Posible Kasin Magmaliw ya Patas so Sistema ed Ekonomya?
Dakdakel natan so manproprotesta ed nanduruman bansa ta pakalikna ra et aliwan patas so sistema na ekonomya. Tan lapud COVID-19 pandemic mas grinmabe so situasyon ta magulogulo la tan mas sankanengneng lay baleg ya pandumaan na mayaman tan mairap legan na lockdown, kakulangay suplay, tan limitadon serbisyo na panagpatambal.
Naandi ni kasi iray problema ed ekonomya ya mamapairap ed interon mundo? On. Ipapaliwawa na Biblia no panon ya solusyonan na Dios iray problema tayo natan.
Saray problemad ekonomya ya solusyonan na Dios
Problema: Anggapo ni agawaan na too ya sistema ed ekonomya ya sarag ton iter so amin ya pankaukolay totoo.
Solusyon: Salatan na Dios so gobierno na too na gobierno to, say tawag ed satan et Panarian na Dios. Akaletneg itan ed tawen tan uleyan toy interon dalin.—Daniel 2:44; Mateo 6:10.
Resulta: Say Panarian na Dios et sakey a gobiernon sakopen toy interon mundo, kanian perpekto so panuley to ed saray nagagawad dalin. Aglan balot manirap iray totoo odino manaburido no kasin walay pambilay da. (Salmo 9:7-9, 18) Noagta na-enjoy dan mismo so amin ya nankimeyan da tan nawalaan iray balibalin bilay kaiba so pamilya da. Oniay impromisa na Biblia: “Mangipaalagey ira na kaabungan tan manayam ira ditan, tan mantanem ira na kaubasan tan kanen day bunga to. Ag-ira mangipaalagey tan sananey so manayam, ag-ira mantanem tan sananey so mangan.”—Isaias 65:21, 22.
Problema: Agnatakasan na totoo iray situasyon ya panlalapuan na paniirap da.
Solusyon: Usaren na Dios so Panarian to pian ekalen so amin ya panlalapuan na takot tan kapagaan.
Resulta: Diad panangasikaso na Dios, aglan balot naeksperiensya na totoo iray situasyon ya panlapuan na panirap da. Singa bilang, aglan balot nagawa iray guerra, eras, tan pandemic. (Salmo 46:9; 72:16; Isaias 33:24) Imbaga na Dios: “Manayam iray totook diad mareen a pasen, diad saray maligen ya ayaman tan mareen a pasen a painawaan.”—Isaias 32:18.
Problema: Maslak et bibiktimaen na saray makasarili tan masaol iray totoo.
Solusyon: Aralen na saray manpapasakop ed Panarian na Dios ya ipanengneng so panangaro ed arum imbes ya diad sarili ra.—Mateo 22:37-39.
Resulta: Diad uley na Panarian na Dios, aligen na amin ya totoo so panangaro na Dios ya “agto aanapey dilin pankaabigan to.” (1 Corinto 13:4, 5) Ibabaga na Biblia: “Anggapo lay gawaen dan makapasakit odino makaderal ed interon masanton palandey ko, lapud say dalin et napano na kakabatan ed si Jehovaa a singa saray danum a mamapano ed dayat.”—Isaias 11:9.
Ipapaamta na Biblia ya manbibilay tayo la ed kaunoran iran agew na sistema na sayan mundo tan magano lan gawaen na Dios so impromisa to ya ekalen to so amin ya problema ed ekonomya.b (Salmo 12:5) Legan ya anggapo ni itan, wala ray prinsipyo ed Biblia ya makatulong ed sika no panon mon arapen iray problema ed ekonomya. Singa bilang nengnengen iray artikulo ya “No Panon ya Pasaragen so Daiset ya Kuarta” tan “Balansin Panmoria ed Kuarta.”
a Nabasad Biblia ya Jehova so ngaran na Dios.—Salmo 83:18.
b Pian naamtaan mo no akin ya napantiwalaan moy Biblia, nengnengen so artikulon “Say Biblia—Napantiwalaan ya Pakaromogan na Katuaan.”