Nanggaway Paraan so Dios Pian Nisalba Itayo

Impromisa na Dios ed si Abraham ya samay insipan ya “ilalak” et manlapud poli to. Panamegley na satan ya “ilalak,” nabendisyonan so “amin a nasyon.” (Genesis 22:18) Linmabas so panaon, say apo nen Abraham ya si Jacob et linmad Ehipto tan ditan binmaleg so pamilya to ya anggad nagmaliw ya bansan Israel.

Balet kalabas na dakel a taon, walay maruksan Faraon ed Ehipto ya angaripen ed saray Israelita. Imbaki na Dios si propetan Moises pian ibulos ira. Binelsay na Dios so Ambalangan Dayat tan ditan binmaliw iray Israelita. Kayari to, inikdan ira na Dios na ganggan, kaibad satan so Samploran Ganggan, pian nigiya tan naprotektaan to ra. Kaiba met ed saratan a ganggan no anto ray kaukolan ya ibagat pian naperdonay kasalanan da. Pinuyanan na Dios si Moises ya ibagad Israel ya Sikatoy mangibaki ed sikara na sananey nin propeta. Satan ya propeta et ontutukoy ed samay insipan ya “ilalak.”

Kalabas na manga limanlasus taon, impromisa na Dios ed si Arin David ya say onsabin “ilalak” so manuley ed panarian ya agbalot manampot. Sikato so Mesias, say Manangiliktar ya pinili na Dios ya mangisalba ed totoo tan mangipawil ed Paraiso diad dalin.

Panamegley nen David tan arum nin propeta, sandaraiset ya impaamta na Dios so arum nin impormasyon nipaakar ed Mesias. Impropesiya dan sikatoy mapaabeba tan maomaong, tan no sikatoy manuley la, anggapo lay eras, ag-inkahustisya, tan guerra. Wala lay kareenan, tan anggan saray ayayep et maamo la. Say sakit, irap, tan ipapatey—ya agtalaga kaibad orihinal ya gagala na Dios—et naandi la, tan saray inatey et ombilay lamet diad dalin.

Imbaga na Dios panamegley nen propeta Miqueas ya say Mesias et iyanak ed Betlehem. Tan imbaga met na Dios panamegley nen propeta Daniel ya say Mesias et pateyen. Balet bilayen na Dios so Mesias tan gawaen Ton Ari diad tawen. Impropesiya met nen Daniel ya onsabi panaon et salatan la na Mesianikon Panarian so amin ya gobierno. Talaga kasin walay sinmabin Mesias?

​—Nabasa ed Genesis kapitulo 22-50, ontan met ed Exodo, Deuteronomio, 2 Samuel, Salmos, Isaias, Daniel, Miqueas, Zacarias 9:9.