Panon Itayon Linmesa?

Diad unonan libroy Biblia ya Genesis, simpli labat so nabasa tayo no panon ya linmesa so universe: “Sanen gapo say Dios pinalsa to so saray tawen tan say dalin.” (Genesis 1:1) Kayarin pinalsa na Dios iray tanaman tan ayayep, pinalsa to so unonan totoo, si Adan tan Eva. Duma irad saray ayayep ta sarag dan ipanengneng iray ugali na Dios. Bulos met iran makapandesisyon. Kanian antokaman so gawaen da, responsabilidad da itan ed Dios. No unoren da iray ganggan to, magmaliw iran parte na gagala to bilang unonan atateng na amin a pamilya ed interon mundo ya nawalaay mareen, perpekto, tan agmanampot ya bilay.

Wala balet so sakey ya anghel, o espiritun pinalsa, ya sinambot ton usaren so too parad makasarilin plano to. Diad satan a ginawa to, sikatoy nagmaliw ya Satanas, ya say labay ya ibaga na satan et “Sumusumpa” o “Kontra.” Panamegley na sakey ya uleg, kinatongtong toy Eva, tan pinanisia ton mas maong so pansumpalan to no agto unorey Dios. Inunor nen Adan tan Eva si Satanas, kanian dineral day relasyon dad Amalsa ed sikara. Lapud makapuy so desisyon na unonan atateng tayo, ag-ira nambilay ya andi-angga tan impatawir dad sikatayon amin so kasalanan tan ag-inkaperpekto, kanian agtayo natakasan so patey.

Imbagan tampol na Dios ya sikatoy manggawa na solusyon pian nauman iyan makapaermen ya agawa tan naikdan na tsansa iray ilalak nen Adan ya nawalaay agmanampot ya bilay. Impasakbay na Dios ya walay “ilalak” o espisyal ya indibidual a maneral ed si Satanas tan ekalen to so amin ya irap ya inter nen Satanas, Adan, tan Eva. (Genesis 3:15) Siopa ’tan kasi? Kaukolan ya palabasen so panaon pian naamtaan no siopa itan ya “ilalak.”

Ginawa nen Satanas so anggaay nayarian to pian agnatuloy so gagala na Dios. Dinmakel so mauges a totoo. Kanian nandesisyon so Dios ya deralen ira panamegley na delap. Ingganggan toy matunong a toon si Noe ya mangipaalagey na biong a singa balbaleg a kahon ya onletaw ed danum, pian nisalba toy sarili to tan say pamilya to, ontan met ed saray ayayep ya ingganggan na Dios ya iloob to met ed biong.

Sakey taon kayari Delap, pinmaway ed biong si Noe tan say pamilya to ed dalin ya nilinisan na Dios. Balet agnin siansia sinmabi so nipasakbay ya “ilalak.”

​—Nabasa ed Genesis kapitulo 1-11; Judas 6, 14, 15; Apocalipsis 12:9.