Pangipakabat ed Madibino a Ngaran
1. Anto so epekto ed totoo na impakaamta ra ed personal a ngaran na Dios?
1 Antoy reaksion yo nen primero yon naamtaan so ngaran na Dios? Say reaksion na karaklan et mipara ed samay reaksion na sakey a bii ya angikuan: “Nen primeron anengneng ko so ngaran na Dios ed Biblia, akanangis ak. Apakiwas ak a maong diad impakaamta a nayarian ko manaya a nakabat tan usaren so personal a ngaran na Dios.” Parad sikato, say impakaamta ed madibinon ngaran so importantin kundang pian nakabat si Jehova bilang sakey a persona tan napaelet so relasyon ed sikato.
2. Akin ya inkaganatan parad sikatayo ya ibangat ed arum so nipaakar ed si Jehova?
2 Akin ya Ipakabat? Say ngaran na Dios so misiglaotan ed saray kalidad, gagala, tan gawa to. Misiglaotan met itan ed kilalaban. “Siopaman ya ontawag ed ngaran [nen Jehova], nilaban,” so insulat nen apostol Pablo. Balet “panon sirin so panawag da ed saman,” so inkatunongan nen Pablo, likud no amtaen ya unona na totoo so nipaakar ed si Jehova tan mangagamil na pananisia ed sikato? Kanian, inkaganatan parad saray Kristiano ya ipakabat ed arum so ngaran na Dios tan amin ya irerepresenta na satan. (Roma 10:13, 14) Balet, wala ni mas ambelat a rason no akin a nepeg ya ipakabat so madibinon ngaran.
3. Anto so manuna a rason ed panagpulong tayo?
3 Nen dekada na 1920, atebek na totoo na Dios manlapud Kasulatan so sankatalbaan ya isyu a nalalanor so kiyalangon na inkasoberano na Dios tan panamasanto ed ngaran to. Antis a deralen nen Jehova so marelmeng pian ekalen so panamabanday ed ngaran to, nepeg a “nakabatan na amin a dalin” so katuaan nipaakar ed sikato. (Isa. 12:4, 5; Eze. 38:23) Kanian, say manuna a rason ed panagpulong tayo et pian nidayew si Jehova ed mapublikon paraan tan napasanto so ngaran to ed arap na amin a katooan. (Heb. 13:15) Say aro ed Dios tan ed kaparan too so mamakiwas ed sikatayo a sigpot a mibiang ed sayan inter na Dios a kimey.
4. Panon a saray Tasi nen Jehova so nabibidbiran unong ed ngaran na Dios?
4 “Totoo a Nipaakar ed Ngaran To”: Nen 1931 inawat tayo so ngaran a saray Tasi nen Jehova. (Isa. 43:10) Manlapu la’d saman, impakabat na totoo na Dios so madibinon ngaran ed ontan lan kalaknab kanian oniay inkuan na libron Proclaimers, diad pahina 124: “Diad interon mundo, siopaman a mabulos a manguusar ed ngaran a Jehova so tampol a bibidbiren bilang sakey ed saray Tasi nen Jehova.” Kasin bibidbiren ka a sakey ed saratan? Nepeg a pakiwasen itayo na pisasalamat ed kaabigan nen Jehova a ‘mangigalang ed ngaran to,’ ya itongtong so nipaakar ed sikato diad kada matukoy a pankanawnawa.—Sal. 20:7; 145:1, 2, 7.
5. Panon a nasasaglawi so kondukta tayo diad pangaakbibit ed ngaran na Dios?
5 Bilang “totoo a nipaakar ed ngaran to,” nepeg ya itandoro tayo iray estandarte to. (Gawa 15:14; 2 Tim. 2:19) Mabetbet a say naiimanon tampol na totoo nipaakar ed saray Tasi nen Jehova et say maabig a kondukta ra. (1 Ped. 2:12) Agtayon balot labay a naderal so ngaran to diad panmudmora ed saray maridios a prinsipyo odino diad pangipasen ed panagdayew tayo ya onkokomadua lambengat. (Lev. 22:31, 32; Mal. 1:6-8, 12-14) Imbes, komon ta ipatnag na dilin kabibilay tayo a papablien tayo so pribilehyo a pangaakbibit ed madibinon ngaran.
6. Anton pribilehyo so panggayagaan tayo natan tan ed ando lan ando?
6 Natan, naiimatonan tayo a nasusumpal so deklarasyon nen Jehova: “Manlapu ed leletakan na banwa angga ed seselekan, say ngaran ko sikato naani baleg ed saray Gentil.” (Mal. 1:11) Itultuloy tayon ipakabat so katuaan nipaakar ed si Jehova tan “galangen [so] masanton ngaran to ed lawas lan lawas.”—Sal. 145:21.