odino panangidirehin kimey. (1 Corinto 12:28) Tua, andian ti la natan na mamilagro iran langkap a singa say niiter ed saray inmunan-siglon Kristiano. Tan nayarin agtayo ipapasen so inkasikatayo bilang alangkapan iran managbangat. Balet diad importantin pantalos et ontan itayo. Konsideraen pa: Iikdan itayo nen Jehova na masanton espiritu to pian natulongan itayo. (Ikompara so Lucas 12:11, 12.) Tan walaan itayoy aro ed si Jehova tan pikakabat ed manuna iran bangat na Salita to. Talagan makapakelaw irayan langkap ya usaren diad pangibangat ed arum. Komon ta determinado itayon usaren iratan pian makapangiletneg na suston pundasyon.
8. Panon tayon iletneg si Kristo bilang pundasyon na saray prospektibon babangatan?
8 Sano iletneg tayoy Kristo bilang pundasyon, sikatoy agtayo iprepresenta bilang pakaskasin ugaw ed atotong, nisay kapara nen Jehova diad sakey a Trinidad. Andi, say ontan iran agmakasulatan a sisiaen so mamormay pundasyon parad saray mankuankuanan a Kristiano. Imbes, ibabangat tayo a sikato so sankabalgan a toon nambilay ed kapiganman, ya insaklang toy ayadyarin bilay to nisesengeg ed sikatayo, tan sikato natan so tinuro nen Jehova ya Ari a manuuley la’d tawen. (Roma 5:8; Apocalipsis 11:15) Panggugunaetan tayo met a pakiwasen iray iyaaralan tayon mankurang ed saray bakat nen Jesus tan mangalig ed saray kualidad to. (1 Pedro 2:21) Labay tayoran natenyeg a maong ed seseg nen Jesus ed ministeryo, say panangabagey to ed saray apabpaabeba tan alames, say panangasi to ed saray managkasalanan a nabebelatan ed dilin kasalanan da, say agnagiing ya inkakpel to ed arap na saray pakasalsalian. Peteg, si Jesus so alay abig a pundasyon. Balet anto ni so ontumbok a gawaen?
Panangipaalagey Tekep na Dugan Materyales
9. Anggaman si Pablo so manunan manangiletneg na pundasyon, antoy papagaan to ed saramay angawat na katuaan na imbangat to?
9 Insulat nen Pablo: “No siopaman a too mangipaalagey ed tapew na sayan angiletnegan, na balitok, pilak, batobato a mabli, kiew, dika ya amagaan, sengeg na dayami, balang kimey na too nipatnag; ta say agew ipaliwawa to, ta saya nipuyan ed apuy; tan say apuy a dili salien to no anto a nengneng na kimey na balang sakey.” (1 Corinto 3:12, 13) Antoy labay ya ibaga nen Pablo? Konsideraen so kipapasen. Si Pablo so manunan manangiletneg na pundasyon. Diad saray impanbaroy to bilang misionaryo, biniahe toy nanduruman syudad, a nampulong ed dakel nin ag-akadngel nipaakar ed si Kristo. (Roma 15:20) Diad pangaawat na totoo ed katuaan ya imbangat to, aporma iray kongregasyon. Inasikason maong nen Pablo irayan matoor. (2 Corinto 11:28, 29) Balet, lapud kimey to et kinaukolan toy ombiahe. Kanian kayari na impangusar toy 18 bulan diad impangiletneg na pundasyon ed Corinto, sikatoy inmalis pian manpulong ed arum a syudad. Siansia, sikatoy interesado nin maong no panon so panusumpal na arum ed kimey a ginawa to diman.—Gawa 18:8-11; 1 Corinto 3:6.
10, 11. (a) Panon a pinandumaan nen Pablo so nandumaan a klase na materyales ed panagpaalagey? (b) Antoran klase na literal a paalagey so nayarin niwala ed kadaanan a Corinto? (c) Antoran klase na paalagey so maseguron makapansiansia’d apuy, tan anton praktikal a leksion so itatarya na satan parad saray Kristianon managgaway babangatan?
10 Ompatnag a makapuy so trabaho na arum a manpapaalagey ed tapew na pundasyon ya inletneg nen Pablo ed Corinto. Pian niwalwal so problema, pinandumaan nen Pablo so duaran klase na materyales ed panagpaalagey: balitok, pilak, tan ankablin batobato ed sakey a dapag; kiew, amagan dika, tan nanggapasan ed sananey a dapag. Nayarin naipaalagey so sakey a bilding manlapud marakep, malet, agnapoolan a materyales; odino nayarin magangganon nipaalagey so sakey diad pangusar na ibabantak, temporaryo, tan mipopool a materyales. Say bantog a syudad a singa say Corinto so seguradon napnoy palpaalagey ya ontan iran klase. Walaray makapasagyat a templon gawa’d angkakabaleg, ankabli iran bloki na bato, a nayarin tinapewan odino inarkosay balitok tan pilak.b Nayarin niliplipos na sarayan malmalet a bilding iray asingger ya alolong, abung-abung, tan lakoan a gawa’d ag-asudsoran a tabtabla tan naatepay dayami.
11 Antoy nagawa’d sarayan paalagey diad pool? Mabitar so ebat ed panaon nen Pablo a singa ed sikatayo met natan. Diad tua, say syudad na Corinto so kinonkesta tan pinoolan nen Romanon Heneral a Mummius nen 146 K.K.P. Seguradon aderalderal iray palpaalagey a gawa’d kiew, amagan dika, odino nanggapasan. Komusta balet iramay malmalet a paalagey a gawa’d bato, ya inarkosan na pilak tan balitok? Seguradon nansiansia iraya. Nayarin inagew-agew a nadadalan na saray iyaaralan nen Pablo ed Corinto iratan a paalagey—atatagey a bilding a gawa’d bato ya akapansiansia’d saray desyang ya aneral ed saray walad abay dan lupok a palpaalagey. Alay linew, sirin, so impangidanet nen Pablo ed punto to! Sano manbabangat, nepeg tayon ipasen so inkasikatayo bilang managpaalagey. Labay tayoy mankimey a walaay sankaabigan tan malmalet iran materyales. Diad ontan et maseguron mansiansia so nankimeyan tayo. Anto iratan a malet a materyales, tan akin a makanakanan usaren iratan?
Makapansiansia Ta’d Apuy so Kimey Mo?
12. Diad antoran paraan a palpalaran so panagpaalagey a kimey na arum ed saray Kristianon taga-Corinto?
12 Mabitar, alikas nen Pablo ya arum ed saray Kristiano ed Corinto so kapuykapoy a mangipapaalagey. Anto so problema? Singa ipapanengneng na konteksto, say kongregasyon so sinalot na inkaapag-apag, say panangitandoro ed saray personalidad na totoo anggaman ed pakapeligroay pankakasakey na kongregasyon. Ibabaga na arum a, “Siak kien ak nen Pablo,” bangbalet ta ipipilit na arum a, “Siak kien ak nen Apolos.” Mapatnag ya ikinkinon na arum so mismon kakabatan da. Kanian agmakapabigla a say nansumpalan et atmosperan walaay minumundon panag-isip, inuugaw ed espiritual, tan kasmak ya “imon tan siblangan.” (1 Corinto 1:12; 3:1-4, 18) Maseguron apatnagan irayan awawey diad panagbangat a nagagawa ed loob na kongregasyon tan diad ministeryo. Say resulta et palpalaran so kimey dan panaggaway babangatan, a singa impaalagey a gawa’d abeban klase iran materyales. Ag-itan makapansiansia ed “apuy.” Anto so apuy a sasalitaen nen Pablo?
13. Anto so irerepresenta na apuy diad ilustrasyon nen Pablo, tan ed anto so nepeg a kabisadoen na amin a Kristiano?
13 Wala so apuy ya aarapen tayon amin diad bilay—saray pakasubokan na pananisia tayo. (Juan 15:20; Santiago 1:2, 3) Kaukolan a kabaten na Kristianos ed Corinto, a singa met ed sikatayo natan, ya amin a babangatan tayoy katuaan so nasubok. No kapuykapoy so panagbangat tayo, nayarin walay makapasinagem iran pansumpalan. Impasakbay nen Pablo: “No say kimey na siopaman a too ya impaalagey to ed tapew na angiletnegan mansiansia, awaten to so sakey a tumang. Et no say kimey na bengatlan too naolam sikato so nalugi; et ingen ta sikaton dili nilaban; anggan singa lapu ed apuy.”c—1 Corinto 3:14, 15.
14. (a) Panon a nayarin “nalugi” iray Kristianon managgaway babangatan, ingen panon iran nayarin makagamor na kilalaban a singa diad panamegley na apuy? (b) Panon tayon nabawasan so kapeligroan ed pakalugi?
14 Talagan seryoso iratan a salita! Ansakisakit so pakanengneng ed sakey ya impasyan tinulongan pian magmaliw a babangatan, insan onsuko labat ed tukso odino panamasegsegang tan diad kaunoran et ontaynan ed dalan na katuaan. Ontanlay impangaksobi nen Pablo ed satan sanen inkuanton sagmaken tayoy inkalugi ed ontan iran kaso. Nayarin ontanlan kasakit so eksperiensia a say kilalaban tayo et adeskriben “singa lapu ed apuy”—singa toon apoolan so amin a kaykayarian to tan sikato labat so asalba. Diad biang tayo, panon tayon nabawasan so karisgo diad pakalugi? Mangipaalagey tekep na malet iran materyales! No ibabangat tayoray iyaaralan tayo ta pian sabien so kapusoan da, a pakiwasen iran mamabli ed saray ankablin Kristianon kualidad a singa say kakabatan, pakatebek, takot ed si Jehova, tan puron pananisia, diad ontan et mangipapaalagey itayo tekep na malet, agnapoolan a materyales. (Salmo 19:9, 10; Uliran 3:13-15; 1 Pedro 1:6, 7) Saramay makagamor ed sarayan kualidad so mantultuloy a manggaway linaway Dios; kien da so seguradon ilalo na pansiansian mabilay ed ando lan ando. (1 Juan 2:17) Balet, panon tayon nausar a praktikal so ilustrasyon nen Pablo? Konsideraen so pigaran alimbawa.
15. Diad antoran paraan so pakapanseguro tayo a napaliisan tayoy palpalaran a panagpaalagey a kimey no nipaakar ed saray iyaaralan tayoy Biblia?
15 Sano ibabangat iray iyaaralan na Biblia, kaukolan ya agtayon balot itandoro so totoo nen say si Jehova a Dios. Say kalat tayo et aliwan say pangibangat ed sikara a moriaen da itayon manunan lapuay kakabatan. Labay tayoran onnengneng ed si Jehova, ed say Salita to, tan ed say organisasyon to parad panangigiya. Diad satan a gagala, agtayo bengatbengat ya iyeebat iray dilin panmoria tayo ed saray tepet da. Imbes, ibangat tayoran manalmoy ebat, ya usaren so Biblia tan saray publikasyon ya intarya la na “[say] matoor tan makabat ya aripen.” (Mateo 24:45-47) Diad mipadparan rason, manalwar itayo ya agkakayarianen iray iyaaralan tayoy Biblia. Imbes a panimbelan so arum a mangipapanengneng na interes ed sikara, kaukolan tayon pasesegen iray iyaaralan tayo ya “ombaleg” ed panamabli ra, a kabaten tan apresiaen so mas dakel ni ed kongregasyon no nayadyari.—2 Corinto 6:12, 13.
16. Panon a makapanpaalagey iray mamatatken tekep na agnapoolan a materyales?
16 Walaan met na importantin betang iray Kristianon mamatatken diad panagpaalagey na saray babangatan. Sano manbabangat ira ed kongregasyon, panggunaetan day mangipaalagey tekep na agnapoolan a materyales. Nayarin mandurumaan a tuloy so abilidad ed panagbangat, eksperiensia, tan personalidad da, balet agda aanamoten irayan pandurumaan pian manangguyor na papatumbok dan dili. (Ikompara so Gawa 20:29, 30.) Agtayo amtan talaga no akin ya arum ed Corinto so mangibabagan, “Siak kien ak nen Pablo” odino, “Siak kien ak nen Apolos.” Balet segsegurado itayon anggapo ed sarayan matoor a mamatatken so angiyalibansa ed ontan a panag-isip a pansengegay inkaapag-apag. Ag-alarogan si Pablo ed ontan iray sentimento; mapuersa toran sinuppiat. (1 Corinto 3:5-7) Ontan met natan, sinononot iray mamatatken a say papastolan da et “pulok na Dios.” (1 Pedro 5:2) Ag-itan kien na siopaman a too. Kanian ontatalindeg a malet iray mamatatken sumpad antokaman a tendensia na pandomina na sakey a too ed pulok odino ed ulop na mamatatken. Basta napapakiwas iray mamatatken diad mapaabeban pilalek a manserbi ed kongregasyon, manabi ed kapusoan, tan ontulong ed saray karnero a manlingkor ed si Jehova ya intiron-puso, mangipapaalagey ira tekep na agnapoolan a materyales.
17. Panon a panggugunaetan na Kristianon atateng so mangipaalagey tekep na agnapoolan a materyales?
17 Panpapagaan met a maong na saray Kristianon atateng iyan pamaakaran. Agaylay pantintindek dan nanengneng so ananak dan manbilay ya ando lan ando! Kanian panpepelengan dan maong ya “ibangat a sankakulian” ed kapusoan na ananak da iray prinsipyo na Salitay Dios. (Deuteronomio 6:6, 7) Labay dan nakabatan na ananak da so katuaan, aliwan basta sakey a tugyop na totontonen odino panangikantoris ed saray salaysay, noagta bilang sakey a nagnap, makapatumang, tan maliket a dalan na bilay. (1 Timoteo 1:11) Ta pian nipaalagey daray ananak da diad pagmaliw a matoor a babangatan nen Kristo, panggugunaetan na maaron atateng so pangusar ed agnapoolan iran materyales. Maan-anos iran mikikimeyan ed ananak da, a tutulongan iran mangiwaklit ed saray kualidad a kagula nen Jehova tan mamayubo ed saray kualidad a kalkaliktan to.—Galacia 5:22, 23.
Siopa so Responsabli?
18. Sano ipulisay na sakey a babangatan so makapabunigas a bangat, akin ya ag-itan kasalanan na saramay manggugunaet a mangibangat tan mangipasal ed sikato?
18 Sayan diskusyon so mamapalesay importantin tepet. No sinmuawi ed katuaan so sakey a nanggunaetan tayon tulongan, kasin kabaliksan na satan a sinmaew itayo bilang managbangat—ya ompan angipaalagey tayo tekep na abeban klase a materyales? Aliwa met ya ontan. Maseguron napanonotan itayo ed saray salita nen Pablo a baleg a responsabilidad so pibiang ed panangipaalagey na saray babangatan. Labay tayon gawaen so amin a nasarag tayo ta pian maong so pakapangipaalagey tayo. Balet ag-ibabaga’d sikatayo na Salitay Dios ya akoen tayo so intiron responsabilidad tan kargo de konsiensia tayo sano onkasipa ed katuaan iramay tinulongan tayo. Walaray arum a sengegan a nalalanor nilikud ed mismon betang tayo bilang managpaalagey. Alimbawa, imanoen pay imbaga nen Pablo nipaakar ed anggan say managbangat a kapuykapoy so impankimey to ed sayan panagpaalagey a kimey: “Sikato so nalugi; et ingen ta sikaton dili nilaban.” (1 Corinto 3:15) No sayan managbangat et nayarin nilaban diad saginonor—anta say Kristianon personalidad a pinanggunaetan ton ipaalagey ed iyaaralan to so nilitrato bilang “naolam” ed mangapuy-apoy a subok—anto sirin so nibaga tayo? Segurado, pikuentaanan nen Jehova so iyaaralan a walaay manunan eebatan ed dili iran desisyon to no kasin sikato so manmatoor odino andi.
19. Anto so konsideraen tayo ed ontumbok ya artikulo?
19 Importantin tuloy so personal, odino sinansakey a responsabilidad. Mangaapekta itan ed balang sakey ed sikatayo. Diad espisipikon paraan, anto so ibabangat na Biblia nipaakar ed saya? Konsideraen iya na ontumbok ya artikulo tayo.
[Saray paimano ed leksab]
a Say “panangiletnegan na dalin” so nayarin manutukoy ed saray puersa na palsa a malmalet a manusuporta ed satan—tan say amin a planeta diad tawen. Niarum ni, say mismon dalin so agawa ya agbalot “nagalaw,” odino naderal.—Salmo 104:5.
b Say “batobato a mabli” a tinukoy nen Pablo so agtalagan ankablin batobato, a singa saray diamante tan sardio. Nayarin saratan et mablin batobato a parad panagpaalagey a singa say marmol, alabastro, odino graniso.
c Iyaalanganinan nen Pablo so kilalaban na, aliwan say managpaalagey, noagta say “kimey” na managpaalagey. Oniay impangipatalos na The New English Bible ed sayan bersikulo: “No mansiansia so paalagey na sakey a too, sikatoy natumangan; no napoolan itan, kaukolan ton akoen so inkalugi; tan ingen sikatoy makaliktar a mabilay, a singa ed pakaliktar na sakey manlapud apuy.”
Panon Yon Ebatan?
◻ Anto so “pundasyon” ed sakey a tuan Kristiano, tan panon itan a niletneg?
◻ Anto so naaralan tayo ed nanduruman klase na materyales ed panagpaalagey?
◻ Anto so irerepresenta na “apuy,” tan panon itan a nayarin ‘pakalugian’ na arum?
◻ Panon a nayarin makapangipaalagey iray managbangat na Biblia, mamatatken, tan atateng tekep na agnapoolan a materyales?
[Litrato ed pahina 9]
Diad dakel a karaanan a syudad, parehon walaray agnapoolan a bilding a gawa’d bato tan mas lupok iran paalagey