Say Sankaimportantian a Kimey
1. Antoran sakripisyo so akaparaan tayon gawaen lapud aralem ya apresasyon tayo ed ministeryo?
1 Akin a napapaseseg itayon naynay a mangusar ed panaon, biskeg, tan amin a walad sikatayo parad ministeryo? Lapud anggapo lay mas importantin kimey nen say saya! Say pandalepdep tayo ed alay-abig ya epekto na satan so mamabiskeg na pilalek tayon mibiang ed sayan aglan balot naulit a kimey.—Gawa 20:24.
2. Panon a makatulong so panagpulong tayo pian napasanto so ngaran nen Jehova?
2 Mamasanto ed Ngaran nen Jehova: Idadanet na panagpulong a kimey a say Panarian nen Jehova, panamegley nen Kristo Jesus so manalat ed amin a gobierno na too tan mangitarya na solusyon ed amin a problema na katooan. (Mat. 6:9, 10) Nigloria si Jehova bilang say alenleneg a makapangiliktar ed sikatayo manlapud sakit tan ipapatey. (Isa. 25:8; 33:24) Lapud atawag itayon Tasi nen Jehova, saray makakaimaton ed maabig a kondukta tan seseg tayo so nayarin mangigloria met ed sikato. (1 Ped. 2:12) Talagan pribilehyo tayo so pangipakabat ed ngaran na Soberanon Katawan a Jehova diad interon mundo!—Sal. 83:18.
3. Antoran bendisyon so nagamoran na saramay onkiwas ed mensahe na Panarian?
3 Mangisalbay Bilay: Aglabay nen Jehova a “naderal so siopaman noagta labay to a makapambabawi so amin.” (2 Ped. 3:9) Ingen, no anggapoy mangibangat ed saray totoo, panon dan naamtaan iray konduktan ikokonsidera nen Jehova a matunong tan agmatunong? (Jon. 4:11; Roma 10:13-15) Sano onkiwas iray indibidual ed naaaralan dan maong a balita, onaligwas so kipapasen na panagbilay da legan dan itutunda iray marutak a kondukta ra. (Miq. 4:1-4) Kaaruman ni, nawalaan iray maliket ya ilalon manbilay na andi-angga. Say maseseg a panagpulong tan panagbangat so mangiliktar ed sikatayo ontan met ed saramay ondengel ed sikatayo. (1 Tim. 4:16) Talagan sakey a kagalangan so pakapibiang ed sayan sankaimportantian a kimey!
4. Akin a nakaukolan itayon magmaliw a maseseg ed panagpulong tan panaggaway babangatan a kimey?
4 Agla manbayag et biglan panganggaen na baleg a kairapan iyan marelmeng a mundo. Ingen, saraman labat so dinmapag ed si Jehova so niliktar. Kanian say panagpulong tan panaggaway babangatan so sankaganatan, sankaimportantian, tan sankaabigan a kimey a nagagawa natan. Komon ta satan so prayuridad tayo!—Mat. 6:33.