Mankalaban ya Ari Diad Panaon na Anggaan
Wala ray propesiya ed sayan tsart ya man-overlap so pakagawa to. Paneknek iraya ya manbibilay tayo la ed “panaon na anggaan.”—Dan. 12:4.
Teksto Apo. 11:7; 12:13, 17; 13:1-8, 12
Propesiya Nilibon taon ya uleyan na “atap ya ayep” so dalin. Diad panaon na anggaan, nasugat so komapiton ulo to balet onabig lanlamang, tan ontumbok ed sikato so “interon dalin.” Atan ya ayep so usaren nen Satanas pian “milaban ed saray nakekeraan ya ilalak na bii.”
Kasumpalan Kayari na Delap, saray gobiernon kontrad si Jehova so nanuley ed dalin. Kalabas na nilibon taon, legan na World War I, kinmapuy ya maong so Britanya. Balet kinmasil lamet nen akialyansa ed Amerika. Legan na panaon na anggaan, usaren nen Satanas so amin ya gobierno na too pian pairapen iray lingkor na Dios.
Teksto Dan. 11:25-45
Propesiya Diad panaon na anggaan, “mantulakan” so ari na amianen tan ari na abalaten.
Kasumpalan Say Germany et aki-guerra ed alyansa na Britanya tan Amerika. Nen 1945, nagmaliw ya ari na amianen so Soviet Union tan saray kaalyado to. Balet nen 1991, binmagsak so Soviet Union, tan nagmaliw ya ari na amianen so Russia tan saray kaalyado to.
Teksto Isa. 61:1; Mal. 3:1; Luc. 4:18
Propesiya Ibaki nen Jehova so “mensahero” to pian ‘linisan so dalan’ antis ya onggapon manuley so Mesianikon Panarian. Sayan “mensahero” so “mangiyabawag na maong a balita ed saray mauyamo.”
Kasumpalan Manlapu la nen 1870, inaral ya maong nen Charles Taze Russell tan saray kaiba to no anton talagay ibabangat na Biblia. Nen 1881, atalosan da ya kaukolan ya manpulong iray lingkor na Dios. Im-publish da iray artikulo ya singa say “Wanted 1,000 Preachers” tan “Anointed to Preach.”
Teksto Mat. 13:24-30, 36-43
Propesiya Walay kabusol ya mangisibwag na saray sisanyas diad uma ya angisibwagan na saray trigo. Bansag iran ombaleg tan nasakbongan iray trigo. Kasabi panag-ani, ibiig iray sisanyas ed saray trigo.
Kasumpalan Manlapu la nen 1870, nabirbir la no siopa ray tuan Kristiano. Legan na panaon na anggaan, saray tuan Kristiano et titiponen la tan ibibiig ed saray peke ya Kristiano.
Teksto Dan. 2:31-33, 41-43
Propesiya Walay balbaleg ya imahen a say sali to et gawad balatyang tan pitek.
Kasumpalan Isisimbolo na pitek iray ordinaryon totoo ya walad sakop na alyansa na Britanya tan Amerika. Lapud panrerebelde na arum ed sikara, onkakapuy so gobierno.
Teksto Mat. 13:30; 24:14, 45; 28:19, 20
Propesiya ‘Saray trigo’ et tiponen ed “kamalir.” Say “matoor tan makabat ya aripen” et turoen ya mangasikaso ed “saray lingkor na sankaabungan.” Say “maong a balita na Panarian” et nipulong ed “interon dalin.”
Kasumpalan Nen 1919, aturo so matoor ya aripen ya mangasikaso ed saray lingkor na Dios. Manlapu lad saman, amasya iray Estudyante na Biblia ed panagpulong da. Manpupulong la natan iray Tasi nen Jehova ed masulok ya 200 a bansa tan mangipa-publish ira na saray literaturan base ed Biblia diad masulok ya 1,000 a lenguahe.
Teksto Dan. 12:11; Apo. 13:11, 14, 15
Propesiya Walay atap ya ayep a duaray saklor to. Iganggan to iray totoo ya igawaan day “imahen so atap ya ayep” ya pitoray ulo to. Samay atap ya ayep a duaray saklor to so mamilay o “mangiter na linawa ed imahen.”
Kasumpalan Binuo na alyansa na Britanya tan Amerika so League of Nations. Akimembro so arum nin bansa ed sayan organisasyon. Nen 1926, akimembro met so ari na amianen balet anggad 1933 labat. Manisia iray totoo ya say League of Nations tan say United Nations (UN) ya kasalat to so mangiter na kareenan, anta say Panarian na Dios labat so makapangiter na tuan kareenan.
Teksto Dan. 8:23, 24
Propesiya Walay man-ari ya masebeg so itsura to tan “manderal diad nikadkaduman paraan.”
Kasumpalan Dakel so pinatey tan dineral na alyansa na Britanya tan Amerika. Singa bilang, nen World War II, impelag na Amerika so duaran atomic bomb ed kalaban dan bansa. Talagan amayamay so aderal ed saman.
Teksto Dan. 11:31; Apo. 17:3, 7-11
Propesiya Walay ompaway manlapud kaaralman ya “ambalbalangan atap ya ayep” ya samploray saklor to. Sikato so komawalon ari. Imbaga na libro na Daniel ya sayan ari et ‘makapadimlan bengatla a pansengegan na kadederal.’
Kasumpalan Anampot so League of Nations nen World War II. Kayari na guerra, ‘inlira’ odino binuo so UN. Singa say League of Nations, inisip na totoo ya niiter na UN so kareenan anta say Panarian na Dios labat so makapangiter na tuan kareenan. Atakien na UN so palson relihyon.
Teksto 1 Tes. 5:3; Apo. 17:16
Propesiya Ideklara na saray bansa so “kareenan tan kaligenan,” tan atakien na “samploran saklor” tan “atap ya ayep” so “imoral a bii,” insan da deralen. Kayari na satan, naderal met iray bansa.
Kasumpalan Ibaga na saray bansa ya talagan wala lay kareenan tan kaligenan ed interon mundo. Insan deralen na saray bansan onsusuporta ed UN so amin ya institusyon na palson relihyon. Ditan la onggapo so baleg a kairapan. Manampot itan ya kairapan sano deralen la nen Jesus so arum nin kabiangan na mundo nen Satanas no Armagedon.
Teksto Eze. 38:11, 14-17; Mat. 24:31
Propesiya Lusoben nen Gog so “dalin” ya kawalaan na saray lingkor na Dios. Insan tiponen na saray anghel iray “pinili.”
Kasumpalan Lusoben na ari na amianen tan arum nin gobierno iray lingkor na Dios. Sano onlusob la ra, saray alanaan ya wadia nid dalin et tiponen la ed tawen.
Teksto Eze. 38:18-23; Dan. 2:34, 35, 44, 45; Apo. 6:2; 16:14, 16; 17:14; 19:20
Propesiya “Samay akakabayo” ed “amputin kabayo” et sumpalen toy “panatalo to” sano deralen to si Gog tan say armada to. Say “atap ya ayep” et ibantak ed “mandarlang a dayat,” tan say balbaleg ya imahen et natemek.
Kasumpalan Si Jesus ya Ari na Panarian et iliktar to ray lingkor na Dios. Kaiba to ray 144,000 tan saray anghel ya maneral ed saray bansa. Ditan la manampot so mundo nen Satanas.