Aglilimitaay Nagawaan Mo—Anggano Busy Ka
1. Akin et wala ray agmangiyoopresi na panagaral na Biblia?
1 Wala ray agmangiyoopresi na panagaral na Biblia ta busy ra. Say pangasikasod iyaaralan et mankaukolan na panaon. Singa bilang, kaukolan so panaon no manparaan antis a man-study, no mangiyaaral, tan no ontulong ed iyaaralan pian nasarag iray problema to. Imbaga nen apostol Pablo ya inusar toy panaon to pian tulongan iray taga Tesalonica a nakabat si Jehova. (1 Tes. 2:7, 8) Panon tayon makapangiyaral anggano busy tayo?
2. Lapud inaro tayoy Jehova, panon tayon uusarey panaon tayo?
2 Kaukolay Panaon ed Panagdayew: Talagan kaukolay panaon ed panagdayew. Singa bilang, regular tayon mangigaganay oras pian miaral, manpulong, manbasay Biblia, tan manpikasi. No say sanasawa anggano busy et maliket ya mangiter na panaon ed asawa to, agta mas maliket tayon ‘anamoten’ so panaon ya idayew si Jehova lapud sikatoy inaro tayo? (Efe. 5:15-17; 1 Juan 5:3) Unong ed si Jesus, importantin kabiangan na panagdayew tayo so panaggaway babangatan. (Mat. 28:19, 20) Say pannonot ed saya so ontulong ed sikatayon agmagmaliw a talawan a mangiyaral na Biblia.
3. Panon tayon naasikaso iray iyaaralan tayo no bilang agtayo natumbok so eskedyul tayod ministeryo?
3 Balet panon to no agtayo natumbok so eskedyul tayo lapud trabaho, graben sakit, odino teokratiko iran asainmin? No maminsan, saray arum ya agagi et mangiyaaral panamegley na telepono odino kompyuter. Saramay walaay graben sakit et iimbitaan dad abung da iray iyaaralan da pian makapan-study. Papaiyaralan na arum ya agagi iray study da no ag-ira makaonla.
4. Anto ray bendisyon no walay iyaaralan tayoy Biblia?
4 Malikeliket si Pablo diad impangusar toy panaon tan biskeg to pian tulongan so arum a makaamtad katuaan. (Gawa 20:35) Sanen ninodnonot to iramay atulongan tod Tesalonica, sikatoy misalsalamat ed si Jehova. (1 Tes. 1:2) Kanian, no makapangiyaral tayoy Biblia anggano busy tayo, lalon maliket so ministeryo tayo.