Saray Reperensya Parad Workbook ed Aral
NOBYEMBRE 4-10
KAYAMANAN ED SALITA NA DIOS | 1 JUAN 1-5
“Agyo Aaroen so Mundo Odino Saray Bengatlan Walad Mundo”
(1 Juan 2:15, 16) Agyo aaroen so mundo odino saray bengatlan walad mundo. Siopaman a mangaaro ed mundo et anggapoy panangaro tod Ama; 16 ta amin a bengatlan walad mundo—say pilalek na laman tan say pilalek na mata tan say panangipangta na sakey ed saray kaykayarian to—et agmanlalapud Ama, noagta manlalapud mundo.
Tumboken so Pangaligan ya Inletneg nen Jesus
13 Nayarin ikatunongan na arum a totoo ya aliwan amin a bengatla ed mundo et mauges. Anggaman tua itan, say mundo tan saray pakasagyatan ditan so mainomay a mangisuawi ed sikatayo manlapud panagserbi ed si Jehova. Tan anggapo so niyoopresi na mundo a mamaapit ed sikatayo ed Dios. Kanian, no naaaro tayo la iray bengatla ed mundo, anggan saray bengatlan agmet mauges, sikatayoy mankukurang a mapeligro. (1 Timoteo 6:9, 10) Nilikud ni ed satan, maslak ed mundo et talagan mauges tan nayarin mangapekta ed sikatayo. No manbabantay itayo na saray pelikula odino programa ed telebisyon a mangipaparungtal na karawalan, materyalismo, odino seksual ya imoralidad, saratan so nayarin awaten tayo la tan magmaliw a tukso ed sikatayo. No milimog itayo ed totoon say manunan interes da et say iyaligwas na estilo na kabibilay da odino iyasenso na negosyo ra, saratan a bengatla so magmaliw met lan manunaan ed sikatayo.—Mateo 6:24; 1 Corinto 15:33.
(1 Juan 2:17) Niarum ni, say mundo tan say pilalek na satan et naandi, balet samay manggagawa na linawa na Dios et mansiansia ya anggad angga.
Nonoten No Antoy Nepeg ya Inkatoom
18 Say sakey nin makatulong pian nipulisay tayo ray “bengatlan walad mundo” et no tandaan tayo iyan imbaga nen Juan: “Say mundo tan say pilalek na satan et agmansiansia, balet samay manggagawa na linawa na Dios et mansiansia ed andi-anggaan.” (1 Juan 2:17) Diad pakanengneng na totoo, singa permanente iyan sistema nen Satanas. Balet onsabi so agew ya mangangga itan. Ag-itayo nasagyat ed saray tukso nen Satanas no tandaan tayo ya asingsingger lan manampot iyan mundo to.
Pankotkot na Espiritual a Kayamanan
(1 Juan 2:7, 8) Sikayo ran inad-arok, say isusulat kod sikayo et aliwan balon ganggan, noagta daan a ganggan a wala lad sikayo manlapud gapo. Sayan daan a ganggan et samay salitan nadngel yo. 8 Balet, isusulat ko ed sikayo so balon ganggan, say ganggan a tinumbok to tan tinumbok yo, lapud naaandi lay kabilungetan tan onsisinag lay tuan liwawa.
Napanmatalkan Iray Panonot nen Jehova
14 Dakel so nabasa tayon panonot ed Kristianon Griegon Kasulatan nipaakar ed pangaro ed balang sakey. Imbaga nen Jesus ya say komaduan sankaimportantian ya ganggan et “arom so kaparam a too a singa ed sikan dili.” (Mat. 22:39) Imbaga met nen Santiago ya agid ina nen Jesus ya say aro et “ganggan na ari.” (Sant. 2:8) Tan oniay insulat nen apostol Juan: “Inad-arok ira, say isusulat ko ed sikayo et aliwan balon ganggan, noagta daan a ganggan a wala la ed sikayo diad gapo.” (1 Juan 2:7, 8) Antoy tutukoyen nen Juan ya “daan a ganggan”? Tutukoyen toy ganggan ya mangaro. Nibagan “daan” itan ta pigaran dekada lay apalabas sanen inter itan nen Jesus “diad gapo.” Balet nibagan “balo” met itan lapud mas kaukolan ya ipatnag na saray disipulo so masakripisyon aro legan dan aarapen iray balon subok. Bilang disipulo nen Kristo, kasin papablien tayo ray pasakbay ya manalwar itayo ed makasarilin ugali na sayan mundo pian ag-ombetel so panangaro tayod kaparan too?
(1 Juan 5:16, 17) No say sakey et nanengneng toy agi to a manggagaway kasalanan ya agmansumpal ed patey, sikatoy ipikasi to, tan iter na Dios ed sikato so bilay, on, diad saramay agmanggagawa na kasalanan a mansumpal ed patey. Walay kasalanan a mansumpal ed patey. Tan agko ibabagad sikato ya ipikasi to imay manggagawa ed sayan klase na kasalanan. 17 Amin ya ag-inkatunong et kasalanan, ingen ta walay kasalanan ya agmansumpal ed patey.
it-1 862 ¶5
Panamerdona
Duga labat ya ipikasi so arum, anggan say interon kongregasyon, ya perdonaen ira na Dios. Ontan so ginawa nen Moises parad nasyon na Israel, ya impatua to so kasalanan da tan kinmerew na panamerdona, tan sikatoy dinengel nen Jehova. (Nu 14:19, 20) Ontan met, nen indedika so templo, impikasi nen Solomon ya perdonaen komon nen Jehova so totoo to no nankasalanan ira tan nagbabawi ira ed saray kasalanan da. (1Ar 8:30, 33-40, 46-52) Indaulo nen Esdras so pampikasi ed publiko pian ipatua iray kasalanan na saray Judion pinmawil ed dalin da. Lapud impapuson pikakasi tan bilin to, apakiwas iray totoo ya manguman pian perdonaen ira nen Jehova. (Esd 9:13–10:4, 10-19, 44) Pinaseseg nen Santiago so sakey a mansasakit ed espiritual ya patawag to iray mamatatken ed kongregasyon pian sikatoy ipikasi ra, tan “no sikatoy akagawa na saray kasalanan, sikatoy naperdona.” (San 5:14-16) Balet walay “kasalanan a mansumpal ed patey,” say kasalanan sumpad masanton espiritu ya ginagala tan niyugali la, kanian agla naperdona. Saramay ontan so kasalanan da et agnepeg ya ipikasi na sakey a Kristiano.—1Jn 5:16; Mat 12:31; Heb 10:26, 27.
Panagbasa ed Biblia
(1 Juan 1:1–2:6) Sinulatan mi kayo nipaakar ed salita na bilay, a saya et wala la manlapud gapo, a nadngel mi, anengneng na saray mismon mata mi, naobserbaan mi tan abembenan na saray lima mi, 2 (on, say bilay et nipatnag ed sikami, tan anengneng mi tan tatasian mi tan ipapakabat mi ed sikayo so andi-anggaan a bilay a nanlapud Ama tan nipatnag ed sikami), 3 tan ipapaamta mi met ed sikayo imay anengneng tan nadngel mi, pian makapikasakey kayo met ed sikami. Tan sayan pankakasakey tayo et pikakasakey ed Ama tan ed Anak ton si Jesu-Kristo. 4 Tan insulat mi irayan bengatla pian magmaliw tayon malikeliket. 5 Saya so mensahe a nadngel mi ed sikato tan ipapakabat mi ed sikayo: say Dios et liwawa, tan anggapon balot so kabilungetan ed sikato. 6 No ibaga tayon, “Mikakasakey itayo la ed sikato,” ingen ta manaakar itayo ni ed kabilungetan, mantitila tayo tan agtayo gagawaen so unong ed katuaan. 7 Balet, no manaakar itayo ed liwawa a singa sikato a walad liwawa, walaan itayo na pankakasakey, tan lilinisan itayo na dala nen Jesus ya Anak to ed amin a kasalanan. 8 No ibaga tayon, “Anggapoy kasalanan tayo,” papalikdoen tayoy sarili tayo tan anggapod sikatayo so katuaan. 9 Say Dios et matoor tan matunong, kanian no ipatua tayo ray kasalanan tayo, perdonaen to iratan tan linisan to itayo ed amin ya ag-inkatunong. 10 No ibaga tayon, “Ag-itayo nankasalanan,” sikatoy gagawaen tayon matila, tan anggapod sikatayo so salita to.
2 Inad-arok ya ananak, insulat kod sikayo irayan bengatla pian agkayo makapankasalanan. Balet, no walay mankasalanan, walay sakey a mananulong tayo a kaiba na Ama, salanti, si Jesu-Kristo, a sakey a matunong. 2 Tan sikatoy sakey a bagat a pipupulangan parad saray kasalanan tayo, ingen ta aliwan parad sikatayo labat noagta parad interon mundo. 3 Tan diad saya et amta tayo a sikatoy kabat tayo la no uunoren tayo ray ganggan to. 4 Samay mangibabagan, “Sikatoy kabat ko la,” ingen ta agto uunoren iray ganggan to et matila, tan say katuaan et anggapo ed satan a too. 5 Balet siopaman a manguunor ed salita to, sayan too et talagan nagnap lay panangaro to ed Dios. Lapud saya et amta tayon nikasakey itayo ed sikato. 6 Samay mangibabaga a sikatoy mansiasiansian nikasakey ed sikato et nepeg met a mantultuloy a manbilay a singa ed impanbilay nen Jesu-Kristo.
NOBYEMBRE 11-17
KAYAMANAN ED SALITA NA DIOS | 2 JUAN 1–JUDAS
“Kaukolan Tayoy Milaban Pian Mansiansia ed Katuaan”
(Judas 3) Inad-arok ya agagi, anggano gagawaen ko lay amin a nayarian ko pian isulat ed sikayo so nipaakar ed kililiktar a naeeksperiensya tayon amin, kaukolan ta kayo nin sulatan pian pasesegen ta kayon milaban ya impasya nisengeg ed pananisia a pinsanan ya impasabi ed saray masanto.
“Ombiskeg Kayo Komon ed Katawan”
8 Aliwa itayon mangamanga ed saray pakana nen Satanas lapud ipaparungtal na Kasulatan so manuna iran taktika to. (2 Corinto 2:11) Diad matunong a too a si Job, inusar na Diablo so pirmin kairapan ed panagbilay, impatey na saray inad-aro, isusumpa na pamilya, impanirap ed pisikal, tan andiay-basiyan a panagkritiko na saray palson kakaaro. Agonigon a maong si Job tan inisip to a sikatoy inkaindan la na Dios. (Job 10:1, 2) Anggaman aliwan si Satanas so direktan pansesengegan na amin a problema natan, saratan a kairapan so talagan mangaapekta ed dakel a Kristiano, tan nayarin anamoten iratan na Diablo parad pakagunggonaan to.
9 Saray kapeligroan ed espiritual so ondarakel ed sayan panaon na anggaan. Manbibilay itayo ed mundo a manuna iray materyalistikon gegemtan imbes a saray espiritual a kalat. Naynay ya ipaparungtal na media so sebel a pisesekso bilang lapuan na liket imbes a sakit na linawa. Tan say karaklan ed totoo so nagmaliw a “maaro ed saray likeliket, a lalo nen say dia ed Dios.” (2 Timoteo 3:1-5) Sayan paraan na panag-isip so mameligro ed espiritual ya inkabalanse tayo nilikud no ‘mibangal itayo nisesengeg ed pananisia.’—Judas 3.
Pankotkot na Espiritual a Kayamanan
(Judas 4) Say rason ko et wala ray totoon akaloob ed limog yo a manepeg ya ukomen unong ya impasakbay la nensaman na Kasulatan; sikaray mauges a totoo a ginawa ran baraan so agnaparaan a kaabigan na Dios parad anggapoy-baing a kagagawa tan ag-ira manmamatoor ed samay alenleneg ya akankayarian ed sikatayo tan Katawan tayo, si Jesu-Kristo.
(Judas 12) Singa ra saray bato ya akaamot ed dalem na danum legan iran midudungo ed sikayo diad saray ponsia yo, saray anggapoy baing a pastol a sarili da labat so papakanen da; saray lurem ya agmangipepelag na uran tan mimilmila ed dagem; saray kakiewan ya agmanbubunga no panaon da, ya amidua lan inatey, tan binagot la;
it-2 279
Ponsia na Panangaro
Anggapoy deskripsion na Biblia no anto iratay ponsia na panangaro tan anggapoy ibabaga na satan no panon kabetbet iratan ya gagawaen. (Jud 12) Ag-iratan ingganggan na Katawan a Jesu-Kristo odino saray apostol to, tan mapatnag ya ag-iratan kapilitan ya gawaen odino permanente. Ibabaga na arum ya saratan iramay okasyon ya manpapaponsia iray Kristianon walaan da tan iimbitaan da ray mairap-bilay. Bilang sanaagi—saray ulila ed ama, balo, mayaman, tan mairap-bilay—et saniiban mamangan na dakdakel ya naakan.
it-2 816
Bato
Say sananey ya Griegon salita ya spilas et mapatnag ya ontutukoy ed bato ya akalereg ed danum. Inusar itan nen Judas pian iyilustra iray pigaran totoo ya akaloob ed Kristianon kongregasyon ya mauges so motibo ra. Singa saray akaamot ya bato ya makaderal ed saray barko, sarayan totoo et makaderal met so impluensya ra ed saray walad kongregasyon. Oniay imbaga to nipaakar ed sarayan totoo: “Singa ra saray bato ya akaamot ed dalem na danum legan iran midudungo ed sikayo diad saray ponsia yo.”—Jud 12.
(Judas 14, 15) On, si Enoc, a komapito ed linya manlapud si Adan, et nampropesiya met nipaakar ed sikara sanen inkuan to: “Sinmabi si Jehova a kaibay samplon libolibo a masanton anghel to, 15 pian mangukom ed amin, tan mansentensia ed amin a mauges nipaakar ed amin a mauges a ginawa ra, tan nipaakar ed amin a makapabiglan bengatla ya imbaga sumpad sikato na saray mauges a makasalanan.”
“Apaliket Ton Maong so Dios”
Anto so propesiya nen Enoc? Imbaga to: “Sinmabi si Jehova a kaibay samplon libolibo a masanton anghel to, pian mangukom ed amin, tan mansentensia ed amin a mauges nipaakar ed amin a mauges a ginawa ra, tan nipaakar ed amin a makapabiglan bengatla ya imbaga sumpad sikato na saray mauges a makasalanan.” (Judas 14, 15) Naimanom seguro ya say impangibaga nen Enoc ed satan et singa asumpal la, ya singa ginawa la na Dios so walad propesiya. Ontan met so impangibaga ed dakel iran propesiya ya tinmumbok ed satan. Oniay labay ton ibaga: Say ibabaga na propeta et segseguradon nagawa kanian say impangibaga to et singa agawa la itan!—Isaias 46:10.
“Apaliket Ton Maong so Dios”
Lapud pananisia nen Enoc et nayarin nitepet tayod sarili tayo no kasin nanenengneng tayo met so mundon pambibilayan tayo ya singa pakanengneng na Dios. Say panangukom ya makpel ya impulong nen Enoc et siansia nin onaplika natan, diad sayan mundo a singa ed samay mundo ed panaon nen Enoc. Singa ed impasakbay nen Enoc, satan ya mauges a mundo et dineral nen Jehova panamegley na baleg a Delap diad panaon nen Noe. Balet alimbawa labat itan na gawaen ton mas baleg a kadederal ed arapen. (Mateo 24:38, 39; 2 Pedro 2:4-6) Natan, singa met nensaman, akaparaan lay Dios kaiba iray samplon libolibon anghel to pian mangidapo na matunong a panangukom ed mauges a mundo. Komon ta ipapuso na kada sakey ed sikatayo so pasakbay nen Enoc tan ibaga tayo itan ed arum. Nayarin ag-itayo panisiaan na kapamilya tan kakaaro tayo. No maminsan, pakalikna tayo et bukbukor tayo. Balet agbalot pinaulyan nen Jehova si Enoc; agto met paulyan iray matoor a lingkor to natan!
Panagbasa ed Biblia
(2 Juan 1-13) Siak, a sakey a masiken, et nansulat ak ed biin pinili tan ed ananak to, a peteg ya inad-arok, tan aliwan siak labat noagta amin met a makaamta ed katuaan. 2 Inad-aro mi kayo lapud katuaan a mansiasiansia ed sikatayo tan mansiansia itan ed sikatayo ya anggad angga. 3 Diad ontan et niwala ed sikatayo so agnaparaan a kaabigan, panangasi, tan kareenan a manlalapu ed Dios ya Ama tayo tan ed si Jesu-Kristo ya Anak to, pati say katuaan tan aro. 4 Malikeliket ak ta naamtaan ko ya arum ed saray ananak mo et manaakar ed katuaan, unong ed ganggan ya inawat tayo ed Ama. 5 Kanian natan et kekerewen kod sika, a biin pinili, ya aroen tayoy sakey tan sakey. (Say isusulat kod sika et aliwan balon ganggan, noagta samay wala la ed sikatayo diad gapo.) 6 Tan saya so kabaliksan na aro, ya itultuloy tayon unoren iray ganggan to. Saya may ganggan, unong a nadngel yo la ed gapo, a nepeg a mantultuloy yon ipatnag so aro. 7 Ta dakel so managpalikdo a linmesa diad mundo, saramay agmamibidbir a si Jesu-Kristo et nagmaliw a too. Saya may managpalikdo tan antikristo. 8 Manalwar kayo, pian agyo nabalang iray bengatlan nansagpotan tayo, noag ingen naawat yoy sigpot a tumang yo. 9 Balang sakey ya onlalampas tan agmansiasiansia ed bangat na Kristo et anggapo ed sikato so Dios. Samay mansiasiansia ed sayan bangat et walad sikato so Ama tan say Anak. 10 No walay onlad sikayo tan agto awit iyan bangat, agyo papalooben ed saray ayaman yo odino agyo ibabano. 11 Ta samay mangibano ed sikato et mibibiang ed saray mauges a gawa to. 12 Anggaman dakel so labay kon isulat ed sikayo, agko labay a gawaen itan diad panamegley na papel tan tinta, noag ingen iilaloan kon makakar ak ed sikayo tan makapitongtong ak ya arap-arapan, pian magmaliw kayon malikeliket. 13 Manpapakumusta ed sika iray ananak na agim, a biin pinili.
NOBYEMBRE 18-24
KAYAMANAN ED SALITA NA DIOS | APOCALIPSIS 1-3
“Amtak Iray Gagawaen Mo”
(Apocalipsis 1:20) Say sagradon sekreto nipaakar ed pitoran bitewen ya anengneng mo diad kawanan a limak tan nipaakar ed pitoran balitok a kandelero: Say pitoran bitewen et ontutukoy ed saray anghel na pitoran kongregasyon, tan say pitoran kandelero et ontutukoy ed pitoran kongregasyon.
Anton Espiritu so Ipapatnag Yo?
8 Napaliisan tayo itan ya espiritu no nonoten tayon walad ‘kawanan a lima nen Jesus so pitoran bitewen.’ Irerepresenta na ‘bitewen’ iray alanaan a manangasikaso, tan onaplika met itan ed saray manangasikaso ed kongregasyon. Igigiya nen Jesus iray ‘bitewen’ unong ed paraan a labay to. (Apo. 1:16, 20) Kanian, bilang Ulo na Kristianon kongregasyon, si Jesus et walaan na sigpot a kontrol ed saray ulop na mamatatken. No walay sakey a membro na ulop na mamatatken a kaukolan ya simbawaen, seguroen na samay Sakey a “saray mata to et singa mandarlang ya apoy” a naresolbe itan ed panaon tan paraan a labay To. (Apo. 1:14) Kaleganan to, kaukolan tayon respetoen iray elder ya tinuro na masanton espiritu, lapud ta oniay insulat nen Pablo: “Matulok kayo komon ed saramay mangidadaulo diad limog yo tan mapasakop kayo komon, ta babantayan da iray kamarerwa yo tan walay eebatan da ed saya; ta pian nagawaan da iya tekep na liket tan aliwan ermen, lapud makaderal iya ed sikayo.”—Heb. 13:17.
(Apocalipsis 2:1, 2) “Isulat mo ed anghel na kongregasyon ed Efeso: Saraya so imbaga na samay sankabembenan tod kawanan a lima to so pitoran bitewen tan manaakar ed pegley na pitoran balitok a kandelero: 2 ‘Amtak iray gagawaen mo, tan say pansasagpot mo tan pansusungdom, tan agmo kokonsintien iray mauges a totoo, tan susuboken mo iramay mangibabagan apostol ira anta andi, tan naamtaan mon matila ra.
Sasalimbengan Itayo nen Jehova Parad Kilalaban
11 Diad pasingawey ya akarekord ed Apocalipsis kapitulo 2 tan 3, inusisa nen Jesu-Kristo no antoy nagagawad pitoran kongregasyon ed Asia Minor. Aliwa labat ya say interamentin kipapasen na sarayan kongregasyon so anengneng to. Imbes, sinalambit toy espisipikon kipapasen na kada kongregasyon tan ontan met ed pigaran indibidual, insan angiter na matukoy a komendasyon tan simbawa. Antoy naaralan tayod saya? Say pitoran kongregasyon et irerepresenta to ray alanaan a Kristiano kayari 1914, tan say simbawan inter nen Kristo ed sarayan kongregasyon et onaplika ed amin a kongregasyon natan ed interon mundo. Nibaga tayo sirin ya igigiya nen Jehova iray lingkor to panamegley na Anak to. Panon itayon nagunggonaan ed satan a panangigiya?
Mantultuloy a Mibansag ed Organisasyon nen Jehova
20 Say pantultuloy a pibansag ed onaaligwas ya organisasyon nen Jehova et kakaukolanen toy pamidbir ed impabtang na Dios a betang nen Jesu-Kristo bilang “ulo na kongregasyon.” (Efeso 5:22, 23, NW) Makatantanda met so nibaga ed sikatayo diad Isaias 55:4: “Nia, sikato so inter ko [Jehova] a nipaakar a tasi ed saray baley a pangulo tan managganggan ed saray baley.” Maseguron amta nen Jesus no panon so mangidaulo. Kabat to met iray karnero to, tan saray gawa ra. Diad tua, sanen sinuri to so pitoran kongregasyon ed Asia Minor, oniay aminlima ton imbalikas: ‘Amtak iray gawa yo.’ (Apocalipsis 2:2, 19; 3:1, 8, 15) Amta met nen Jesus iray pankaukolan tayo, a singa say Ama to, si Jehova. Sakbay ton imbalikas so Modelon Pikakasi, inkuan nen Jesus: “Si Ama yo amta to ray antokaman a kaukolan yo, ed arapen a mankerew kayo ed sikato.”—Mateo 6:8-13.
Pankotkot na Espiritual a Kayamanan
(Apocalipsis 1:7) Sikatoy onsabi a walad saray lurem, tan sikatoy nanengneng na amin a mata, tan saramay nanduyok ed sikato; tan say amin a tribu ed dalin et tapoktapoken da ray pagew da lapud ermen nisengeg ed sikato. On, seguradon nagawa iya. Amen.
Deralen na Panarian na Dios Iray Mamubusol ed Satan
10 Pangipaamtad panangukom. Napilitan lad satan so amin ya mamubusol ed Panarian na Dios ya natasian so bengatlan lalon pakagiwgiwan da. Inkuan nen Jesus: “Nanengneng da so Anak na too ya onsasabi a walad saray lurem tekep na baleg a pakapanyari tan gloria.” (Mar. 13:26) Sayan makapakelaw a pangipanengneng na pakapanyari so signal ya sinmabi lay Jesus pian ipaamtay panangukom. Diad sananey a parte na saya lanlamang a propesiya nipaakar ed kaunoran iran agew, mas indetalye nen Jesus so nipaakar ed panangukom ya ipaamtad satan a panaon. Nabasa tayo itan ya impormasyon diad samay parabolo nipaakar ed karnero tan kanding. (Basaen so Mateo 25:31-33, 46.) Saray matoor ya onsusuportad Panarian na Dios et ipaamta ya “karnero” tan ‘itangwa day ulo ra’ lapud amta ran “asingger lay kililiktar” da. (Luc. 21:28) Balet, saray onsusumpad Panarian et ukomen bilang “kanding” tan “tapoktapoken day pagew da ed pantagleey” ta amta ran magano lay “andi-anggaan a kadederal” da.—Mat. 24:30; Apo. 1:7.
(Apocalipsis 2:7) Samay walaan na layag et ondengel komon ed ibabaga na espiritu ed saray kongregasyon: Samay manalo et abuloyan kon mangan ed kiew na bilay, a walad paraiso na Dios.’
Saray Pabitar ed Libro ya Apocalipsis—I
2:7—Anto so “paraiso na Dios”? Lapud sarayan salita et parad saray alanaan a Kristiano, say asalambit a paraiso et ontutukoy ed singa-paraison ayaman ed tawen, salanti, say mismon kawalaan na Dios. Saray matoor ya alanaan so natumangan diad pangan ed “kiew na bilay.” Sikaray pagamoran na imortalidad.—1 Cor. 15:53.
Panagbasa ed Biblia
(Apocalipsis 1:1-11) Say panangiparungtal nen Jesu-Kristo, ya inter na Dios ed sikato, pian ipanengneng ed saray aripen to no anto ray magano lan nagawa. Et imbaki toy anghel to tan diad panamegley na saray simbolo et impaamta to itan ed aripen ton si Juan, 2 a tinasian toy salita ya inter na Dios tan say impantasi nen Jesu-Kristo, on, amin a bengatlan anengneng to. 3 Maliket imay manbabasan maksil tan saramay ondedengel ed saray salita na sayan propesiya tan samay manguunor ed saray nisulat ditan, ta asingger lay aturon panaon. 4 Siak, si Juan, so nansulat ed pitoran kongregasyon a walad probinsya na Asia: Nawalaan kayo komon na agnaparaan a kaabigan tan kareenan a manlalapud “Dios a wala natan tan wala la nensaman tan onsabi la,” 5 tan manlalapud pitoran espiritu a walad arap na trono to, tan manlalapud si Jesu-Kristo, “say Matoor a Tasi,” “say panguloan manlapud inaatey,” tan “say Manuley na saray arari ed dalin.” Diad sikato a mangaaro ed sikatayo tan angibulos ed sikatayo ed saray kasalanan tayo diad panamegley na dala to— 6 tan ginawa to itayon sakey a panarian tan saserdote na Dios tan Ama to—on, niiter komon ed sikato so gloria tan biskeg ya anggad angga. Amen. 7 Sikatoy onsabi a walad saray lurem, tan sikatoy nanengneng na amin a mata, tan saramay nanduyok ed sikato; tan say amin a tribu ed dalin et tapoktapoken da ray pagew da lapud ermen nisengeg ed sikato. On, seguradon nagawa iya. Amen. 8 “Siak so Alfa tan say Omega, say Dios a wala natan tan wala la nensaman tan onsabi la, say Makapanyarin-amin,” kuan nen Jehova a Dios. 9 Siak, si Juan, ya agi yo tan kaiba yo ed kairapan tan panarian tan panagsungdo bilang patumbok nen Jesus, et wala ak ed isla a tatawagen a Patmos lapud pansasalitak nipaakar ed Dios tan pantatasik nipaakar ed si Jesus. 10 Diad panamegley na masanton espiritu, niyakar ak diad agew na Katawan, tan diad benegan ko et nadngel ko so maksil a boses a singa tanol na trumpeta, 11 a kuan to: “Isulat mo ed sakey a lukot no antoy nanengneng mo tan ipawit mo itan ed pitoran kongregasyon: diad Efeso, Smirna, Pergamo, Tiatira, Sardis, Filadelfia, tan Laodicea.”
NOBYEMBRE 25–DISYEMBRE 1
KAYAMANAN ED SALITA NA DIOS | APOCALIPSIS 4-6
“Say Apatiran Akakabayo”
(Apocalipsis 6:2) Tan anengneng ko so sakey ya amputin kabayo, tan samay akakabayo ed satan et walay pana to; tan niiter ed sikato so sakey a korona, tan sikatoy linma a manatalo tan pian sumpalen so panatalo to.
Say Apatiran Akakabayo—Siopa Iratan?
Siopa so akalugan ed amputin kabayo? Naamtaan tayo no siopa itan dia lanlamang ed libro na Biblia ya Apocalipsis. Nabasad bandad sampot a kapitulo ya say akalugan ed amputin kabayo et “Say Salita na Dios.” (Apocalipsis 19:11-13) Say tutukoyen na satan et si Jesu-Kristo, lapud sikato so spokesman na Dios. (Juan 1:1, 14) Sakey ni, sikatoy tinawag ya “Ari na saray arari tan Katawan na saray katawan” tan “Matoor tan Matua.” (Apocalipsis 19:16) Kanian walay autoridad ton milaban tan man-ari, tan agto abusoen so pakapanyari to odino usaren itan diad mauges. Pero wala ray onlesan tepet.
wp17.3 4 ¶5
Say Apatiran Akakabayo—Siopa Iratan?
Kapigan ginmapon binmatik iray akakabayo? Tandaan ya samay inmunan akakabayo, si Jesus, et linmugan nen sikatoy akoronaan. (Apocalipsis 6:2) Kapigan akoronaan si Jesus bilang Ari diad tawen? Aliwan nen kakkapawil tod tawen. Ibabaga na Biblia ya kaukolan to ni manalagar antis ya nakoronaan. (Hebreo 10:12, 13) Imbaga nen Jesus ed saray disipulo to so tanda pian naamtaan da no kapigan onggapon man-ari ed tawen. Imbaga to ya onuges so situasyon ed mundo. Wala ray nagawan guerra, eras, tan salot. (Mateo 24:3, 7; Lucas 21:10, 11) Nen ginmapoy World War I nen 1914, mapatpatnag ya atan la may impasakbay nen Jesus ya mair-irap a panaon ya diad Biblia et tatawagen ya “kaunoran iran agew.”—2 Timoteo 3:1-5.
(Apocalipsis 6:4-6) Wala ni sananey a sinmabi, sakey ya ambalbalangan kabayo, tan samay akakabayo ed satan et naikday autoridad a mangekal na kareenan ed dalin pian manpapateyan ira, tan inikdan na sakey a baleg ya espada. 5 Sanen inekal to so komatlon tatak, nadngel kon imbaga na komatlon mabilay a pinalsa: “Gala!” Tan anengneng koy sakey ya andeket a kabayo, tan samay akakabayo ed satan et akaegna na simbangan. 6 Walay nadngel kon singano sakey a boses diad pegley na saray apatiran mabilay a pinalsa ya angibaga: “Sakey quarto a trigo so nasaliw na sakey a denario tan taloran quarto a sebada so nasaliw na sakey a denario; tan agmo aabuloyan a naupot so larak na olibo tan say alak.”
Say Apatiran Akakabayo—Siopa Iratan?
Isisimbolo na sayan akalugan ed kabayo so guerra. Ekalen toy kareenan diad interon mundo, aliwan diad pigara labat ya bansa. Nen 1914, agawa so World War I ya alanor so interon mundo. Insan agawa so World War II, ya mas grabe. Ibabaga na saray report ya say karakel na inatey lapud guerra tan panlalaban manlapu lad 1914 et masulok ya 100 milyon! Agni kaibad satan iray abaldado odino nakalay parte na laman.
wp17.3 5 ¶4-5
Say Apatiran Akakabayo—Siopa Iratan?
“Anengneng koy sakey ya andeket a kabayo, tan samay akakabayo ed satan et akaegna na simbangan. Walay nadngel kon singano sakey a boses diad pegley na saray apatiran mabilay a pinalsa ya angibaga: ‘Sakey quarto a trigo so nasaliw na sakey a denario tan taloran quarto a sebada so nasaliw na sakey a denario; tan agmo aabuloyan a naupot so larak na olibo tan say alak.’”—Apocalipsis 6:5, 6.
Isisimbolo na sayan akakabayo so eras. Nanengneng tayo dia ya ngalngali anggapoy naakan ta say sakey a quarto (0.7 kilo) na trigo et manbili na sakey a denario, ya sueldo ed sanagew nen first century! (Mateo 20:2) Manbili met na sakey a denario so taloran quarto (2.1 kilo) na sebada, ya mas abeban klase nen say trigo. Pigaran agew labat itan ya kanen na baleg a pamilya! Kanian pinasakbayan iray totoo ya tipiden day suplay da na larak na olibo tan alak, ta aratan so inagew-agew ya uusaren da ed saman a panaon.
(Apocalipsis 6:8) Tan anengneng koy sakey a pusisaw a kabayo, tan samay akakabayo ed satan et Patey so ngaran to. Tan manumtumbok ed sikato so Lubok. Tan niiter ed sikara so autoridad ed kakapat na dalin, a mamatey ed panamegley na andukey ya espada tan eras tan makapatey a salot tan saray atap ya ayayep diad dalin.
wp17.3 5 ¶8-10
Say Apatiran Akakabayo—Siopa Iratan?
Isisimbolo na komapat ya akakabayo so patey ya resulta na salot tan arum ni. Ag-abayag kayari 1914, minilyon so inatey lapud trangkaso Español. Manga 500 milyon ya totoo so naalisan, manga 33% na populasyon na too ed saman a panaon!
Balet dakel ni linmesan sakit kayari to ’tan. Ibabaga na saray eksperto ya nilasus a milyon ya totoo so inatey lapud smallpox (makapatey ya klase na lutot) legan na 20th century. Anggad natan et minilyon ni ompapatey lapud AIDS, tuberculosis, tan malaria, anggano impasyay panre-research day tambal.
Balanglan guerra, eras, odino salot—saksakey so pansusumpalan to—patey! Ag-ontutundan mantitipon na biktima so Lubok, kanian singa anggapo lay ilalo na totoo.
Pankotkot na Espiritual a Kayamanan
(Apocalipsis 4:4) Say trono et apaliberan na 24 a trono, tan diad sarayan trono et anengneng kon akayurong so 24 a mamatatken ya akasulong na amputin kawes, tan wala ray balitok a korona ed ulo ra.
(Apocalipsis 4:6) Diad arap na trono et walay miparad salming a dayat, a singa kristal. Diad pegley na trono tan diad paliber na trono et walay apatiran mabilay a pinalsa a napno na saray mata diad arap tan beneg.
Say Karlangan na Mangatatawen a Trono nen Jehova
8 Amta nen Juan a saray saserdote et aturon manlingkor diad kadaanan a tabernakulo. Kanian nayarin sikatoy asurprisa diad impakanengneng ed ontumbok a deskribien to: “Tan dia ed kaliberliber na trono wala so duamplo tan apat a tronos; tan anengneng ko a manyurong so duamplo tan apat a mamasiken ed saray tronos, ya akawesan ira na kawekawes ya amputi; tan dia ed ulo ra wala so balanget da a balitok.” (Apocalipsis 4:4) On, imbes a saray saserdote, wala so 24 a mamasiken, a nitrono tan akoronaan a singa arari. Siopa irayan mamasiken? Anggapoy arum noag saray alanaan ed Kristianon kongregasyon, ya apaoli tan wala la’d mangatatawen a posisyon ya insipan nen Jehova ed sikara. Panoy pakaamta tayo ed satan?
Say Karlangan na Mangatatawen a Trono nen Jehova
19 Anto so ililitrato na sarayan pinalsa? Say sakey a pasingawey ya inreport na sananey a propeta, si Ezequiel, so ontulong ed sikatayon naamtaan so ebat. Anengneng nen Ezequiel si Jehova a nitrono ed mangatatawen a karwahe, ya inulop na saray mabilay a pinalsan walaan na saray nengneng a mipadpara ed saramay deneskribe nen Juan. (Ezequiel 1:5-11, 22-28) Diad saginonor, anengneng lamet nen Ezequiel itan a karwahen trono ya inulop na saratan a mabilay a pinalsa. Balet, diad sayan pankanawnawa et tinukoy to so mabilay iran pinalsa bilang kerubin. (Ezequiel 10:9-15) Seguradon irerepresenta na apatiran mabilay a pinalsan anengneng nen Juan so dakel iran kerubin na Dios—saray pinalsa a walaan na atagey a rangko diad espiritun organisasyon To. Ag-inisip nen Juan a nikadkaduma so pakanengneng ed saray kerubin ya akapueston asingsingger ed inkapersona nen Jehova, lapud diad tabernakulon uksoyan nensaman, duaran kerubin a balitok so niiyan ed tapew na sakob na kaban na sipan, ya angirepresenta ed trono nen Jehova. Manlapud baetan na sarayan kerubin, say boses nen Jehova so angipasabi na saray ganggan ed nasyon.—Exodo 25:22; Salmo 80:1.
(Apocalipsis 5:5) Balet inkuan ed siak na sakey ed saray mamatatken: “Agka la onaakis. Say Leon a nanlapud tribu nen Juda, say lamot nen David, et analo pian lukasan so lukot tan ekalen so pitoran tatak na satan.”
“Nia so Leon ed Poli nen Juda”
5 Say leon so mabetbet ya isisiglaot ed pakpel. Asali yo ta lay akaasingger ed kalakian a leon? No asali yo la, seguradon walad kulongan itan diad zoo, kanian aliwan mapeligro. Ingen, siansian makapakebbiew so pakaeksperiensya na ontan. Legan yon nenengnengen so lupa na sayan baleg tan mabiskeg a pinalsa, insan to kayo met ninengneng, agta singa agnaisip ya onkuyat itan a leon lapud pakatatakot? Say Biblia so analambit ed “leon, a sikato so sankamakapanyarian ed saray ayep, tan ag-onsener lapu ed anggan siopa.” (Uliran 30:30) Ontan so inkakpel nen Kristo.
6 Singbaten tayo no panon ya impanengneng nen Jesus so singa-leon a pakpel diad taloran pamaakaran: diad panangitalindeg ed katuaan, diad panangitandoro ed inkahustisya, tan diad pangarap ed isusumpa. Nasingbat tayo met, ya amin tayo so makasarag a mangalig ed si Jesus diad pangipatnag na pakpel, balanglan makpel itayo lan sipor odino andi.
Panagbasa ed Biblia
(Apocalipsis 4:1-11) Kayari na satan et anengneng ko a walay akalukas a puerta ed tawen, tan say unaan a boses a nadngel ko, a mitotongtong ed siak, et singa tanol na trumpeta, a kuan to: “Segep ka dia, tan ipanengneng kod sika iray bengatlan nepeg a nagawa.” 2 Kayari na satan et tampol a niwala ak ed pakayari na espiritu, tan walay sakey a trono ed tawen, tan walay akayurong ed satan a trono. 3 Tan say itsura na samay akayurong et singa baton jaspe tan baton sardio, tan akapaliber ed trono so bunlalakaw a singa esmeralda so itsura to. 4 Say trono et apaliberan na 24 a trono, tan diad sarayan trono et anengneng kon akayurong so 24 a mamatatken ya akasulong na amputin kawes, tan wala ray balitok a korona ed ulo ra. 5 Manlapud trono et ompapaway iray kirmat tan boses tan karol; tan walay pitoran mandarlang a silew diad arap na trono, tan say kabaliksan na saraya et pitoran espiritu na Dios. 6 Diad arap na trono et walay miparad salming a dayat, a singa kristal. Diad pegley na trono tan diad paliber na trono et walay apatiran mabilay a pinalsa a napno na saray mata diad arap tan beneg. 7 Say unonan mabilay a pinalsa et singa leon, tan say komaduan mabilay a pinalsa et singa malangwer a kalakian a baka, tan say komatlon mabilay a pinalsa et walaan na lupa a singa lupa na too, tan say komapat a mabilay a pinalsa et singa ontitikyab ya agila. 8 Kada sakey ed saray apatiran mabilay a pinalsa et walaan na anemiran payak; napno na saray mata so paliber tan dalem na saratan. Tan ag-ira ontutunda ed agew tan labi a mangibabagay: “Masanto, masanto, masanto si Jehova a Dios, say Makapanyarin-amin, a wala la nensaman tan wala natan tan onsabi la.” 9 Kapagno iglogloria tan igagalang tan pisasalamatan na saray mabilay a pinalsa imay akayurong ed trono, samay mabilay ya anggad angga, 10 say 24 a mamatatken et ondadakmomo tan mandadayew ed samay akayurong ed trono, samay mabilay ya anggad angga, tan ibubuntok da ray korona ra diad arap na trono, ya ibabaga ra: 11 “Sika so makanepegan, Jehova a Dios mi, a mangawat na gloria tan galang tan pakayari, lapud pinalsam so amin a bengatla, tan lapud linawam et niwala tan apalsa iratan.”