Agmansusuyat!

1. Diad anton dalan a sikatayoy ‘agmasuyat a manggagawa na maong’?

¹ No aktibo tayon mangipupulong na maong a balita na Panarian na Dios, sikatayoy ‘agmasuyat a manggagawa na maong’ diad saray teritorya tayo. (Uli. 3:27) Anggapo lay magmaong a mensahen ninabang tayo ed arum noagta say nipaakar ed onsabin marakdakep a panaon diad pananguley na Dios. Anggaman nayarin maseseg ka lan mangipupulong na ilalo na Panarian diad impormal a paraan odino diad panangipalima na babasaen, agta mas maabig no gawaen mo met a kalat so pakapangikondukta na pangiyaral na Biblia, no bilbilang ta anggapo ni?

2. Anto so nayarin babeng ed pakapangiyaral na Biblia?

² No maminsan, say manunan babeng ed pakapangiyaral na Biblia et say mismon liknaan tayo. Masuyat iray arum a mangikondukta lapud anggapoy kompiyansa ra odino okupado ira. Saray onggendan a suhestion so makatulong pian magmaliw kan alisto imbes a masuyat a mangiyaral na Biblia.​—Mat. 28:19; Gawa 20:20.

3. Akin a kualipikado itayon manbangat na Biblia?

³ Anggapoy Kompiyansa: Ompan limitadoy edukasyon yo odino lapud antokaman nin rason et kulang kayoy kompiyansa ed abilidad yon mangiyaral na Biblia. Saray epektibo a Kristianon ministro nen inmunan siglo et “andi aral tan kabanyakan.” Anto balet so tinmulong ed sikara pian nibangat day katuaan ed arum? ‘Akiulop-ulop ira ed Jesus.’ (Gawa 4:13) Sikaray akapanaral ed Sankamaongan a Managbangat, si Jesus, a saray bangat tan paraan to et nisulat ed Biblia parad sikatayo. Sirin, anggaman limitadoy edukasyon mo, sika so makakaawat na anggapoy kaparan espiritual ya edukasyon.​—Isa. 50:4; 2 Cor. 3:5.

4. Antoy naaralan tayo ed alimbawa nen Amos?

⁴ Pian baaten so makasalanan iran manuley odino saray arum a walad atagey a posisyon, no maminsan et uusaren nen Jehova iray propeta. Say arum ed sikara, a singa si Amos et ordinaryo labat a too. Oniay inaksobi nen Amos: “Siak aliwa ak nen saman a propeta, tan aliwa ak met ya anak na propeta, noag ingen bantay ak nen saman na pulok, tan manaalila ed saray kiew a sikomoro.” (Amos 7:14) Anggaman ontan, agmasuyat si Amos ya angipasabi na mensahen panangukom ed si Amasias, saserdoten mandadayew ed kilaw a baka. (Amos 7:16, 17) Nepeg tayon lawas nonoten a say gagawaen tayo et kimey na Dios, tan sigpot a kinlongan to itayo pian onkualipika ed sayan kimey.​—2 Tim. 3:17.

5. Akin a panggunaetan tayo so pakapangigapoy panangiyaral na Biblia anggaman okupado tayo?

⁵ Okupadon Bilay: Anggano okupado ka, nayarin akapangigana ka la na panaon pian regular a makapibiang ed ministeryo. Say panangiyaral na Biblia et sakey ed saray sankaliketan a kabiangay ministeryo. Sakey a pribilehyo a naimatonan tayo so iyeepekto na Salita nen Jehova ed bilay na sakey a too. (Heb. 4:12) Naliliketan si Jehova no mansasakripisyo tayo pian tulongan so sakey ya ‘ondago ed pakapikabat ed katuaan.’ (1 Tim. 2:4) Anggan saray anghel et manliket sano say sakey et manguman ed datin kurang to tan onaligwas ed espiritual.​—Luc. 15:10.

6. Anto so nikadkaduma a pribilehyo tayo diad panusumpal ed linaway Dios?

⁶ Say ‘labay na Dios et amin a totoo so nilaban, tan ondago ed pakapikabat ed katuaan.’ (1 Tim. 2:4) Agaylan nikadkadumay pribilehyo tayo ta mankikimey itayo unong ed linawa na Dios diad agtayo pansusuyat a mangiyaral na Biblia!