Antoy Makatulong Pian Inagew-agew Mon Nabasa so Biblia?

Kasin labalabay mo komon so manbasa na Biblia ya inagew-agew, pero agmo nagagawaan lapud bip-busy ka? (Jos. 1:8) No ontan so situasyon mo, nia ray tips ya makatulong:

• Manggawa kay reminder. Mangi-set kay daily alarm ed gadyet mo ya mangipanonot ed sika ed pambasam na Biblia.

• Iyan moy Bibliam ed pasen ya mainomay ya nanengneng. No inimprintan Biblia so uusaren mo, napanonotan kan manbasa no wala itan ed pasen ya lanang mon nanenengneng.—Deu. 11:18.

• Dengel kay audio recording. Diad arum ya lenguahe, wala ray available ya audio recording na Biblia. Kanian say arum, isasabay day ondengel na audio recording legan dan gagawaen so inagew-agew ya rotina da. Oniay imbaga nen Tara, sakey ya nanay ya payunir tan panlabi so trabaho to: “Ondedengel ak na audio recording na Biblia legan ak ya mankikimey ed abung pian agko nasaew so Bible reading ko.”

• Agka onsusuko. No bilang ta agmo atumbok so eskedyul mon manbasa lapud wala ray agawa ya agmo inilaloan, manbasa ka nin siansia na anggan pigara labat ya bersikulo antis kan naugip. Anggano sandaraiset labat so nabasam basta inagew-agew, baleg lay nitulong to ’tan ed sika.—1 Ped. 2:2.