Tepet na Saray Manbabasa

Anton “kanonotan” so asingsingger lan iyan nen Jehova ed kapusoan na saray gobierno?

Oniay imbaga na Apocalipsis 17:16, 17 nipaakar ed igapo na baleg ya kairapan: “Say samploran saklor ya anengneng mo tan say atap ya ayep et busolen da may imoral a bii tan sikatoy deralen tan lakseban da, tan upoten day laman to tan sigpot dan poolan. Ta inyan na Dios ed kapusoan da so panggawa ed samay walad kanonotan to, salanti, gawaen imay saksakey a kanonotan da, ya iter da ed atap ya ayep so panarian da.” Base ed saray publikasyon tayo nensaman, say “kanonotan” ya iyan nen Jehova ed kapusoan na saray gobierno et say panderal da ed palson relihyon.

Pero kaukolan tayon umanen so pakatalos tayo ed saya. No usisaen tayon maong may teksto, say “kanonotan” ya iyan nen Jehova ed kapusoan na saray gobierno et say ‘pangiter da na panarian da ed atap ya ayep.’ Pian natalosan tayo no panon ya nasumpal iyan propesiya, imanoen so pigaran tepet.

Siopay isisimbolo na saray karakter ya abitla ed sayan propesiya? Amay “imoral a bii” et tinawag met ya “Makapanyarin Babilonia.” Isisimbolo to so amin ya palson relihyon ed interon mundo. Amay “ambalbalangan atap ya ayep” et isisimbolo toy United Nations, ya datin tatawagen ya League of Nations. Binuo iyan organisasyon nen 1919 pian niwala kunoy kareenan ed interon mundo. (Apo. 17:3-5) Amay “samploran saklor” et isisimbolo toy amin ya gobierno ya onsusuporta ed atap ya ayep.

Antoy relasyon na samay imoral a bii tan samay ambalbalangan atap ya ayep? “Akayurong” imay imoral a bii ed samay ambalbalangan atap ya ayep. Labay ton ibaga sirin, susuportaan tan kokontrolen to itan.

Antoy nagawa ed samay imoral a bii? Amay atap ya ayep tan samay samploran saklor ya onsusuporta ed sikato et “busolen da may imoral a bii.” Grabe pambusol da ed sikato, kanian upoten day amin ya kayamanan to tan iparungtal day inkauges to. Deralen da so Makapanyarin Babilonia pian nipaakseb so panangukom nen Jehova ed sikato. (Apo. 17:1; 18:8) Anggapoy ikera da ya anggan sakey ya palson relihyon! Pero antis to ’tan, walay ipagawa nen Jehova ed saray gobierno ya anggad kapigan et agnin balot agawa.

Antoy ipagawa nen Jehova ed saray gobierno? Iyan toy “kanonotan to” ed kapusoan na samay samploran saklor. Pakiwasen ira nen Jehova ya ‘iter day pakayari tan autoridad da ed atap ya ayep’—say United Nations. (Apo. 17:13) Isip mo pa ’tan ya propesiya. Onsabi panaon ya ipasa na saray gobierno na totoo so pakayari tan autoridad da ed United Nations. Pero gawaen da itan aliwan lapud atan so talagan labay dan nagawa. Gawaen da itan lapud atan so idikta nen Jehova ya gawaen da. (Pro. 21:1; ikompara so Isaias 44:28.) Kasin kalkalna so pangipasa da na pakayari da ed United Nations? Andi! Bigbigla labat itan ya nagawa. No wala lad United Nations so pakayari na saray gobierno, diman to met la deralen tan upoten so amin ya palson relihyon. On, ipaakseb toy panangukom nen Jehova ed sikara!

Anto sirin so ilaloan tayon nagawa? Kasin kaukolan tayo nin alagaren ya ibalita dan kalkalna la ya lalon onkakasil so suporta na saray gobierno ed United Nations? Kasin atan so basiyan tayo pian nibagan asingger lan nagawa iyan propesiya? Andi! Tandaan, bigbigla labat ya pakiwasen nen Jehova iray gobierno ya iter day pakayari da ed United Nations. No nagawa la itan, amta tayo ya onggapo lay baleg ya kairapan. Kanian “mansiansia itayon aliing tan mantultuloy itayon manlikas” pian akaparaan tayo ed sarayan pananguman ya asingsingger lan nagawa!—1 Tes. 5:6.