Kasin Antam La?
Kasin makapainsulto imay ilustrasyon nen Jesus tungkol ed “saray oken”?
Estatua na Griego o Romanon ugaw ya walay awit ton oken (manga first century B.C.E. anggad second century C.E.)
Aminsan, nen si Jesus et walad paway na ketegan na Israel, diad probinsya na Roma ya Sirya, walay Griegon bii ya inmasingger ed sikato pian onkerew na tulong. Angusar si Jesus na ilustrasyon ya singa to inkompara iray aliwan Judio ed “saray oken.” Diad Mosaikon Ganggan, saray aso et ipapasen ya marutak. (Levitico 11:27) Pero kasin iinsultoen nen Jesus iyan bii tan saray arum nin aliwan Judio?
Andi. Impaliwawa nen Jesus ed saray disipulo to ya say prayuridad tod saman ya panaon et say itulong tod saray Judio. Kanian angusar si Jesus na ilustrasyon diad ebat tod samay Griegon bii: “Agmanepeg ya alaen so tinapay na ugugaw insan ibuntok ed saray oken.” (Mateo 15:21-26; Marcos 7:26) Diad tua, labalabay na saray Griego tan Romano so man-alaga na aso tan panaayamen da ni ingen ed abung da tan pigagalawan na ugugaw. Kanian mapatnag ya ontan a panangasikaso tan panangaro so naisip na bii nen inusar nen Jesus so terminon “saray oken.” Atalosan na bii imay imbaga nen Jesus tan oniay ebat to: “On, Katawan; balet ta kakanen na saray oken iray mekmek a napepelag ed lamisaan na amo ra.” Pandinayewan nen Jesus so pananisia na sayan bii kanian pinaabig toy mansasakit ya anak to.—Mateo 15:27, 28.
Kasin duga imay suhestion nen apostol Pablo ya agni ituloy so pambiahe dad dayat?
Inukit ya litrato na baleg ya barko nensaman (first century C.E.)
Nairapan ya manbiahe so barko ya niluganan nen Pablo paonlad Italya ta agaylay kasil na dagem. Nen akasabi rad sakey ya daongan, inrekomenda nen Pablo ya agda ni ituloy so pambiahe da. (Gawa 27:9-12) Kasin duga so imbaga to?
Amta na saray marino nensaman ya delikado so manbiahe ed Dayat na Mediteraneo no panaoy ambetel. Diad kapegleyay Nobyembre anggad kapegleyay Marso, amta na totoo ya mairap so manbiahe ed dayat. Pero say pambiahe di Pablo et Setyembre odino Oktubre. Diad libron Epitome of Military Science, na Romanon writer ya si Vegetius (fourth century C.E.) impaliwawa toy panagbiahe ed satan ya dayat: “Wala ray bulan ya balibali manbiahe, diad arum a bulan et alanganin, tan saray arum ya bulan et imposible so manbiahe ditan.” Imbaga nen Vegetius ya nayari so manbiahe manlapud Mayo 27 anggad Setyembre 14, balet alanganin tan delikadoy manbiahe manlapud Setyembre 15 anggad Nobyembre 11 tan manlapud Marso 11 anggad Mayo 26. Seguradon amta itan nen Pablo ta lanang ya manbiabiahe. Seguradon amta met itan na kapitan tan akanggaway barko, balet agda dinengel so imbaga nen Pablo. Agaygay laingen so barko lapud bagyo.—Gawa 27:13-44.