Tulong Parad Saray Naabuso ya Bibii

Atan so nabasa ed gapo na artikulo ed jw.org ya “Say Pangasikaso ed Saray Bibii​—No Antoy Ibabaga na Biblia.” Diad sampot na satan ya artikulo, walay link ya no i-click mo et na-download mo so PDF na satan ya artikulo. Sarag mo itan ya i-print tan itupi ya singa tract ya apatiray pahina to. Oniay imbaga nen Sister Stacy ya tagad United States: “Diad teritorya na kongregasyon mi, wala tay pasen ya panaayaman na saray bibii ya naabuso, anggapoy napanayaman da, tan pakaskasi so situasyon da. Nan-print ak na piga-pigaran kopya to may artikulo tan inawit ko diman kaibay sakey ya sister.”

Walay sakey ya empleyado ya akikerew ni na kaaruman ya kopya pian niiter to ed arum nin manaayam diman. Kanian 40 ni ya kopya na sayan tract so inter na saray sister, kaibay 30 ya jw.org ya contact card. Nen binmisita lamet iramay sister, imbaga na supervisor ya sarag dan ipanengneng ed saray manaayam diman no panon so manaral na Biblia.

Wala ni ontan ya pasen ya binisita nen Stacy tan duara nin sister. Angitilak iray limaran kopya na samay tract pero kinmerew ni ray empleyado diman na kaaruman ya kopya. Oniay imbaga na sakey ya empleyado: “Balbaleg so nitulong to yan pamphlet ed saray bibii dia. Kakkaukolan mi ya.” Nen binmisita lamet iramay sister, nantitipon iray pigaran bibii ya manaayam diman, tan indemonstra na saray sister so panag-aral na Biblia. Kayari to man, walay duaran bibii ya angibagan labay day miaral diad Kingdom Hall.

Oniay imbaga nen Stacy: “Agmi inilaloan ya dakel so malabay ya manbasa ed sayan artikulo. No aka-print tan akatupi la, balibalin iter ed saray naabuson bibiin pian naamtaan day mensahe na Panarian. Malikeliket kami ed nansumpalan na saray sagpot mi. Eksayted kami la no panon ya bendisyonan nen Jehova iray arum nin gawaen mi pian natulongan irayan bibii.”