Usar Moy “Espiritual a Regalo” ya Inter na Dios ed Sika

Makapaseseg no kaiba tayo ray agagi. Pero agto labay ya ibaga ya basta saniiba tayo et automatiko lan napaseseg tayoy sakey tan sakey. Dapat walay gawaen tayo. Diad Biblia, amay abilidad tayon pabiskegen so pananisia na sakey tan sakey et atawag ya “espiritual a bendisyon [o “regalo,” paimanod leksab].” (Roma 1:​11, 12) Panon tayon nausar iyan “espiritual a regalo”?

Pasesegen so arum diad saray ibabagam. Singa bilang, no mankokomento tayo diad aral, agtayo ipapaarap so atension ed sarili tayo. Mas marakep no say komento tayo et no antoy naaralan tayo ed si Jehova, ed Salita to, tan ed saray matoor ya lingkor to. No katongtong tayo ray agagi, komon ta lanang ya makapabiskeg iray istoryaen tayo.

Pasesegen so arum diad saray desisyon tan gagawaen mo. Singa bilang, wala ray agagi ya aga tinmundad sigpot panaon ya panlilingkor da anggano wala ray dadalanen dan subok. Say arum, seseguroen da ya makaatendi ira ed midweek ya aral anggano naknaksawan irad trabaho o walay graben sakit da.

Sika ey? Panoy panguusar mo ed “espiritual a regalo” ya inter nen Jehova ed sika? Kasin napapaseseg iray agagi ed saray ibabagam tan gagawaen mo? Kasin naiimanom met iray ibabaga tan gagawaen da pian napaseseg da ka?