Ligliwaen Iray Maneermen
1. Akin a mankaukolan na ligliwa iray maneermen?
1 Say kaandi na inad-aro et makapaot-ot ya eksperiensya, nagkalalo la ed saramay andian na ilalo nipaakar ed Panarian. (1 Tes. 4:13) Dakel so mabetbet a manuumameng: ‘Akin ya ompapatey so totoo? Iner so lalaen da? Kasin nanengneng tayo lamet iray inad-aro tayo?’ Saray onggendan so pigaran suhestion ed pangiter na ligliwa ed saramay naabet tayo ed lawak na serbisyo a maneermen lapud impatey na kanayon odino kaaro ra.—Isa. 61:2.
2. No ibaga na unabung a sikatoy maneermen, kasin naynay a panggunaetan tayon dukeyan so pampulong?
2 Diad Kabkaabungan: Nayarin ibaga na sakey ya unabung a sikatoy agano nin inateyan. Kasin sikatoy pirmin maneermen? Kasin walaray kakanayon ed abung a maneermen? Diad saratan a situasyon, maabig no magano labat so pampulong. (Ecl. 3:1, 7) Nayarin ibalikas tayoy simpatya tayo, ikdan na matukoy a tract, magasin, odino brosyur, insan manpatanir la. Insan nayari itayon ompawil ed matukoy a panaon pian inabang a nagkalalo so makaligliwan mensahe manlapud Biblia.
3. No iyabuloy na saray sirkumstansya, antoran teksto so nayarin ipanengneng ed maneermen ya unabung?
3 Ompan diad sananey a situasyon et natebek tayo a nayarin dakel so ibaga ed primeron ibisita. Anggaman aliwa iyan pankanawnawa pian suppiaten iray aliwan panmoria, nayarin ibasa tayo ed sikara iray sipan na Biblia nipaakar ed kikioli. (Juan 5:28, 29) Odino nayari tayon inabang so ibabaga na Biblia nipaakar ed kipapasen na inaatey. (Ecl. 9:5, 10) Nayarin makaligliwa met so salaysay na Biblia nipaakar ed kikioli. (Juan 11:39-44) Say sananey nin pampilian et say pangonsidera ed saray balikas na ilalo ed si Jehova ya imbesngaw nen matoor a Job. (Job 14:14, 15) Antis ya onalis, nayarin iyopresi tayo so Antoy Nagagawa ed Sikatayo Sano Inatey Itayo?, Sano Naandi’d-bilay so Pinabli Yo, odino sananey a matukoy a brosyur odino tract. Odino nayarin mangitilak itayo na libron Ibabangat na Biblia, ya ipaimano so impormasyon ed kapitulo 6, tan iyuksoy so nagkalalon paningbat ed tema sano ompawil.
4. Antoray arum a pankanawnawa a makapangitarya itayo na ligliwa?
4 Diad Arum ni ran Situasyon: No say panlalamayan et diad Kingdom Hall, wala kasi iray aliwan Tasi? Nayarin ikdan ira na literatura a mangitatarya na ligliwa. Arum a panaglamayan et apresyaen day nawalaan na pigaran matukoy a literatura ya iter ed saray maneermen iran pamilya. No maminsan, wala iray paimano ed dyaryo ya angilukas na pankanawnawa parad pangisulat na antikey a makaligliwan mensahe ed pamilyan maneermen. Diad sakey ya inkagawa, kayarin akaawat na sulat ya angilaktip ed pigaran tract so sakey ya abalon laki tan say marikit to, sikatoy linma ed abung na manangipalapag tan intepet to: “Sikay angipawit na sayan sulat ed siak? Labay koy makaaral ni nipaakar ed Biblia!” Say laki tan say marikit to so impaiyaralan na Biblia tan onaatendi la ed saray pantitipon na kongregasyon.
5. Akin a nepeg itayon alerto ed saray pankanawnawa a manligliwa ed saramay maneermen?
5 Ibabaga na Eclesiastes 7:2: “Magmaong so yakar ed abung a panagogolan nen say yakar ed abung a panliketan.” Kaslakan lan mas ondengel ed Salita na Dios iray totoon maneermen nen saramay manliliket. Amin tayo so nepeg ya alerton mananap na matukoy iran pankanawnawa a manligliwa ed saramay maneermen a naandian na inad-aro.