Pansiansia Yoy Liket Yo Anggano Matatken Kayo La

1-2. Antoy pakanengneng nen Jehova ed saray matatken lan lingkor to ya manmamatoor ed sikato? (Salmo 92:12-14; nengnengen met so litrato.)

DIAD arum ya bansa, ipapasen dan kagalangan so ontatken. Pero wala ray bansa ya ngalngali aglabay na totoo so ontatken. Singa bilang, no walay nanengneng dan amputin buek da, bagoten dan tampol. Pero siempre, anggan antoy gawaen da pian mansiansian ugaw so itsura da, agdan talaga napigilay ontatken.

² Si Aman Jehova ey, antoy pakanengneng to ed saray lingkor to ya matatken la? (Pro. 16:31) Diad Biblia, inkompara to ra ed mabunabunan kiew. (Basaen so Salmo 92:12-14.) Akin kasi et singa mabunan kiew iray maedad la? No diman mas matatken so sakey ya kiew, diman met mas masalompapak tan mas dakel so rosas to. Say sakey ed saray sankarakepan ya kiew et amay kiew ed Japan ya say rosas to et kabkabat ed tawag ya cherry blossoms. Say arum ed saratan et manbibilay lay masulok ya sanlibon taon. Singa sarayan matatken tan marakdakep ya kiew, saray matatken lan lingkor na Dios ya manmamatoor ed sikato et marakdakep met ed pakanengneng to. Aliwan saray amputin buek da labat so nanenengneng nen Jehova, nanenengneng to met so walad puso ra tan saray balibalin kualidad da—singa say panaanos tan panmamatoor da. Aapresyaen to met so abaybayag lan panlilingkor da ed sikato.

3. Mangiter na alimbawa na saray lingkor nen Jehova ya inikdan toy ambelat ya asainmin nen maedad la ra.

³ Anggano ontatatken la so sakey ya lingkor nen Jehova, aga nababawasay panamabli na Dios ed sikato.a Diad tua, wala ray lingkor nen Jehova ya inikdan toy ambelat ya asainmin nen maedad la ra. Singa bilang, nen akulaw lay Sara, imbaga nen Jehova ya manlukon tan magmaliw ya ina na mabiskeg ya nasyon, tan sikato so panlapuan na Mesias. (Gen. 17:15-19) Masiken met lay Moises nen ingganggan nen Jehova ya idaulo to ray Israelita papaway ed Ehipto. (Exo. 7:6, 7) Tan masikesiken lay apostol Juan nen impaisulat nen Jehova ed sikato so limaran libro na Biblia.

4. Base ed Proverbio 15:15, antoy makatulong ed saray maedad la pian naanosan da ray subok ya aarapen da? (Nengnengen met so litrato.)

⁴ No ontatatken la so sakey ya too, dakel so onlesan sakit to tan aliwa lan singa dati so biskeg to. Oniay imbaga na sakey ya sister: “Aliwan lurey so ontatken.” Pero no pansiansiaen na saray maedad la so liketb da, makatulong itan pian makapan-anos ira. (Basaen so Proverbio 15:15.) Pantongtongan tayod sayan artikulo no anto ray sarag ya gawaen na saray maedad la pian mansiansia ran maliket. Amtaen tayo met no panon tayon natulongan iray maedad la ed kongregasyon tayo. Pero pantongtongan tayo nin unona no anto ray subok ya aarapen da, tan no akin ya makaapekto itan ed liket da.

SARAY MAKAAPEKTO ED LIKET NA AGAGI YA MATATKEN LA

5. Antoy sakey ya pakakadismayaan na saray maedad la?

⁵ Sikayo ran maedad lan agagi, anto ray pakakadismayaan yo? Seguro say sakey et amay agyo la nagagawaan iramay datin gagawaen yo. Ompan sankanonot yo may nen makmaksil kayo ni. (Ecl. 7:10) Oniay imbaga nen Sister Ruby: “Irap koy manpales ta agaylay panutot na pukepukel ko tan ngalngali agko naigalaw so laman ko. Anggan say panmedyas, mair-irap ta ngalngali agko niyatagey so salik. Irayay limak ay, agla makalikna lapud arthritis, kanian agak makakimey.” Onia met so imbaga nen Brother Harold ya asali toy nanlingkor ed Bethel: “Agak makapanisia ya onia ak la natan! Dati, makmaksil ak, marundunong ak ya manggalaw na baseball. Nensaman, say ibaga na saray kagalaw ko, ‘Ipasa yoy bola ed si Harold pian segurado la.’ Pero natan, ngalngali agko la naitupak so bola.”

6. (a) Anto ni ray arum ya pakakadismayaan na saray maedad la? (b) Antoy makatulong ed pandesisyon na saray maedad la no kasin manmaneho ni ra o andi la? (Nengnengen ed sayan isyu so artikulon “Sarag Ko ni Kasi Manmaneho?”)

⁶ Ompan say sakey met ya pakakadismayaan yo et amay akadepende kayo la ed arum. Ompan wala lay caregiver yo odino kaukolan yo lay miayam ed anak yo. Ompan buragas met lay mata yo tan talagan kinmapuy lay laman yo, kanian agkayo la makapanmaneho tan agkayo la makaalis ed abung. Talagan makapadismaya met ya tua itan! Pero tandaan yo ya anggano ontan lay situasyon yo, agmanguman so panangaro nen Jehova tan panangaro mi ed sikayo. Tandaan yo met ya natatalosan nen Jehova so nalilikna yo. Say importante ed sikato et no antoy walad puso yo. Espisyal kayod sikato ta nanenengneng ton sikatoy inar-aro yo tan inar-aro yo met iray agagi.—1 Sam. 16:7.

7. Antoy nepeg ya tandaan na saray maedad la no say pakalikna ra et agda la nanengneng so isabi na anggaan?

⁷ Labalabay na saray lingkor nen Jehova ya nanengneng so isabi na Armagedon. Pero lapud ontatatken kayo la, ompan wala may liknaan yo ya agyo la nanengneng so isabi na anggaan. Antoy makatulong pian agkayo masyadon naermenan? Tandaan yo ya walay ambelat ya rason no akin ya manaanos si Aman Jehova tan agto ni dineral iyan mauges ya sistema na mundo. (Isa. 30:18) Manaanos ni anggad natan pian dakel nin totoo so naikdan na tsansa ya naamtaan so katuaan tan makapanlingkor ni rad sikato. (2 Ped. 3:9) Kanian no onkakapuy so liknaan yo, isip yo so karakel na totoon minabang ni ed panaanos nen Jehova. Malay yo, ompan pigara nin kapamilya o kanayon yo so mangawat ed katuaan antis ya onsabi so anggaan.

8. No walay liliknaen na saray maedad la, antoy epekto to ’tan ed sikara?

⁸ Antokaman so edad mo, kasin nasasalim may no walay liliknaen mo et makapangibaga o makagawa kay pagbabawian mo lanlamang? (Ecl. 7:7; Sant. 3:2) Sabagay, anggan say matoor ya lingkor na Dios ya si Job et wala ray imbaga ton ‘salita ya agla ninonot’ nen pinasyay paniirap to. (Job 6:1-3) Kanian no saray maedad la et singa ondumay ugali da tan nabibigla tayod ibabaga o gagawaen da, talosan tayo ra. Ompan epekto itan na sakit da o samay tambal ya tutumaren da. Pero siempre, anggano maedad tayo la o mansasakit tayo, agto labay ya ibagan wala lay karapatan tayon mansalita na ansakit o ipilit so labay tayo. No alikas tayon asakitan tayoy arum, onkerew tayon tampol na pasensia.—Mat. 5:23, 24.

NO PANON YA MANSIANSIAN MALIKET IRAY AGAGI YA MATATKEN LA

9. Akin et kaukolan yon awaten so tulong na arum? (Nengnengen met so litrato.)

⁹ Awat yoy tulong na arum. (Gal. 6:2) Wala ray maedad ya anggad nayari et agda labay so patulongan ed arum. Oniay imbaga nen Sister Gretl: “No maminsan, agko labay so onkerew na tulong ta iisipen ko ya ompan pabelat ak labat. Pero atalosan ko lanlamang ya aliwa man ya iisipen ko. Kaukolan koy manpaabeba ta talagan agko la nayarian no anggapoy tulong na arum.” No awaten yoy tulong na arum, iikdan yo ray pankanawnawa ya nalikna so liket, ta makapaliket so ontulong. (Gawa 20:35) Tan maliket kayo met ta diman yo nanengneng ya dakel manayay mangaaro ed sikayo.

10. Akin et importante ya agyo lilingwanay misalamat? (Nengnengen met so litrato.)

¹⁰ Agyo lilingwanay misalamat. (Col. 3:15; 1 Tes. 5:18) No walay kamaongan ya ginawa na arum parad sikatayo, seguradon naapresya tayo. Pero ompan nalilingwanan tayoy misalamat. Diad tua, anggan say simplin iyimis tan pangibagay “Salamat” et baleg lay nagawaan to pian nalikna na arum ya papablien tayoy gagawaen da parad sikatayo. Oniay imbaga nen Leah ya mangaasikaso ed saray maedad la diad Bethel: “Wala tay aasikasoen ko ya sister ya lanang da ak ya iikdan na thank you letter. Antirikey met labat, pero nata-touch ak. Labalabay kon basaen, tan naliliketan ak ta aapresyaen day gagawaen ko.”

11. Panon yon natulongan so arum? (Nengnengen met so litrato.)

¹¹ Pansagpotan yoy ontulong ed arum. No say sankanonot yo et say itulong ed arum, agkayo masyadon akapokus ed saray problema yo. Walay kasabihan ed Africa ya inkompara to ray maedad la ed sakey ya library. Duga met itan ta no onla kad library tan manbasa kay libro, dakel so naaralan mo. Ontan met iray maedad la. Dakel so naaralan tayod sikara. Pero di ba, anggano dakdakel so libro balet ta aga nabubukay, sayang labat. Kanian sikayo ran maedad la, antoy gawaen yo pian makaaral ed sikayo iray mas ugugaw? Miistoryaan kayod sikara pian mas nakabkabat yo ra. Tepetan yo ra tan dengel yo iray ibabaga da. Istorya yo no panon kayon tinulongan nen Jehova tan no panon ya nagmaliw ya maliket so bilay yo lapud maunor kayod sikato. No kaaroen yo ray kabataan tan pabiskegen yoy liknaan da, seguradon nalikna yoy liket.—Sal. 71:18.

12. Base ed Isaias 46:4, antoy insipan nen Jehova ya gawaen to parad saray matatken lan lingkor to? (Nengnengen met so litrato.)

¹² Ipikasi yod si Jehova ya ikdan to kayoy biskeg. Ompan wala ray agew ya makakkapuy so laman yo odino onkakapuy so liknaan yo. No ontan so nalilikna yo, tandaan yo may ibabaga na Biblia ya si Jehova et “agbalot nakesawan odino onkapuy.” (Isa. 40:28) Kanian sarasarag ton iter so biskeg ya kaukolan yo. (Isa. 40:29-31) Diad tua, insipan to ya tulongan to kayo. (Basaen so Isaias 46:4.) Lanang ya totooren nen Jehova so sipan to. (Jos. 23:14; Isa. 55:10, 11) No manpikasi kayod si Jehova tan nalikna yoy tulong to, diman yo napaneknekan ya talagan inar-aro to kayo. Amay nalikna yon inar-aro kayo nen Jehova, talagan makapaliket itan!

13. Base ed 2 Corinto 4:16-18, antoy nepeg tayon nonoten? (Nengnengen met so litrato.)

¹³ Lanang yon nonoten ya onugaw tan ombiskeg kayo lamet. Ayay mairap ya situasyon yo natan et temporaryo labat. No atan so sankanonot yo, mas makapan-anos kayo ta amta yon manguman lanlamang so situasyon yo. Dalepdep yo imay ibabaga na Biblia ya onsabi panaon et ompawil kayod kaksilan tan anggapo lay mansakit. (Job 33:25; Isa. 33:24) Kanian imbes ya sankanonot yoy apalabas, say nonot yo la et saray gawaen yo ed arapen—amay no makmaksil kayo la. Makapaliket itan ya imadyinen! (Basaen so 2 Corinto 4:​16-18.) Sikatayo ran mas ugaw ey, panon tayon natulongan iray maedad la?

NO PANON YA MAKATULONG SO ARUM

14. Akin et importante ya pasyaren tan tawagan tayo ray maedad la?

¹⁴ Pasyaren tan tawagan tayo iray maedad lan agagi. (Heb. 13:16) No lanang ya bukbukor na saray maedad lan agagi, natural labat ya naermenan ira. Oniay imbaga na maedad lan brother ya agla makaalis ed abung: “Sanagew ak labat ya walad abung tan anggapoy gagawaen ko. No maminsan, naiingongotan ak ta singa ak ayep ya wala labat ed kulongan.” Marakep sirin no pasyaren tayo ray agagin maedad la pian nalikna ra ya importante rad sikatayo tan inar-aro tayo ra. Seguro asalim la may anonotan mon tawagan o pasyaren so maedad lan kakongregasyon yo pero agmo lanlamang agawaan. Sabagay, amin tayo et bip-busy tan dakel so iyuulo tayo. Anto sirin so makatulong pian seguradon nagawaan tayo ray “mas importantin bengatla,” singa say ipasyar ed maedad lan agagi? (Fil. 1:10) Marakep no manggawa kay reminder diad cellphone mo pian nanonotan mon i-text o tawagan so maedad lan kakongregasyon mo. Marakep met no walay akaeskedyul ya agew na ipasyar mod sikara. Iplanom ya maong pian talagan natuloy.

15. Anto ray sarag tayon gawaen no kaiba tayo ray maedad lan agagi?

¹⁵ Kasin labay mon nakaiba o nakaistoryaan iray maedad la, pero manaalangan ka ta agmo amta no antoy gawaen o pantongtongan yo? Agmo masyadon panaaburidoan itan. Basta say importante, ipaliknam ya kaaro so turing mod sikara. (Pro. 17:17) Kumustam ira antis o kayari na aral. Panistoryam ira. Tepetan mo ra no antoy paborito dan teksto odino no antoy agda nalinglingwanan ya makapalek ya ginawa ra nen ugaw ni ra. Marakep met no itagar mo ran manbantay na JW Broadcasting^®. Ompan wala ni ray nanonotan mon paraan pian natulongan mo ra. Singa bilang, i-update moy cellphone o tablet da, tan ipanengneng mod sikara no panon ya i-download iray balon publikasyon tayo. Oniay imbaga na akulaw lan agi, si Sister Carol: “No anto may labalabay yon gawaen, sikato met so labay mi. Siak, anggano akulaw ak la, labalabay koy man-shopping, mangan ed paway, tan ompasyar ed saray mararakep ya lugar.” Tan oniay imbaga nen Sister Maira nipaakar ed akulaw lan kaaro to: “Wala tay sister ya 90 lay taon da. Singkuentay-siete ya taon so baetan mi, pero singa kami labat mankaedad. Labalabay mi manistoryaan na makapalek tan manbantay na pelikula. No walay problemak, ibabagak ed sikara tan bibilinen da ak. Tan no sikara met so naproproblema, ibabaga dad siak tan tetepetan da ak no antoy nibagak.”

16. Akin et importante ya walay kaiba na saray maedad la no manpa-check up ira?

¹⁶ Ibaan tayo ra no manpa-check up ira. Agtayo labat ira iyaakar. Marakep no wadman tayo met ya mismo no katongtong da la may doktor. Seguroen tayo ya talagan naasikaso ira na saray wadman ed ospital. (Isa. 1:17) No ibaan mon manpa-check up so sakey ya maedad la, isulat mo no antoy ibaga na doktor. Oniay imbaga na sakey ya maedad lan agi, si Sister Ruth: “No bukbukor koy manpa-check up, aga seseryosoen na doktor so ibagak. No maminsan, say ibaga na doktor, ‘Ay Bai, anggapoy sakit yo. Iisipen yo labat itan.’ Pero no walay kaibak, dengelen ak na doktor. Misatsalamat ak ed saray agagi ya mangiibad siak no manpapa-check up ak.”

17. Anto ray sarag tayon gawaen pian naibaan tayo ray maedad lan agagi diad ministeryo?

¹⁷ Ibaan tayo ra diad ministeryo. Wala ray maedad lan agagi ya agda la sarag so manpulong ed kaabungan. No ontan so situasyon da, sarag mo ran itagar ya man-cart witnessing. Iyawitan mo la ray nayurongan da diad abay na cart. Odino itagar mo ran man-Bible study. No nayari, amay iyaaralan mo la so awit mod abung da pian agla ra onalis. Mas baleg so posibilidad ya makapanpulong iray maedad la no diad abung da gawaen so pantitipon parad lawak na kimeyan. Sarag na saray elder so manggawa na ontan ya uksoyan, no posible. Tandaan tayo ya sulit so amin ya gawaen tayo pian napagalangan iray maedad la.—Pro. 3:27; Roma 12:10.

18. Antoy pantongtongan tayo ed ontumbok ya artikulo?

¹⁸ Impanonot na sayan artikulo ya inar-aro tan papablien nen Jehova iray matatken lan agagi tayo. Inar-aro tayo met ira. Sikayo ran agagi mi ya matatken la, tandaan yo ya anggano aliwan mainomay so ontatken, seguradon napansiansia yoy liket yo diad tulong nen Aman Jehova. (Sal. 37:25) Imbes ya pawilpawilen yoy apalabas, nonot yo la iray balibalin gawaen yo diad arapen. Panon to balet iramay agagi tayon mangaasikaso na saray maedad lan kapamilya da, anak da, o kaaro da ya mansasakit? Anto met so gawaen da pian mansiansia ran maliket? Pantongtongan tayoy ebat ed satan ya tepet diad ontumbok ya artikulo.