Tulongan Ak Kasi na Dios no Manpikasi Ak?

Say ebat na Biblia

On, tutulongan na Dios iray masimoon ya manpipikasi ed sikato tan eebatan to ray kerew da ya unong ed linawa to. Anggano agmo ni asali so nampikasi nensaman, nayarin napaseseg ka ed saray totoon angipikasi ya “O Dios ko, tulongan mo ak pa.” Nia ray alimbawa:

• “Tulongan mo ak pa, O Jehova a Dios ko; iliktar mo ak komon diad panamegley na matoor a panangarom.”—Salmo 109:26.

• “Mairap ak labat tan mankakkaukolan: O Dios, tulongan mo ak.”—Salmo 69:6, Douay Version.

On, mabiskeg so pananisia to may angisulat ed saratan. Pero amin ya manpipikasi ed Dios et dedengelen to met basta dugay motibo ra. Singa bilang, dedengelen to ray pikakasi na totoon “asugatay puso” ra odino “nagogonigon so espiritu” ra.—Salmo 34:18.

Agmo iisipen ya arawrawi so Dios tan anggapoy pibabali to ed saray problemam ta oniay ibabaga na Biblia: “Anggaman atagtagey si Jehova, iimanoen toy mapaabeba, balet say mapaatagey et kabat to labat diad arawi.” (Salmo 138:6) Onia ni ingen so imbaga nen Jesus ed saray disipulo to: “Anggan saray buek yo et abilang ya amin.” (Mateo 10:30) Diad tua et amta na Dios so amin ya detalye nipaakar ed sika, pero ompan sikan mismo et agmo itan naiimano. Kanian dengelen na Dios so pikakasim tan tulongan to ka ed saray pampapagaan mo!—1 Pedro 5:7.