“Ala Yoy Pakok”
1 Diad mundo a pirmi so desdes tan kapagaan, nalilikna tayo so peteg ya inawa diad pangawat ed maligsan imbitasyon nen Jesus a panakbat ed pako to. (Mat. 11:29, 30) Say pangawat ed pako na pagmaliw a babangatan et laktipen toy pibiang ed kimey ya aliwa labat a makapaliket noagta pakainawaan met. Lalaktipen na satan so pangipulong ed maong a balita na Panarian tan panulong ed arum a nainawaan met diad panakbat ed anlemew a pako nen Jesus.—Mat. 24:14; 28:19, 20.
2 Pakainawaan so Ministeryo: Agkinerew nen Jesus ed saray papatumbok to ya iyarum so awit to ed awit da. Noagta, iimbitaan to iran isalat so ambelat ya awit da ed anlemew ya awit to. Diad ontan et agtayo la nabelatan ed saray kapagaan tan kaandian na ilalo ed sayan sistema na bengabengatla; nisay mantalikarkar a mananap na agmansiansian kayamanan. (Luc. 21:34; 1 Tim. 6:17) Anggaman okupado itayo tan nepeg itayon mankimey pian nagamoran tayo iray nakaukolan tayo ed inagew-agew, isesentro tayoy bilay tayo ed panagdayew ed Dios. (Mat. 6:33) Naimano tayo a lawas pakainawaan so ministeryo, aliwan pakabelatan, no pansiansiaen tayo so dugan panmoria ed no anto so sankaimportantian.—Fil. 1:10.
3 Natural labat a labalabay tayon itongtong so panliliketan na puso tayo. (Luc. 6:45) Papablien a maong na amin a Kristiano si Jehova tan saray bendisyon na Panarian ya insipan to. Kanian, agaylan pakainawaan so pangitongtong ed “saray magayaga a balita na saray maong a bengatla” tan lingwanan iray kapagaan tayo legan a walad ministeryo! (Roma 10:15) Siempre, no say sakey a bengatla et naynay tayon gagawaen, lalon nipasal itayo tan lalon naliketan itayo. Kanian, lalon pakainawaan so pangigana na dakel a panaon ed ministeryo, no sarag tayo. Talagan makapalikliket no onkiwas iray totoo ed panagpulong tayo! (Gawa 15:3) Anggano makaabet itayoy ag-interesado odino onsumpa, say ministeryo tayo so mangitarok na espiritual a pakainawaan no lawas tayon nonoten a saray sagpot tayo so mamaliket ed si Jehova tan antokaman a maabig iran resulta et lapud panamendisyon to.—Gawa 5:41; 1 Cor. 3:9.
4 Diad pangawat ed imbitasyon nen Jesus, panggayagaan tayo so pribilehyo a panlingkor a kaiba to bilang Tasi nen Jehova. (Isa. 43:10; Apo. 1:5) Anggapo lay pakainawaan nen say satan!