Say Pananap na Sankarakepan ya Regalo

Aliwan mainomay so mannonot na iregalo. Lalo la ta akadepende ed regaloan mo no kasin nagustoan to o andi. Tan nayarin say nagustoan na sakey ya too et agnagustoan na arum.

Singa bilang, nayarin labalabay na sakey ya tinedyer so naregaloan na balon gadyet. Pero parad sakey ya adulto, nayarin say labay to et amay walay sentimental value, singa saray gamit ya impatawir na bai o laki. Diad arum ya lugar, mas labay day kuarta ta nisaliw day labay da.

Anggano mairap, wala ni ran siansia so manaanap na regalo ya talagan nagustoan na toon espisyal ed sikara. No maminsan, agka makalmoy labay mon iregalo, pero wala ray dapat mon tandaan pian mas baleg so posibilidad ya nagustoan itan na pangiteran mo. Amtaen tayoy apatira ya makatulong.

Say labay na regaloan mo. Walay laki ed Belfast, Northern Ireland ya imbaga ton say sankarakepan ya regalon naawat to et racer bike ya inter ed sikato nen 10 o 11 ni labat so taon to. Akin? “Ta talagan pangarap ko man,” so kuan to. Nanengneng ed satan ya imbaga to ya akadepende ed labay na pangiteran mo no kasin nagustoan toy regalom odino andi. Kanian isip mo nin unona so toon regaloan mo. Isip mo no antoy importante ed sikato ta ditan mo naamtaan no antoy labay to. Singa bilang, importante ed saray bai tan laki ya nakaiba day pamilya da. Kanian labay dan nanengneng ya lanang iray anak tan apo ra anggad posible. Seguradon malikeliket iray bai tan laki no ipila irad pambakasyon na pamilya​—nagusgustoan da itan ya regalo!

Pian naamtaan moy labay na sakey ya too, dengel kan maong ed saray ibabaga to. Bibilinen itayo na Biblia ya nepeg itayon “aliston ondengel, agbengatbengat a mansalita.” (Santiago 1:19) No katongtong mo ray kakaarom o kakanayon mo, imanom ed saray ibabaga da no anto ray labay tan agda labay. Makatulong itan pian makapampili kay regalo ya nagustoan da.

Say kaukolan na regaloan mo. Anggano simpli labat so regalo, naapresyan maong na pangiteran mo no kakkaukolan to itan. Pero panon mon naamtaan no antoy kaukolan to?

Say sankainomayan ya paraan pian naamtaan mo et tepetan mo no antoy kaukolan o labay to. Balet iisipen na arum ya no ontan so gawaen da, agla nasurprisa may pangiteran da kanian nabawasan so liket dan mangiter. Sakey ni, wala ray totoo ya anggano ibabaga dad arum iray labay tan agda labay, agda balet ibabaga iray pankaukolan da.

Kanian dapat maobserba ka tan imanom ya maong so situasyon na regaloan mo. Kasin kabataan ni, matatken la, single, wala lay asawa to, sian ed asawa, abalo, walay trabaho to, odino nanretiro la? Nonot mo no anton regalo so mausa-usar ed sakey ya too depende ed situasyon to.

Pian naamtaan moy kaukolan na regaloan mo, tepetan mo iramay parehoy situasyon dad sikato. Ompan makaala kay ideya no antoy kaukolan to ya ag-amta na arum. Kanian naikdan moy regalo ya nausar to ya anggapo ni angiter ed sikato.

Dugan panaon. Ibabaga na Biblia: “Say salitan imbalikas ed dugan panaon et alay abig!” (Proverbio 15:23) Nanengneng ed satan ya bersikulo ya baleg so epekto na pansalita ed dugan panaon. Di ba naliketan so katongtong tayo no dugay panaon na pansalita tayo? Ontan met ed panregalo, naliketan so regaloan tayo no iter tayo itan ed dugan panaon odino okasyon.

Mankasal so kaarom. Asingger lan man-graduate so sakey ya kabataan. Asingger lan mananak so sakey ya nanay. Pigara labat iraya ed dakel ya okasyon ya mangiiter tayoy regalo. Say arum et ililista day ontan iran espisyal ya okasyon pian makapamplano la ra no antoy sankarakepan ya iregalo da.a

Siempre, aliwa labat ya diad saray espisyal ya okasyon so panregalo tayo. Nalikna tayoy liket na pangiter ed anggan anton panaon. Pero kaukolan so panalwar. Singa bilang, no regaloan na sakey a balolaki so sakey ya marikit ya anggapo met so rason, ompan isipen na marikit ya walay panggusto na balolaki ed sikato. Ayos labat no talagan walay panggusto to. Pero no anggapo, ompan manresulta itan ed agpantatalosan tan magmaliw ya komplikadoy situasyon. Importante sirin ya nonoten na manregalo so motibo to.

Say motibo na manregalo. Singa diad samay abitlan situasyon, dapat ya amtaen no kasin posible ya aliway isipen na regaloan. Pero siempre, dapat ya usisaen na mismon manregalo no anton talagay motibo to. Iisipen na arum ya maong so motibo rad pangiiter day regalo, pero diad tua et dakel so manreregalo lapud napre-pressure labat ira ta walay okasyon. Say arum balet et manreregalo pian makala ray pabor odino pian naregaloan met ira.

Antoy gawaen mo pian nasegurom ya dugay motibom ed panregalom? Ibabaga na Biblia: “Komon ta amin a gagawaen yo et gawaen yo diad aro.” (1 Corinto 16:14) No manregalo ka lapud inarom iramay pangiteran mo tan manmamalasakit kad sikara, seguradon malikeliket ira tan malikeliket ka met ta antam ya angiter ka manlapud pusom. Napaliket mo met so Ama tayo ed tawen. Inapresya nen apostol Pablo iramay Kristiano ed Corinto nensaman ta malikeliket iran tinmulong ed saray mankaukolan ya Kristiano ed Judea. “Aaroen na Dios so maliket a mangiiter,” so kuan nen Pablo ed sikara.​—2 Corinto 9:7.

No tandaan mo iraya, makapangiter kay regalo ya mamaliket ed arum. Sarayan abitla so pigarad saray rason no akin ya nanggaway paraan so Dios pian niiter to so sankarakepan ya regalo ed totoo. Maabig no basaen mo so onsublay ya artikulo pian naamtaan mo no anto itan ya regalo.