Makmaksil Iran Yegyeg—Antoy Impropesiya na Biblia Tungkol ed Satan?

Kada taon, nilibo so nagagawan yegyeg. Maslak ed saratan et makalna labat, pero no makmaksil so yegyeg, dakel so naderal, manirap, tan ompatey. No maminsan, saratan so sengegan na saray tsunami ya manederal ed saray pasen ya asingger ed dayat, tan dakel so ompapatey ya manaayam ditan. Kasin impropesiya na Biblia irayan makmaksil ya yegyeg?

Diad sayan artikulo

• Kasin impropesiya na Biblia iray yegyeg?

• Kasin saray yegyeg natan et kasumpalan na propesiya na Biblia?

• Antoy epekto ed sikatayo na propesiya na Biblia tungkol ed saray yegyeg?

• Saray lingon pakatalos tungkol ed propesiya na Biblia tan saray yegyeg

Kasin impropesiya na Biblia iray yegyeg?

Binitla nen Jesus iray yegyeg diad samay propesiya to ya akarekord ed Biblia. Nabasa tayod taloran libro na Biblia iray imbaga to tungkol ed saray yegyeg:

“Manlalaban iray bansa ontan met ed saray panarian, tan wala ray eras tan yegyeg ed nanduruman pasen.”—Mateo 24:7.

“Manlalaban iray bansa ontan met ed saray panarian; wala ray yegyeg ed nanduruman pasen; wala ra met so eras.”—Marcos 13:8.

“Wala ray maksil a yegyeg, tan diad nanduruman pasen et wala ray eras tan salot.”—Lucas 21:11.

Impasakbay nen Jesus sirin ya nagawa iray “maksil a yegyeg” diad “nanduruman pasen” legan ya nagagawa met iray guerra, eras, tan salot. No amin iraya et manbabansag ya nagawa, malinew ya manbibilay tayo la ed panaon ya tatawagen ya “say kaunoran a parte na sistema na mundo,” odino “kaunoran iran agew.” (Mateo 24:3; 2 Timoteo 3:1) Base ed kronolohiya na Biblia, ginmapo so “kaunoran iran agew” nen 1914 tan tuloytuloy ni itan anggad natan.

Kasin saray yegyeg natan et kasumpalan na propesiya na Biblia?

On. Nanenengneng tayo lad panaon tayo iray impropesiya nen Jesus, kaiba la ray imbaga to tungkol ed saray yegyeg. Manlapu la nen 1914, wala lay agawan masulok ya 1,950 ya maksil iran yegyeg. Tan no paniibaen so bilang na totoon inatey ed saratan, onabot itan ed masulok ya duaran milyon.a Nia ray pigaran alimbawa na agawan maksil ya yegyeg diad sayan siglo.

2004—Indian Ocean. Lapud 9.1-magnitude ya yegyeg, walay agawan tsunami ya inmabot ed dakel ya bansa tan amatey na manga 225,000 ya totoo.

2008—China. Dineral na 7.9-magnitude ya yegyeg so pigaran baryo tan baley, tan base ed tantiya et walay inatey ya 90,000 ya totoo, manga 375,000 so asugatan, tan minilyon so naandian na ayaman.

2010—Haiti. Lapud 7.0-magnitude ya yegyeg ya pinatumbokan na dakel nin maksil ya aftershock, masulok ya 300,000 so inatey tan masulok ya sakey milyon so naandian na ayaman.

2011—Japan. Lapud 9.0-magnitude ya yegyeg tan saray tsunami ya sinmublay ed satan, inatey so manga 18,500 ya totoo tan nilasus-nilibo ni so tinmaynan ed panaayaman da. Aderal so Fukushima power plant, tan walay sinmengaw ya makapatey ya radiation manlapud satan. Anggaman samploran taon lay linmabas, manga 40,000 ya totoo so agni makapawil ed saray abung da ya asingger ed power plant lapud atagey ni so level na makapatey ya radiation.

Antoy epekto ed sikatayo na propesiya na Biblia tungkol ed saray yegyeg?

Naamtaan tayod propesiya na Biblia tungkol ed saray yegyeg no antoy magano lan nagawa. Oniay imbaga nen Jesus: “No nanenengneng yon nagagawa la irayan bengatla, amtaen yo ya asingger lay Panarian na Dios.”—Lucas 21:31.

Ipapaliwawa na Biblia ya say Panarian na Dios et sakey ya tuan gobierno diad tawen, tan si Jesu-Kristo so Ari ed satan. Atan may Panarian ya imbangat nen Jesus ed saray papatumbok to ya ipikasi da.—Mateo 6:10.

No manuley lay Panarian na Dios diad interon mundo, ekalen na Dios iray natural ya kalamidad, kaiba la ray yegyeg, ya mamipeligro ed saray totoo. (Isaias 32:18) Aliwan satan labat, ekalen to met iray makapuy ya epekto ed laman tan emosyon na totoo ya resulta na saray nagagawan yegyeg natan. (Isaias 65:17; Apocalipsis 21:3, 4) Parad kaaruman ya impormasyon, basaen so artikulon “Ano ang Gagawin ng Kaharian ng Diyos?”