2 | “Ligliwa a Manlalapud Kasulatan”

IBABAGA NA BIBLIA: “Amin ya insulat nensaman et insulat pian nibangat itayo, pian diad panagsungdo tayo tan diad ligliwa a manlalapud Kasulatan et nawalaan itayo na ilalo.”—ROMA 15:4.

No Antoy Labay ton Ibaga

Nabasa ed Biblia iray makaligliwan mensahe ya makatulong pian ombiskeg so liknaan tayo no negatiboy panagnonot tayo. Mangiiter met na ilalo o pag-asa so Biblia. Ibabaga na satan ya magano lan naekal so amin ya mamapairap ed emosyon tayo.

No Panon Iyan Makatulong

Normal labat ed too so makalikna na ermen sagpaminsan; pero aramay walay depression odino anxiety da, agmanunda so graben ermen tan panaburido da, inagew-agew da itan ya lalabanan. Panon ya makatulong so Biblia?

Dakel so makapabiskeg ya nabasa ed Biblia ya nayarin onsalat ed saray negatibon nononoten tayo. (Filipos 4:8) Napano na satan so nonot tayo na makaligliwa tan makapakalma iran mensahe ya ontulong ed sikatayon nakontrol so liknaan tayo.—Salmo 94:18, 19.
Makatulong so Biblia pian nalabanan so panisip ya anggapoy kana tayo.—Lucas 12:6, 7.
Ipapaseguro na dakel ya teksto ed Biblia ya agtayo bukbukor, tan say Dios ya Nanggawa ed sikatayo et natatalosan to so amin ya nalilikna tayo.—Salmo 34:18; 1 Juan 3:19, 20.
Ipropromisa na Biblia ya ekalen na Dios so amin ya sankanonot tayon aliwliwan apalabas. (Isaias 65:17; Apocalipsis 21:4) No naksawan ti lan mannononot tan naiirapay emosyon tayo, nayarin makatulong irayan promisa pian makapan-anos tayo tan ag-onsuko.

No Panon ya Natutulongan na Biblia si Jessica

No Antoy Epekto ed Siak na Depression

“Nen 25 so taon ko, nan-nervous breakdown ak tan a-diagnose ya walay graben depression ko. Naiirapan ak ta pawilpawil ed isip ko iramay singa bangungot ya agawad siak. Impaliwawad siak na saray doktor ya say sengegan na depression ko et saray makapa-trauman agawa ed bilay ko. Likud nid pantatambal ko, kailangan ko met so regular ya onkonsultad espisyalista pian naamtaan tan nauman ko iray negatibon nononoten ko.”

No Panon Ak ya Natutulongan na Biblia

“No onaataki so graben depression ko, man-panic tan manaburido ak, agak met makaugip. Mabetbet ya no labi, nambabangil so onseksek ed nonot ko, tan agko nakontrol. Ibabaga na Salmo 94:19, ya no grabe so panaaburido tayo, ligliwaen tan pakalmaen itayo na Dios. Kanian lanang ya walad abay na dukolan ko so Biblia tan notebook ko ya pangisusulatan koy makapabiskeg iran teksto. No agak makaugip, manbasa ak na pigaran bersikulo na Biblia pian say Salita na Dios so onkarga ed nonot ko tan naligliwa ak.

“Bibilinen itayo na Biblia ya agtayo pinunuyan iray onseksek ed isip tayon katilaan tungkol ed Dios. Dati, aluto-lutod nonot ko ya anggapoy kanak, tan anggapoy mangaaro ed siak. Pero naaralan ko ya kontra iratan manaya ed bangat na Biblia, ta say Dios et maar-aro tan mapangasin Ama ya manmamalasakit ed kada sakey ed sikatayo. Kalkalnak ya akontrol so nonot ko, imbes ya abuloyan kon kontrolen ak na satan. Naaralan kon ipasen so sarilik ya singa pangipapasen na Dios ed siak. Akatulong iratan pian nitundak iray negatibon nononoten ko ed sarilik.

“Labalabay ko lan onsabi panaon ya naekal so amin ya aliwliwan apalabas tan negatibon panagnonot. Amtak ya diad arapen et naandi lay amin a klase na problemad isip. Makakatulong iyad siak pian naanosan koy situasyon ko natan tan talaranan so balibalin arapen ya anggapo lay depression ko.”