Itsura na stage tan banner ed tagey
1922—Sanlasus Taon Lay Apalabas
“SAY Dios . . . itdan to tayo na . . . panalo panamegley nen . . . Jesu-Kristo.” (1 Cor. 15:57, King James Version) Atan so apili ya teksto parad taon 1922. Impaseguro na sayan teksto ed saray Estudyante na Biblia ya bendisyonan nen Jehova so katooran da. Tan talagan benendisyonan nen Jehova so maseseg ya impanpulong da! Diad saman ya taon, inggapo day man-imprinta na sarili dan libro, tan inggapo da met ya ipulong so Panarian panamegley na radyo. Sankapatnagan so panamendisyon nen Jehova ed saray lingkor to nen bandad sampot na 1922. Agawa so agnalinglingwanan ya kombension na Saray Estudyante na Biblia diad Cedar Point, Ohio, U.S.A. Balbaleg so epekto na sayan kombension ed organisasyon nen Jehova anggad natan.
“EKSAYTING IYAN PLANO”
Lapud onlalaknab so kimey ya panagpulong, kakkaukolan na saray agagi so dakel ya literatura. Diad saman et mangiimprinta tayo lay magasin diad Brooklyn Bethel, pero saray libro tayo et ipapaimprinta ni ed paway. Pigaran bulan ya kinmulang so libro ta agmakasaba so kompanya ya pampapaimprintaan tayo. Lapud apektadon maong so kimey ya panagpulong, tinepetan nen Brother Rutherford so overseer na printery, si Brother Robert Martin, no kasin posible ya sikatayo lan mismo so manimprinta na saray libro tayo.
Say panag-imprintaan diad Concord Street ed Brooklyn, New York
“Eksayting iyan plano,” so kuan nen Brother Martin, “ta labay ton ibaga, manlukas tayoy sarili tayon pasilidad ya panag-imprintaan na libro.” Nanrenta tayo na bilding diad 18 Concord Street ed Brooklyn tan angaliw tayo na saray kagawaan parad panag-imprinta.
Pero walay ag-aliketan ed satan. Nen binmisita ed balon pasilidad tayo so presidente na kompanya ya datin mangiimprinta ed saray libro tayo, oniay imbaga to: “First-class irayay kagawaan yo, pero agyo amta balet ya usaren. E, anemiran bulan labat, naderal la iraya.”
“Wala met so punto to,” so kuan nen Brother Martin, “pero say agto amta, kaiba mi si Jehova tan lanang to kamin tutulongan.” Aga alingo-lingoy Brother Martin! Ag-abayag, makakapanimprinta tayo la na 2,000 ya libro kada agew.
Saray agagin mangiimprinta tan saray makina ya uusaren da
NILIBO SO APULONGAN PANAMEGLEY NA RADYO
Inggapo met na saray lingkor nen Jehova ya ipulong so maong a balita panamegley na radyo. Nen ngarem na Simba, Pebrero 26, 1922, first time ya nampaliwawa si Brother Rutherford diad radyo. Impaliwawa to so teman “Minilyon a Mabilay Natan et Aglan Balot Ompatey” diad KOG ya istasyon na radyo ed Los Angeles, California, U.S.A.
Manga 25,000 so dinmengel ed satan ya paliwawa. Wala ray nansulat pian ibaga ray pisasalamat da ed si Brother Rutherford. Say sakey ed sikara et si Willard Ashford ya taga Santa Ana, California. Imbaga to ya “mabilabilay” so paliwawa nen Brother Rutherford tan “dakel so naaralan” to. Onia ni imbaga tod sulat to: “Talora so mansasakit diad pamilya mi kanian agkami makaalis. Maong labat ta diad radyo so nampaliwawaan yo. Ta anggano diad asingger ed abung mi so nampaliwawaan yo, agkami nin siansia makaonla.”
Dakel nin paliwawa so in-broadcast diad tinmutumbok ya simba. Nen bandad sampot na 1922, imbaga na The Watch Tower ya “ag-onkulang ed 300,000 ya totoo so akarengel ed mensahe [na Panarian] diad radyo.”
Balibali so resulta na sayan paraan na panagpulong. Kanian nandesisyon iray Estudyante na Biblia ya mangipaalagey na sarili dan istasyon na radyo diad Staten Island, ya ag-arawi ed Brooklyn Bethel. Diad sinmusublay ya taon, inusar na Saray Estudyante na Biblia iyan istasyon ya tinawag ya WBBR pian ipulong so mensahe na Panarian diad dakel ya lugar.
“ADV”
Diad Hunyo 15, 1922 ya isyu na The Watch Tower, inyanunsio ya walay nagawan kombension diad Cedar Point, Ohio, manlapud Setyembre 5 anggad 13, 1922. Eksayted ya maong iray Estudyante na Biblia kasabi rad Cedar Point.
Diad unonan paliwawa nen Brother Rutherford, oniay imbaga to: “Segsegurado ak ya say Katawan et bendisyonan to iyan kombension tan seguradoen to ya baleg ya pantasi so niiter ed mundo ya natan ni labat nagawa.” Aminpigan indanet na saray espiker ed kombension so kimey ya panagpulong.
Kombension ed Cedar Point, Ohio nen 1922
Insan nen Biernes, Setyembre 8, eksayted ya linmoob so manga 8,000 ya totoo diad auditorium, tan tatalaranan da so paliwawa nen Brother Rutherford. Labay dan naamtaan no antoy labay ya ibaga na “ADV” ya akasulat ed imbitasyon ya naawat da. Kayurong da, seguradon naimano da so balbaleg ya rolyo na abel diad tagey na stage. Si Arthur Claus, ya nanlapu nid Tulsa, Oklahoma, U.S.A., et akalmoy yurongan ya ditan et malinlinew ton narengel so programa. Balibali apili ton puesto ta diad saman et anggapo ni ray microphone o loudspeaker.
“Madengedengel kamin amin”
Pian naseguro ya anggapon balot so makaisturbo, inyanunsio na chairman ya anggapoy palooben ed auditorium legan na paliwawa nen Brother Rutherford. Nen 9:30 na kabuasan, inggapo nen Brother Rutherford so paliwawa to, tan oniay imbaga tod introduksion to: “Asingger lay Panarian na tawen.” Atan imay imbaga nen Jesus ya nabasad Mateo 4:17. Nen ipapaliwawa nen Brother Rutherford no panon ya naamtaan na totoo iyan Panarian, imbaga to: “Inkuan ya mismo nen Jesus ya diad panaon na kiwawala to et walay nagawan panag-ani, tiponen to iray matua tan matoor ya totoo.”
Oniay nanonotan nen Brother Claus: “Madengedengel kamin amin.” Pero, biglan inmaliwa so liknaan to kanian kaukolan toy ompaway. Diad tua balet, agto komon labay so ompaway ta amta ton agda la palooben.
Kalabas balet na pigaran minuto, maong lay liknaan to. Nen paarap lamet ed auditorium, arengel toy makmaksil ya tipak na audience. Na-excite si Brother Claus! Labay ton narengel so katuloyan na paliwawa kanian naisip toy onkalab diad asingger ed atep. Lapud mabiskeg ni ta 23 to ni labat ed saman, akakalab! Diad tagey et wala ray angkakabaleg ya bintana tan akalukas iratan. Nen diman pinmuesto, sankarengel to kuno imay paliwawa.
Pero aliwan si Arthur labat so wadman. Wadman met manayad tagey so pigaran kakaaro to! Say sakey ed sikara et si Frank Johnson. Inasinggeran ton tampol si Arthur tan tinepetan to, “Walay makdem ya pocket knife mo ditan?”
“On, wala,” kuan nen Arthur.
“Agi, sikay ebat ed pikakasi mi,” kuan nen Frank. “Nanenengneng mo yay baleg ya akarolyon abel? Banner itan. Say singer to et impotipot ed sarayay pasak. Dengel mon maong so ibaga nen Judge.a Talaranan mo ah, no ibaga to lan ‘iyabawag, iyabawag,’ putot mo yay apatiran taker.”
Kanian impaway nen Arthur may pocket knife to tan tatalaranan ton maong imay palatandaan ya pultoten to la may taker. Nagunoyan wala lad konklusyon na paliwawa to si Brother Rutherford. Seguradon inyupo-upot nen Brother Rutherford so boses to nen imbaga ton: “Mansiansia kayon matoor tan matua ya tasi na Katawan. Itultuloy yoy milaban tan agkayo onsusuko anggad pakaderal na Babilonia. Ipasabi yo so mensahe ed amin ya totoo. Nepeg ya naamtaan na mundo ya si Jehova so Dios tan si Jesu-Kristo so Ari na saray arari tan Katawan na saray kakatawan. Aya la so sankaimportantian ya panaon. Nia, say Ari et manuuley la! Sikayo ray manangiyabawag to. Kanian iyabawag, iyabawag, iyabawag yo so Ari tan say Panarian to!”
Nen arengel itan nen Arthur tan saray kakaaro to, pinutot dan tampol iramay taker kanian binmuskag may banner. Natan amta la na audience so labay ya ibaga na samay “ADV,” ta say akasulat ed banner et: “Advertise the King and Kingdom.”
BALEG YA PRIBILEHYO SO MANPULONG
Balbaleg so nitulong na samay kombension ed Cedar Point pian napakiwas iray agagi ya mamasya ed panagpulong, tan malikeliket dan ginawa itan. Oniay insulat na sakey ya colporteur (say tawag la natan et payunir) ya taga Oklahoma, U.S.A.: “Diad teritorya mi, maslak ya totoo et mantratrabaho ed coal mining tan agaylay irap na bilay da.” Imbaga to ya makaakis iray napupulongan da no narengel da so mensahe ya walad magasin ya Golden Age. Onia ni imbaga na sayan colporteur: “Talagan balbaleg ya pribilehyo ya ligliwaen mi irayan totoo.”
On, sineryoso na sarayan Estudyante na Biblia imay imbaga nen Jesus ya nabasad Lucas 10:2: “Dakel so aanien, balet daiset so mankikimey.” Kanian diad sampot na taon, mas desidido iran iyabawag so mensahe na Panarian ed amin ya totoo.
a No maminsan et tatawagen dan “Judge” si Brother Rutherford ta asali toy nantrabaho bilang judge diad Missouri, U.S.A.