Agmo Bukbukor ya Arapen Iray Subok!

1-2. (a) Akin et makaseguro tayo ya agtayo bukbukor ya arapen iray problema? (b) Antoy pantongtongan tayo ed sayan artikulo?

NO BALBALEG so problemam, ompan say pakaliknam et singa ka akalugan ed melag ya baloto diad pegley na dayat legan ya ombabagyo, tan anggapon balot so nakerewan moy tulong. Pero diad tua, agmo bukbukor ya arapen iray problemam. Wadtan si Aman Jehova ya ontulong. Amta toy situasyon mo, tan insipan to ya walan-walay gawaen to pian natulongan to iray matoor ya lingkor to. Oniay ipapasegurod sika nen Jehova: “Tulongan ta ka.”—Isa. 41:10.

² Pantongtongan tayod sayan artikulo so apatiran paraan no panon to tayon tutulongan nen Jehova: (1) Igigiya to tayo, (2) iiter to ray pankaukolan tayo, (3) proprotektaan to tayo, tan (4) papabiskegen toy liknaan tayo. On, antokaman tay subok ya dadalanen mo, makaseguro ka ya sankanonot ka nen Jehova tan agto kan balot paulyanan, kanian agmo bukbukor ya arapen itan.

IGIGIYA TO TAYO NEN JEHOVA

3-4. Panon to tayon igigiya nen Jehova natan? (Salmo 48:14)

³ Basaen so Salmo 48:14. Amta nen Jehova ya aliway pansumpalan tayo no iwanwan o igiya tayoy sarili tayo, kanian kakkaukolan tayoy panangigiya to. Panon to tayon igigiya nen Jehova natan? Uusaren toy Salita to, say Biblia. (Sal. 119:105) Dakel so nabasa tayo ditan ya makatulong pian makapandesisyon tayoy duga tan nipanengneng tayo iray balibalin ugali. No uunoren tayo ray bilin to diad Biblia, natan ni labat et magmaliw tayo lan maliket, tan nawalaan tayoy bilay ya andi-anggaan diad arapen.a Singa bilang, bibilinen to tayo ya agtayo maneem-em na sakit na linawa, magmaliw tayon matua ed amin a bengatla, tan aroen tayoy arum manlapud puso. (Sal. 37:8; Heb. 13:18; 1 Ped. 1:22) No gawaen tayo iratan, seguradon magmaliw tayon maong ya ateng, asawa, tan kaaro.

⁴ Impaisulat met nen Jehova diad Biblia iray istoryay bilay na saray totoo nensaman ya dinmalan met ed nanduruman subok ya dadalanen tayo natan, tan alikna da met iray nalilikna tayo. (1 Cor. 10:13; Sant. 5:17) No basaen tayo iratan, walay duaran naitulong tod sikatayo. Unona, onlemew so liknaan tayo ta asali met manaya na arum so dadalanen tayo. Tan no asarag da, nasarag tayo met. (1 Ped. 5:9) Komadua, makaaral tayod ginawa ra, tan sarag tayo itan ya aligen pian naanosan tayo met iray subok ya dadalanen tayo.—Roma 15:4.

5. Siopa ray uusaren nen Jehova pian igiya itayo?

⁵ Uusaren met nen Jehova iray agagi pian igiya itayo.b Singa bilang, wadtan iray manangasikaso na sirkito ya ombibisita ed saray kongregasyon pian pasesegen itayo. Baleg so nitutulong na saray paliwawa da pian ombiskeg so pananisia tayo tan mansiansiay pankakasakey ed loob na kongregasyon. (Gawa 15:40–16:5) Wadtan met iray makukulin elder ya akaparaan ya ontulong ed kada sakey ed sikatayo pian mansiansia tayon mabiskeg ed espiritual. (1 Ped. 5:​2, 3) Baleg met so papel na saray atateng pian ontatken ed espiritual iray ananak da. Tutulongan tan ipapasal da ra pian ombaleg iran makalakal tan amta dan ibiig so duga ed aliwa. (Pro. 22:6) Wadtan met iray maespiritual ya agagin bibii ya maong so alimbawa ra, tan akaparaan iran manbilin tan mamaseseg ed saray kabataan ya sister.—Tito 2:​3-5.

6. Antoy gawaen tayo pian nipanengneng tayo ya labay tayoy manpaigiya ed si Jehova?

⁶ On, dakel so uusaren nen Jehova pian nigiya to tayo. Anto balet so gawaen tayo pian nipanengneng tayon labay tayoy manpaigiya ed sikato? Oniay ibabaga na Proverbio 3:​5, 6: “Manmatalek ka ed si Jehova diad interon pusom, tan agka mandedepende ed dilin pakatalos mo.” No manmatalek tayod si Jehova tan tumboken tayoy panangigiya to, “gawaen ton maptek iray basbas [tayo].” Labay ton ibaga, tulongan to tayon makapanggawa na duga iran desisyon kanian napaliisan tayoy dakel ya problema, tan maliket so bilay tayo. Kabkabat nen Jehova so kada lingkor to, kanian no anto may bilin ya kaukolan mo, ilaloan mo ya aman so iter to. (Sal. 32:8) Misatsalamat tayod panangigiya nen Jehova!

IITER NEN JEHOVA IRAY PANKAUKOLAN TAYO

7. Antoy gagawaen nen Jehova pian niiter toy pankaukolan tayo? (Filipos 4:19)

⁷ Basaen so Filipos 4:19. Agto tayo labat igigiya nen Jehova. Bebendisyonan to met so sagpot tayon mantrabaho pian walay naakan, isulong, tan napanayaman tayo. (Mat. 6:33; 2 Tes. 3:12) Natural met labat ya sankanonot tayoy materyal ya pankaukolan tayo, pero aglabay nen Jehova ya pampagaan tayon maong iratan. (Nengnengen so study note na Mateo 6:25 ya “Huwag na kayong mag-alala” diad nwtsty-TG.) Akin ey? On ta bilang Ama tayo, insipan nen Jehova ya agto tayon balot paulyanan, lalo la no mankakkaukolan tayo. (Mat. 6:8; Heb. 13:5) Agan balot naturingan si Jehova, kanian mantiwala tayo ed satan ya imbaga to.

8. Antoy ginawa nen Jehova parad si David?

⁸ Isipen pa no panon ya tinulongan nen Jehova si David. Dakel ya taon ya nanamot-amot si David ta tutugisen nen Arin Saul. Mair-irap so situasyon nen David tan saray bataan to, pero inasikaso ira nen Jehova tan inter toy pankaukolan da. Seguradon ag-alingwanan nen David so impangasikaso nen Jehova ed sikato, kanian oniay insulat to: “Nensaman et ugaw ak ni tan natan et matatken ak la, balet anggapo ni anengneng kon matunong ya apaulyan, odino saray ananak to a mipapayabol na naakan.” (Sal. 37:25) Singa si David, seguradon aminpigam met lan apatunayan ya talagan agmamaulyan si Jehova!

9. No walay kalamidad, panon ya iiter nen Jehova so pankaukolan na saray lingkor to? (Nengnengen met so litrato.)

⁹ No walay kalamidad, seseguroen met nen Jehova ya niiter toy pankaukolan na saray lingkor to. Singa bilang, nen walay agawan eras nen inmunan siglo, saray Kristiano ed nanduruman lugar et angipawit na tulong parad saray agagin apektado. (Gawa 11:​27-30; Roma 15:​25, 26) Ontan met so gagawaen tayo natan. Mabulbulos tayon tutulongan iray agagi tayon mankakkaukolan. No walay kalamidad, papakiwasen nen Jehova iray lingkor to pian tulongan iray apektado tan niiter so pankaukolan da, singa say naakan, danum, kawes, tan tambal. Tan no wala ray aderal ya Kingdom Hall tan abung na agagi, mangibabaki so organisasyon tayo na grupo ya mangapiger ed satan. Alisto met iray lingkor nen Jehova ya mangiter na emosyonal tan espiritual ya tulong ed saray agagin naandian na kaykayarian o inateyan na inar-arod bilay lapud kalamidad.c

10-11. Antoy naaralan mod eksperiensya to may sakey ya prinsipal ed Ukraine?

¹⁰ Iiter met nen Jehova so pankaukolan na saramay agmandadayew ed sikato. Labay tayon aligen si Jehova, kanian manggagawa tayo met na paraan pian natulongan tayo ray agtayo kaagian. (Gal. 6:10) No tulongan tayo ra, ompan napakiwas met iran kabaten si Jehova. Imanoen so eksperiensya na prinsipal na sakey ya eskuelaan diad Ukraine. Aliwan Tasi nen Jehova iyan prinsipal, pero maomaong ed saray Tasi ya estudyante tan rerespetoen toy pananisia da. Nen kasagsagay guerra tan labay toy ontakas ed mas ligtas ya lugar, tinulongan na saray agagi. Insan nen inimbitaan da ed Memoryal na impatey nen Kristo, inmatendi. Oniay imbaga to nipaakar ed saray Tasi: “Mabaibait ira, tan inasikaso da ak ya maong. Misatsalamat ak ed amin ya ginawa ra parad siak.”

¹¹ Naalig tayoy panangasi nen Aman Jehova no panengnengan tayo met na panangaro iray mankaukolan na tulong, balanglan kaagian tayo ra odino andi. (Luc. 6:​31, 36) Komon ta lapud kamaongan ya ipapanengneng tayo et napakiwas met iran magmaliw ya patumbok nen Kristo. (1 Ped. 2:12) Pero anggano andi, maliket tayo nin siansia ta ibabaga na Biblia ya makapaliket so mangiter.—Gawa 20:35.

PROPROTEKTAAN TO TAYO NEN JEHOVA

12. Antoy insipan nen Jehova ya gawaen to parad saray lingkor to? (Salmo 91:​1, 2, 14)

¹² Basaen so Salmo 91:​1, 2, 14. Insipan nen Jehova ya protektaan to tayod espiritual pian agnaderal so pikakaaro tayod sikato. Aga ompayag si Jehova ya nadutakan lamet nen Satanas so dugan panagdayew. (Juan 17:15) Tan no “baleg a kairapan” la, makapantiwala tayo ya aliwa labat ya espiritual ya proteksion so iter nen Jehova, noagta protektaan to met so mismon bilay tayo pian makaliktar tayo.—Apo. 7:​9, 14.

13. Panon ya proprotektaan nen Jehova so kada lingkor to?

¹³ Panon balet ya proprotektaan nen Jehova so kada lingkor to? Inter tod sikatayo so Biblia. Atan so ontulong ed sikatayon ibiig so duga ed aliwa. (Heb. 5:14) No unoren tayo ray prinsipyo ya wadtan, naprotektaay espiritualidad tayo tan napaliisan tayo ray kagagawa ya manresultad sakit tan ermen. (Sal. 91:4) Say sakey nin uusaren nen Jehova pian naprotektaan to tayo et say kongregasyon. (Isa. 32:​1, 2) No say lanang tayon kaiba et saramay inar-aro day Jehova tan uunoren day prinsipyo to, napaseseg tayon manggaway duga tan mas napakiwas tayon arawian iray mauges ya impluensya.—Pro. 13:20.

14. (a) Akin et agto tayo ipapaliis nen Jehova ed saray subok? (b) Antoy ipapaseguro na Salmo 9:10? (Nengnengen met so paimanod leksab.)

¹⁴ Nensaman, wala ray situasyon ya prinotektaan nen Jehova iray lingkor to pian agniiyan ed peligro so bilay da. Pero aliwan lanang ya ontan so gagawaen to. Ibabaga na Biblia ya anggan siopa et nayarin magmaliw ya biktima na “saray ag-iilaloan a nagawa.” (Ecl. 9:11) Sakey ni, kaukolan ya napruebaan ya matila si Satanas, kanian inabuloyan nen Jehova ya napasegsegang iray lingkor To tan agto ira impaliis ed ipapatey. (Job 2:​4-6; Mat. 23:34) Ontan met ed panaon tayo. Tua, agto tayo ipapaliis nen Jehova ed saray subok, pero makaseguro tayo ya nasarag tayo itan ta insipan to ya agton balot taynan iray mangaaro ed sikato.d—Sal. 9:10.

PAPABISKEGEN NEN JEHOVA SO LIKNAAN TAYO

15. Panon ya makatulong so pikakasi, say Biblia, tan saray agagi pian ombiskeg so liknaan tayo? (2 Corinto 1:​3, 4)

¹⁵ Basaen so 2 Corinto 1:​3, 4. Kasin wala ray panaon ya maer-ermen tan aburido ka, tan agmo la amtay gawaen mo? Seguro say pakaliknam et bukbukor mo tan agka natatalosan na arum. Pero andi. Tandaan mo ya natatalosan to ka nen Jehova. Nasasakitan met no nanenengneng ton nasasakitan ka. Manggawan-manggaway paraan si Jehova pian ‘naligliwa to tayo diad amin ya subok ya dadalanen tayo.’ Panon ton gagawaen itan? No manpikasi tayo ed sikato tan ibaga tayoy amin ya nalilikna tayo, ikdan to tayoy ‘kareenan ya palumbasan toy amin a pakatalos.’ (Fil. 4:​6, 7) Dakel met so impaisulat tod Biblia ya mamabiskeg na liknaan tayo. Nabasa ditan iray balikas ya mangipapaseguron inar-aro to tayo, saray bilin ya makatulong pian makapannonot tayoy duga, tan saray sipan ya mangiter ed sikatayoy ilalo. Liligliwaen to tayo met nen Jehova diad saray aral tayo. Ditan et narerengel tayo iray makapaseseg ya punto ya nanlapud Biblia, tan nalilikna tayoy panangaro na agagi.

16. Antoy naaralan mo ed eksperiensya nen Nathan tan Priscilla?

¹⁶ Imanoen so sakey ya eksperiensya ya mangipapanengneng no panon ya uusaren nen Jehova so Salita to pian pabiskegen so liknaan tayo. Eksperiensya iya nen Nathan tan Priscilla ya tagad United States. Pigaran taon lay apalabas, nandesisyon iran sanasawa ya ontulong ed lugar ya daiset so Tasi. “Matalek kami ya bendisyonan nen Jehova so sakripisyo mi,” so kuan nen Nathan. Pero kasabi dad balon teritorya ra, bigla ran nansakit ya dua tan aproblema ra ed kuarta. Kanian ag-abayag, pinmawil la ra ed lugar da. Pero, tuloytuloy nin siansia so problema dad pinansyal. Oniay imbaga nen Nathan: “Naisip ko, ‘Akin ey? Singa agkami met benendisyonan nen Jehova. Wala amoy ginawak ya apabarong koy Jehova.’” Pero diad inlabas na panaon, no pawilen kuno nen Nathan tan Priscilla iman ya agawad sikara, anengneng da lanlamang ya ag-iran balot pinaulyanan nen Jehova nen mankakkaukolan ira. Oniay intuloy nen Nathan: “Mair-irap man ya dinalan mi, pero balbaleg so nitulong na Biblia ed sikami. Singa itan tuan kaaro ya mamapaseseg tan mamibilin ed sikami. Imbes ya say pampokusan mi et amay subok, say sankanonot mi la et no panon to kamin tinulongan nen Jehova pian nasarag mi iman. Kanian mas binmiskeg so tiwala mi ya anggan anto ni tay onsabin subok, tulongan to kamin tulongan nen Jehova.”

17. Panon ya niligliwa nen Jehova si Sister Helga? (Nengnengen met so litrato.)

¹⁷ Uusaren met nen Jehova iray agagi pian naligliwa tayo. Imanoen so eksperiensya nen Helga, ya tagad Hungary. Pigaran dekada ya nanduruman subok so dinalan to, ya lapud satan et alikna to kunon singa anggapoy kana to tan anggapo lay ilalo to. Pero inusar nen Jehova iray agagi pian pabiskegen so liknaan nen Helga. Kuan to: “Diad saraman ya panaon, lanang ak ya tutulongan nen Jehova, lalo la no nanenengneng ton naksawan ak la lapud trabahok, lapud pangaasikasok ed anak kon mansasakit, tan arum ni ran problema. Diad apalabas ya 30 taon, anggapo tay agew ya linmabas ya agko aliknay panangaro to. Talagan tinoor to may sipan to ya ligliwaen to ak. Uusaren to ray agagi ya mamaseseg ed siak tan ipapalikna rad siak ya walay kanak. No kakkaukolan koy panamaseseg, nagugunoyan walay man-text, walay mangiter na card, o walay agi ya komendaan to ak.”

18. Antoy gawaen tayo pian naligliwa tayo so arum?

¹⁸ Pribilehyo tayo ya aligen si Jehova, kanian ligliwaen tayo met so arum. Panon tayon nagawaan itan? No walay kabat mo ya ondadalan ed subok, dengel mo ra no ibabaga ray nalilikna ra, pabiskeg moy liknaan da, tan mangiter kay praktikal ya tulong. (Pro. 3:27) Pansagpotan mon ligliwaen so amin, anggan saramay agmanlilingkor ed si Jehova. Singa bilang, no diad kaabay yo et walay inateyan, walay mansasakit, o naproproblema ira, marakep no pasyaren yo ra, dengel kayod sikara, tan mangibasa kayo na makapaseseg iran teksto ed Biblia. No aligen tayoy Jehova, “say Dios na amin a ligliwa,” aliwan saray agagi labat so tulongan tayo. Tulongan tayo met iramay agni manlilingkor ed si Jehova, tan ompan atan so rason ya onlemek so puso ra tan napakiwas iran manlingkor ed sikato.—Mat. 5:16.

LANANG YA WADTAN SI JEHOVA PARAD SIKATAYO

19. Antoy gagawaen nen Jehova parad sikatayo, tan panon tayon naalig so alimbawa to?

¹⁹ Sankanonot tan imamalasakit ya maong nen Jehova so amin ya mangaaro ed sikato. Agto tayo paulyanan no wala ray subok ya dadalanen tayo. Aasikasoen nen Jehova iray matoor ya lingkor to, no panon ya aasikasoen na maaron ateng so anak to. Igigiya to tayo, iiter to ray pankaukolan tayo, proprotektaan to tayo, tan papabiskegen toy liknaan tayo. Naalig tayoy Aman Jehova no tulongan tan pasesegen tayo met so arum no naproproblema ira. Diad sayan sistema na mundo, agtayo nipuera ed saray problema tan walan-wala ray situasyon ya mamaermen ed sikatayo. Pero maong labat ta kaiba tayoy Jehova. Diad tulong to, anggapo tay subok ya agtayo nasarag. Insipan to: “Agka ontatakot, ta wala ak ed sika.” (Isa. 41:10) On, agmo bukbukor ya arapen iray subok!