‘Napasanto Komon so Ngaran na Dios’
1. Anto so tema na programa na sirkiton asemblea parad 2012, tan antoy angibasiyan ed satan?
1 Agaylan pribilehyo so pakatawag ed ngaran na Soberano ed Uniberso, si Jehova! Mismon say Dios so angiter ed sikatayo na satan a ngaran pian irepresenta tayo, nagkalalo la manlapud nen taon 1931 ta akabat itayo ed satan ya nikabkabiig a ngaran to, bilang saray Tasi nen Jehova. (Isa. 43:10) Pinablin maong nen Jesus, say bogbogtong ya Anak na Dios, so ngaran na Ama to. Inyuna to itan ed imbangat ton pikakasi. (Mat. 6:9) Saray salita nen Jesus so angibasiyan na tema na programa na sirkiton asemblea tayo parad 2012, salanti, ‘Napasanto Komon so Ngaran na Dios.’
2. Anton impormasyon so nepeg tayon talaranan?
2 No Antoy Narengelan Tayo: Diad Sabado, nipaliwawa ed teman “Ipakabat so Ngaran na Dios Bilang Sigpot-Panaon Iran Lingkor” no akin a say panlingkor a sigpot-panaon et sankaabigan a gawaen ed bilay. Narengelan tayo met so simposium ya “Alwaran Yoy Makapanggawa na Pakabalawan ed Ngaran nen Jehova,” ya ontulong ed sikatayo pian agnabiktima na apatiran bengatla a nayarin makapatit ed sikatayo. Saray tepet ya, Antoy makatulong ed sikatayo pian maseseg a manpulong anggan singa agtanton interesado iray totoo? tan, Antoy ontulong ed sikatayo pian magmaliw a maaligwas so ministeryo tayo? so naebatan ed teman “No Akin a Nepeg ya Pasantosen so Ngaran na Dios.” Diad Simba, naliketan tayod apatiran parte a simposium nipaakar ed no panon tayon pasantosen so ngaran na Dios diad saray nononoten, panagsalita, desisyon, tan kondukta tayo. Nagkalalon naapresya na saray balo ni so publikon paliwawa ya “Pasantosen nen Jehova so Matalonggaring a Ngaran To Diad Armagedon.”
3. Anto so pribilehyo tayo, tan panon ya makatulong so programa ed sikatayo?
3 Magano lan pasantosen nen Jehova so ngaran to. (Eze. 36:23) Legan tayon aalagaren itan, walaan tayo na alay abig a pribilehyo ya itandoro so amin ya irerepresenta na masanton ngaran nen Jehova. Seguradon ontulong iyan programa ed balang sakey ed sikatayo ya sumpalen so importantin responsabilidad tayo bilang natatawag ed ngaran na Dios.